გია ცეცაძე გიორგი დარასელიამ შეცვალა

გია ცეცაძე "სამტრედიას" მთავარი მწვრთნელი აღარ არის. საქართველოს ახალგაზრდული ნაკრების თავკაცმა გუნდი დატოვა და ეროვნული ლიგის ერთ-ერთ აუტსაიდერს კვლავ ახალი მწვრთნელის მოძიება მოუხდა.

ცეცაძე საქართველოს ახალგაზრდული ნაკრების მთავარი მწვრთნელია და "სამტრედიაში" მისი დაბრუნებისთანავე ითქვა, რომ გუნდს მხოლოდ ევროთასებზე და სანაკრებო თამაშებამდე დაეხმარებოდა, მერე კი ისევ ახალგაზრდულ გუნდს დაუბრუნდებოდა.

უკვე ცნობილია, რომ "სამტრედიაში" ცეცაძეს 49 წლის გიორგი დარასელია შეცვლის, რომელიც წლების წინ (1995-1996) ამ გუნდის მოთამაშე იყო. დარასელია იყო საქართველოს ნაკრების წევრი (1991-99 წლებში ეროვნული გუნდის ფორმით 9 მატჩი ჩაატარა და 2 გოლი გაიტანა), კარიერის ბოლო წლებში ისრაელში თამაშობდა და ამ ქვეყნის მოქალაქეც გახდა.

სამწვრთნელო კარიერაც ისრაელში დაიწყო - ჯერ მთავარი მწვრთნელის ასისტენტად მუშაობდა კფარ-საბას "ჰაპოელში", "ბნეი სახნინში", ჰაიფას "მაკაბისა" და ბეერ-შევას "ჰაპოელში", მერე კი დამოუკიდებლად მუშაობის შანსი საქართველოში მიიღო, როცა 2012 წელს გორის "დილა" ჩაიბარა.

სხვათა შორის, მაშინაც მისი დანიშვნა გუნდიდან ცეცაძის წასვლას დაემთხვა, რომელიც ამ დროს თემურ შალამბერიძეს ეხმარებოდა. დარასელიას თავკაცობით "დილამ" მეორე ადგილი დაიკავა საქართველოს ჩემპიონატში და 18-დან 16 მატჩი მოიგო. მასვე ეკუთვნის ქვეყნის რეკორდიც: მის გარდა, საქართველოში მომუშავე სხვა ვერც ერთმა მწვრთნელმა ვერ შეძლო უმაღლესი ლიგის ყველა გუნდის დამარცხება...

"დილას" შემდეგ იყო ხაბაროვსკის "სკა ენერგიაში", "ზუგდიდში", ქუთაისის "ტორპედოსა" და სენაკის "ეგრისში". 2017 წლიდან დარასელია გორში დაბრუნდა, მაგრამ ზედიზედ 4 მოუგებელი მატჩის შემდეგ 12 აგვისტოს თანამდებობა დატოვა.

მიმდინარე სეზონში ის უკვე მეოთხე მწვრთნელია, რომელიც "სამტრედიას" უხელმძღვანელებს. შეგახსენებთ - თავიდან, გუნდს უჩა სოსიაშვილი ავარჯიშებდა, რომელიც ბადრი კვარაცხელიამ შეცვალა, მერე ცეცაძემ ჩაიბარა და ახლა დარასელიამ.

მოახერხებს თუ არა გამოცდილი სპეციალისტი გუნდის ეროვნულ ლიგაში დატოვებას, ამას დრო გვაჩვენებს.

ყოველდღიური სპორტული გაზეთი "ლელო"
815
მკითხველის კომენტარები / 0 /
მსგავსი ამბები
რუბრიკის სხვა სიახლეები
;