გია ცეცვაძე: საქმისადმი მიდგომამ ძალიან გამახარა... ნაკრებს დიდი პონტენციალი აქვს!

საქართველოსა და უელსის ახალგაზრდული ნაკრებების შეხვედრის (2:2) შემდეგ ქართული გუნდის მთავარმა მწვრთნელმა გიორგი ცეცაძემ შეკითხვებს უპასუხა - თამაშზე, ახლანდელ თაობაზე, გიორგი არაბიძის მომავალზე...

ბარემ აქვე გეტყვით, რომ 6 ივნისს უელსთან მეორე მატჩიც "მიხეილ მესხზე" გაიმართება. თამაში 20 საათზე დაიწყება...

- ცხადია, ჯერ მატჩის შეფასება გვაინტერესებს...

- მთლიანობაში, მატჩს დადებითად შევაფასებდი. მიუხედავად იმისა, რომ პირველ ტაიმში შეიძლება ვერ დავალაგეთ თამაში ისე, როგორც მეორეში, უარყოფითს ნამდვილად არ ვიტყვი. ბიჭების სასახელოდ უნდა ითქვას, რომ შესვენების შემდეგ თამაშის შემოტრიალება მოახერხეს. დღეს გუნდმა ხასიათი და ბრძოლის უნარი გამოავლინა.

- მეტოქეზე რას იტყვით?

- ეს ფაქტი ცალკეა აღსანიშნავი. ფეხბურთის ფედერაციამ ძალიან კარგი მეტოქე შეგვირჩია. შეიძლებოდა, უფრო სუსტ სპარინგპარტნიორს შევხვედროდით, მაგრამ ნაკრების გასაზრდელად ჩვენი დონის და უფრო ძლიერ მეტოქესთან თამაში სჯობია. ასეთ დროს ბევრი რამ ჩანს.

- ფეხბურთელებმა დავალებები კარგად შეასრულეს?

- ყველამ იცის, რომ საერთოდ ნაკრებს სამუშაოდ მცირე დრო აქვს და ამის მიუხედავად, ყველაფერი ისე კარგად აეწყო, ბიჭების კმაყოფილი დავრჩი. ყურადღებას გავამახვილებ არა დღევანდელ შედეგზე, არამედ სავარჯიშო პროცესზე, სადაც ფეხბურთელებმა თავი კარგად გამოავლინეს, მონდომებით იშრომეს და ეს უელსთან ნაწილობრივ გამოჩნდა, განსაკუთრებით - მეორე ტაიმში. ნამდვილად კარგი თამაში გამოვიდა, მაყურებელმა საინტერესო შეხვედრა იხილა.

კარგი იქნებოდა, მოგვეგო, მაგრამ შედეგს ამხანაგურ შეხვედრაში არანაირი მნიშვნელობა არ აქვს. მთავარია, მწვრთნელებმა და გულშემატკივარმა სასურველი თამაშის მონახაზი და გუნდის სახე დავინახოთ. ეპიზოდურად ვაჩვენეთ ის ფეხბურთი, რომლისკენაც მივდივართ. ასე იყო პირველ ტაიმში, მაგრამ უფრო - მეორე ნახევარში. თუმცა, ცხადია, ჯერ კიდევ ძალიან ბევრი რამ გვაქვს დასახვეწი.

- უელსთან მეორე შეხვედრაში შემადგენლობას შეცვლით?

- რა თქმა უნდა, ფეხბურთელებს შევცვლით. ვინც პირველ მატჩში არ ითამაშა ან მოედანზე მცირე დრო დაჰყო, მათ მეტი შანსი მიეცემათ.

- თქვით, რომ ძლიერ მეტოქესთან ბევრი რამ ჩანს. რა შეცდომები დაინახეთ?

- თანამედროვე ფეხბურთი ისეა, რომ ასე კონკრეტულ კომპონენტს ვერ გამოვყოფ. შეცდომები იყო დაცვაშიც და შეტევაშიც. მაგრამ უშეცდომო არც "ბარსელონაა" და არც - გერმანიის ნაკრები. უელსის დონის ნაკრებთან ამხანაგურად თამაში ამიტომაც გვსურდა, რომ ეს ყველაფერი ოფიციალურ შეხვედრებამდე დაგვენახა. თუმცა კატასტროფული შეცდომები არ დაგვიშვია.

- საერთოდ, ახალგაზრდული ნაკრების ამჟამინდელ თაობას როგორ შეაფასებდით?

- კარგი კონტინგენტია. მიმაჩნია, რომ მათ შეუძლიათ, ქვეყანა გაახარონ. თუმცა, გუნდის შენებას და ამ ბიჭების პოტენციალის გამოვლენას დრო და მუშაობა სჭირდება. უკვე მესამე შეკრებას ვატარებთ და ყოველი ახალი წინაზე უკეთესია. მთავარი ვარჯიშია და ამ ვარჯიშებისას მომეწონა საქმისადმი დამოკიდებულება. ამიტომაც მიმაჩნია, რომ ამ თაობას პერსპექტივა აქვს.

- ამ სამ შეკრებაზე ბირთვი შეიკრიბა თუ სხვებსაც გამოსცდით?

- კიდევ ბევრი ფეხბურთელია, რომელთა ნახვაც მსურს. საბედნიეროდ, იმის ფუფუნება გვაქვს, რომ ნაკრებში ერთ ადგილზე 3 ფეხბურთელი გვყავდეს. სხვათა შორის, 18-19 წლის ბიჭებიც მოვიწვიე, რომელთაც თამაში შემდეგ ციკლში მოუწევთ და მათი შესაძლებლობები მაინტერესებდა.

- არაბიძემ რატომ არ ითამაშა?

- გიორგი ჩვენი გუნდის უცვლელი წევრია, ლიდერია და ძალიან კარგი ბიჭია, მაგრამ ახლა დავასვენეთ.

- ანუ შეკრებაზე ჩამოვიდა?

- დიახ, ჩამოსული იყო, მაგრამ არ უვარჯიშია, რადგან, როგორც ვთქვი, დავასვენეთ.

- რატომ?

- მისი შესაძლებლობები ვიცით, თანაც, საკლუბო საკითხები ჰქონდა გასარკვევი და ეს გადაწყვეტილება შეთანხმებით მივიღეთ. საერთოდ, ფეხბურთელი რაც უფრო კომფორტულადაა კლუბში და თავს კარგად გრძნობს, ეს ისევ ნაკრებისთვისაა კარგი. გიორგის კი ახლა სწორედ საკლუბო საქმეები ჰქონდა მოსაგვარებელი და ხელი უნდა შეგვეწყო.

- კლუბს იცვლის?

- დიახ. ისე, ცოტა კი გაეწელა ეს ამბავი და ამაზე ვნერვიულობ. ბოლოს გიორგი "შახტარის" დუბლებში შედეგითაც და თამაშითაც ლიდერი იყო, ამიტომ მიმაჩნია, რომ დროა უფრო დიდ ფეხბურთში შეაბიჯოს. როგორც ვიცი, არაბიძე უფრო კარგ გუნდში გადადის. ასაკობრივი გუნდისთვის აშკარად გადაიზარდა. რაც უნდა იყოს, დუბლებში მაინც ახალგაზრდული დონეა. არაბიძესთან "ლოკომოტივში" მიმუშავია და კარგად ვიცი, რამხელა პოტენციალი აქვს. ბევრი მაგალითის გახსენება შემიძლია, მოედანზე როგორი გულანთებული გადიოდა. მას ახლა კარგი ვარიანტები აქვს და ჯობია მოაგვაროს თავისი საქმეები.

ყოველდღიური სპორტული გაზეთი "ლელო"
1038
მკითხველის კომენტარები / 0 /
მსგავსი ამბები
რუბრიკის სხვა სიახლეები
;