გია ცეცაძე: მიზანი? მინიმუმ პლეი ოფში მოხვედრა!

საქართველოს ახალგაზრდულმა ნაკრებმა ბოლო ვარჯიში გამართა სლოვენიასთან ამხანაგურ მატჩამდე, რომელიც პარასკევს, 22 მარტს, გორის “თენგიზ ბურჯანაძეზე” გაიმართება. 21-წლამდელები ტექნიკურ ცენტრ “ბასაში” ემზადებიან.

სლოვენიის შემდეგ, 26 მარტს, საქართველოს ახალგაზრდული ნაკრები გორშივე კიდევ ერთ ამხანაგურ მატჩს გამართავს, ამჯერად - ისრაელთან. გია ცეცაძის განკარგულებაში ეს ფეხბურთელები არიან:

მეკარეები - ლუკა გუგეშაშვილი (დილა), დემეტრე ბულისკერია (ლოკომოტივი), ლუკა სანიკიძე (თელავი);
მცველები - ლუკა ლოჩოშვილი (ჟილინა, სლოვაკეთი), დავით კობოური (დინამო თბ), ვაჟა ფაცაცია (დინამო ბთ), თორნიკე ძებნიაური (ლოკომოტივი), ილია ბერიაშვილი (თელავი), გიორგი ჯინჯოლავა (საბურთალო), ნიკა მალი (საბურთალო), ლუკა ლაკვეხელიანი (საბურთალო);
ნახევარმცველები - გიორგი კუცია (დილა), ნიკა ნინუა (დინამო თბ), გიორგი ქოჩორაშვილი (ჟირონა, ესპანეთი), დავით სამურკასოვი (ლოკომოტივი), ლუკა სილაგაძე (რუსთავი), თემურ ჩოგაძე (რუსთავი), ზუკა დავითაშვილი (ლოკომოტივი);
თავდამსხმელები - გიორგი არაბიძე (ნასიონალი, პორტუგალია), ირაკლი ბუღრიძე (ბეერსხოტი, ბელგია), ბექა ქავთარაძე (რუსთავი), ნუგზარ სპანდერაშვილი (დილა), რატი არდაზიშვილი (ლოკომოტივი).

გუშინ საქართველოს ახალგაზრდული ნაკრების მთავარმა მწვრთნელმა პრესკონფერენცია გამართა, სადაც მომავალ თამაშებსა და შესარჩევი ეტაპისთვის მზადებაზე ილაპარაკა.

- გუნდი გეგმის მიხედვით ემზადება. მოთამაშეთა მდგომარეობით კმაყოფილი ვარ. ყველა მათგანი სათანადო კონდიციაშია. ბიჭები არაფერს უჩივიან და სათამაშოდ მზად არიან. სამწუხაროდ, გაუთვალისწინებელი ამბავი ამჯერადაც მოხდა და ტრავმების გამო კოხრეიძე და ხეცურიანი დაგვაკლდა. მათ ნაცვლად კი სპანდერაშვილი და ბერიაშვილი მოვიწვიეთ.

- რას იტყვით ისრაელსა და სლოვენიაზე? შესარჩევის მეტოქეთა სტილში თამაშობენ?

- ამაზე ლაპარაკი გამიჭირდება, რადგან ორივე მათგანი წინა ციკლის შემდეგ შეიცვალა, მას შემდეგ არ უთამაშიათ და ახალი შემადგენლობით გვესტუმრებიან. თუმცა, სლოვენიას ადრინდელი მწვრთნელი ჰყავს და მისი სტილიდან გამომდინარე ვფიქრობ, რომ სათამაშო სქემას არ შეცვლის.

საერთოდ, ჩვენ მოედანზე ყოველთვის მოსაგებად გავდივართ. მაგრამ ამჯერად შედეგზე უფრო მნიშვნელოვანი ევროშესარჩევისთვის მომზადებაა, რომელიც სექტემბერში დაგვეწყება. ჩვენთვის ეს მორიგი მატჩებია და სლოვენიასა და ისრაელთან მატჩები დაგვეხმარება, რათა ფეხბურთელებამდე ზუსტად მივიტანოთ ის, რასაც ვგეგმავთ. არც ერთი მათგანი სუსტი გუნდი არ უნდა იყოს. მაგრამ ცუდი არც საქართველოს ახალგაზრდული ნაკრებია და იმედია, მაყურებელს საინტერესო და სანახაობრივ ფეხბურთს ვაჩვენებთ.

- გუნდში როგორი განწყობაა?

- სათანადო, ისეთი, როგორიც უნდა იყოს. ისინი პროფესიონალები არიან და თამაშისთვის სათანადოდ ემზადებიან. ბევრმა მათგანმა წინა შესარჩევი ციკლი ითამაშა, ერთმანეთს კარგად იცნობენ, რადგან ამ გუნდის მოთამაშეთა ბირთვმა საქართველოში ჩატარებულ 19-წლამდელთა ევროპის ჩემპიონატზე ითამაშა.

- წინა ციკლში გუნდი ისეთ დროს ჩაიბარეთ, როცა გასვლის შანსი აღარ გვქონდა...

- თეორიული შანსი მაინც იყო, რომელიც, სამწუხაროდ, ვერ გამოვიყენეთ. ჩემთვის ახალი შესარჩევი წინას გაგრძელებაა. პოლონეთთან გასვლაზე წაგებული თამაშის მიუხედავად, მიმაჩნია, რომ გუნდმა ერთ-ერთი საუკეთესო თამაში ჩაატარა. ჩემი მიზანია, რომ გუნდი მინიმუმ ასეთ კონდიციაში იყოს.

- შესარჩევ ციკლში რა მიზანს ისახავთ?

- მინიმუმ პლეი ოფში და ევროპის ჩემპიონატზე მოხვედრაა. ამაში უეფას დანერგილი სიახლეც ხელს გვიწყობს - საუკეთესო მეორეადგილოსანი ევროპის ჩემპიონატზე მოხვდა, რაც დიდი მოტივაცია და შანსია.

- ნაკრების რამდენიმე წევრი უთამაშებელია.

- სამწუხაროდ, ასეთ პრობლემებს ხშირად ვაწყდებით, ლეგიონერებშიც და საქართველოში მოთამაშე ფეხბურთელებშიც. კარგი იქნება, ყველამ ითამაშოს. მაგრამ კლუბების საქმეში მე ვერ ჩავერევი. ნებისმიერ შემთხვევაში, მოედანზე ყველა ბოლომდე დაიხარჯება.

- ამას და კოხრეიძე-ხეცურიანის ტრავმებს ეროვნულ ნაკრებში არველაძის მიწვევაც დაემატა...

- რა თქმა უნდა, შედეგი ჩვენთვის ძალიან მნიშვნელოვანია, მაგრამ ახალგაზრდული ნაკრების მთავარი დანიშნულება ეროვნული გუნდისთვის ფეხბურთელების მომზადებაა. არველაძის ნაკრებში გამოძახება კი ძალიან სასიხარულოა.

- არაბიძე როგორ ფორმაშია?

- ბოლოს მცირე ტრავმა აწუხებდა, მაგრამ მშვენიერ კონდიციებშია - ფიზიკურადაც და ფუნქციონალურადაც. რაც მთავარია, ქვეყნის სამსახურშია.

ყოველდღიური სპორტული გაზეთი "ლელო"
846
მკითხველის კომენტარები / 0 /
მსგავსი ამბები
რუბრიკის სხვა სიახლეები
;