გია გრიგალავა: არ მიძახებდნენ და ლოგიკურიც იყო, ახლა კი გახარებული ვარ

საქართველოს ნაკრების სიას უკვე გაეცანით და ისიც იცით, რომ მოახლოებული ამხანაგური მატჩების წინ ეროვნულ გუნდში გია გრიგალავაცაა (23 მატჩი ქვეყნის ნაკრებში) გამოძახებული. ამ ფაქტმა ის ძალიან გაახარა.

- ვლადიმირ ვაისმა შემადგენლობა გამოაცხადა

"ვაისის მუშაობის პერიოდში საქართველოს ნაკრების მაისურით არ მითამაშია და ეს პირველი შემთხვევაა, როცა შეკრებაზე გამოვცხადდები. ძალიან გახარებული ვარ, რადგან ნაკრებში თამაში საამაყოც არის და პრესტიჟულიც", - ამბობს გრიგალავა.

ტულის "არსენალის" 28 წლის მცველი აღიარებს, რომ მისი გამოუძახებლობა ლოგიკური იყო:

"ბოლო ერთი წელია, ნაკრებში აღარ მითამაშია და არც მიკვირს. ბოლო ორი წელია, ტრავმები შემეჩვია. კვიპროსში, "პაფოსსა" და "ეთნიკოსში" თამაშის პერიოდში, კუნთი ორჯერ გამიწყდა, მერე იგივე რუსეთში მომივიდა. "არსენალში" რომ გადავედი, ბოლომდე მორჩენილი არ ვიყავი, რომ მათამაშეს და ისევ იძულებით მომიწია დასვენებამ...

ასე რომ, ეს ბუნებრივი იყო. ახლა მოვმჯობინდი და გამომიძახეს. მადლობის მეტი რა მეთქმის".

ბოლო ტრავმის შემდეგ, როცა ყვრიმალის ძვალი გაუტყდა, გრიგალავას ტკივილები აღარ აწუხებს:

"თავიდან მოედანზე მაინც ფრთხილად გავდიოდი, მაგრამ ახლა არც ტკივილები მაწუხებს და არც შიშით ვთამაშობ. ერთადერთი პრობლემა ის არის, რომ ნიღაბი მოუხერხებელია და ხედვაში ხელს მიშლის".

ყოველდღიური სპორტული გაზეთი "ლელო"
1829
მკითხველის კომენტარები / 0 /
მსგავსი ამბები
რუბრიკის სხვა სიახლეები
;