გიგანტური ნაბიჯი წინ! ლატვიიდან ევროპა უფრო ახლოს გამოჩნდა!

ლატვია-საქართველო 0:3
16.10. რიგა. დაუგავა არენა
გოლები: 0:1კანკავა(8), 0:2 გვილია (29), 0:3 ჩაკვეტაძე (61)
გამოუყენებელი პენალტი: ყაზაიშვილი (5. მეკარე)
ლატვია (4-3-1-2): ვანინსი - ჟულევსი, იაგოდინსკისი, დუბრა, მაქსიმენკო - ფერტოვსი (46. ისაევსი), ტარასოვსი, ციგანიკსი - რაკელსი - კარაშაუსკსი (70. დ. იკაუნიეკსი), გუტკოვსკისი (70. შაბალა).
სათადარიგოები: სტეინბორნსი, ოსი, სოლოვიოვსი, ლუკიანოვსი, იკსტენსი, კურაკინსი, სავანიეკსი, რუგინსი
მწვრთნელი: მიქსუ პაატელაინენი
საქართველო (4-2-3-1): ლორია - კაკაბაძე, კაშია, ხოჭოლავა, დვალი - კვეკვესკირი, კანკავა (34. აბურჯანია) - მერებაშვილი (80. ჯიღაური), გვილია, ჩაკვეტაძე (89. ზარანდია) - ყაზაიშვილი.
სათადარიგოები: კაჭარავა, ტაბიძე, ნავალოვსკი, კვირკველია, ჭანტურიშვილი, ანანიძე, კიტეიშვილი
მწვრთნელი: ვლადიმირ ვაისი
გაფრთხილება: გუტკოვსკისი (46)
არბიტრი: პეტრ არდელეანუ (ჩეხეთი)

საქართველოს ნაკრებმა ზედამაჯერებლად მოუგო ლატვიას და D ლიგის პირველ ჯგუფში პირველი ადგილის გაინაღდა და ერთი, რომ გავიდა ერთა ლიგის პლეი ოფში, და მეორე - მომავალ ერთა ლიგაში ერთი საფეხბურით მაღლა - ჩ ლიგაში იასპარეზებს.
დარჩენილი ორი შეხვედრა ძალების სრული მობილიზებით უნდა ჩავატაროთ, თუ ნახევარფინალში მასპინძლის სტატუსის მოპოვება გვსურს. ზეიმი ჯერ ადრეა, მაგრამ სათქმელი კი გვაქვს: ევროპის ჩემპიონატის ფინალურ ეტაპზე გასვლა რეალურზე რეალურია. ზეიმის არა, მაგრამ სიხარულის საფუძველი კი გვაქვს...
ჩვენს პოტენციურ მეტოქეებზე წერას და ანალიზს "ლელოს" შემდეგი ნომრიდანვე დავიწყებთ. პლეი ოფებამდე სწორედ ესაა ჩვენი მთავარი საქმე. მანამდე კი ზოგადად დავწერთ, რომ საქართველოს ნაკრებს თავისუფლად შეუძლია, საუკეთესო იყოს ამ D ლიგაში.

სიურპრიზი

საქართველოს ნაკრების მთავარმა მწვრთნელმა ვლადიმირ ვაისმა მართლაც რომ გვარიანი სიურპრიზი მოგვიმზადა. ვერ წარმოვიდგენდით, რომ საქართველოს პირველი გუნდის შემადგენლობა ლატვიასთან მატჩში ასეთი იქნებოდა.

ანდორასთან მოგებული შეხვედრის შემდეგ ძირითად შემადგენლობაში არაერთი ცვლილება მოხდა. მოულოდნელად გვეჩვენა სათადარიგოთა შორის საბა კვირკველიას გამწესება. თამაში დავიწყეთ გამოკვეთილი ცენტრალური თავდამსხმელის გარეშე.
ვაისმა გადაწყვიტა, შანსი მიეცა იმ ფეხბურთელებისთვის, რომელთაც იშვიათად აქვთ ნაკრებში თავის გამოჩენის შანსი და რომელთაც უახლოეს რეზერვად მიიჩნევს.

ბლიც-კრიგი

საქართველოს ნაკრებმა თამაში ისე დაიწყო, როგორც ნამდვილ ფავორიტს შეჰფერის. გიორგი მერებაშვილის ჩაწოდების შემდეგ ბურთი ხელზე მოხვდა ლატვიელ მცველს და დაინიშნა 11-მეტრიანი. ვაკო ყაზაიშვილმა კარგად ვერ დაარტყა პენალტი, რომელიც "ციურიხის" გამოცდილმა მეკარე ანდრის ვანინსმა მოიგერია.
საქართველოს ნაკრებმა ტემპი არ დააგდო და მალე ლატვიელთა კარში ულამაზესი გოლი ვიხილეთ. ყაზაიშვილი დარტყმას ცდილობდა, გადმოვარდნილი ბურთი ჯაბა კანკავას მიუგორდა და კაპიტანმაც ცაციათი პირდაპირ "ცხრიანში" დააჭედა - 1:0.

სტანდარტული ლატვია

ლატვიის ნაკრები სადღაც მე-15 წუთისთვის მოვიდა გონს. ბალტიისპირელები განსაკუთრებულს არაფერს გვთავაზობდნენ. "სტანდარტები" და საჰაერო ორთაბრძოლების მოგება - ასეთი იყო მათი გათვლა.
ერთ-ერთი ასეთი "სტანდარტის" დროს აშკარად გადავრჩით. შეტევაში ჩართულმა მცველმა იაგოდინსკისმა ქართველთა კარის შორეულ კუთხეს დაუმიზნა ბურთი. იმ ეპიზოდში გიორგი ლორია ნამდვილად ვერ გვიხსნიდა, მაგრამ ფორტუნა ამ შემთხვევაში ჩვენს მხარეს აღმოჩნდა.

ჩაკვეტაძის შედევრი

29-ე წუთზე გიორგი ჩაკვეტაძემ ისეთი რამ გააკეთა, ნებისმიერი მატჩის მთავარ "ჰაილაითად" რომ იქცეოდა. საქართველოს ნაკრების მთავარმა "ფანტაზისტამ" შეტევის მარცხენა ფლანგისკენ მოიხელთა ბურთი, წინ წაიწია, მახვილგონივრული პასით მეკარეს პირისპირ შეჰყარა ვაკო გვილია და ამანაც ცივსისხლიანად შეაგდო.
პასი ისეთი ნატიფი, გამოზომილი და დიდოსტატური იყო, ნებისმიერი ვარსკვლავი რომ მოაწერდა ხელს. ჩაკვეტაძემ გვიჩვენა ის, რისთვისაც გვიყვარს ფეხბურთი. ეს ეპიზოდი ალბათ დიდი ხნის განმავლობაში არ დაავიწყდება სტადიონზე შეყრილ პუბლიკას.

სიფრთხილეს თავი არ სტკივა!

34-ე წუთზე ვაისმა მინდვრიდან გაიხმო ჯაბა კანკავა და მართალიც იყო - კაპიტანს მცირე ტრავმა აწუხებდა. რა თქმა უნდა, ასეთ დროს არ ღირს გარისკვა - ჯაბამ ამ მოკლე დროშიც ფრიადზე გააკეთა საკუთარი საქმე.
ტაიმის ბოლომდე გიორგი ჩაკვეტაძემ გაიბრწყინა ორჯერ. ჯერ ლამაზი მოძრაობით დაუსხლტა მეურვეს და საჯარიმოში შესული ლატვიელ მცველთან ორთაბრძოლაში დაეცა, მერე კი შეტევა კარში დარტყმით დაასრულა - ამ სიტუაციაში ბურთი ვანინსის ნადავლი გახდა.

...და ისევ ჩაკვეტაძე!

მეორე ტაიმის დაწყებიდან 15 წუთი გავიდა და საქართველოს იმედმა გიორგი ჩაკვეტაძემ მორიგი შედევრი შემოგვთავაზა. შესანიშნავი სოლოს შემდეგ კიდევ ერთი მეტოქე გააბითურა და მესამედ აიღო ლატვიელთა კარი.
იმ ეპიზოდში ვაკო გვილია, ვინც ერთ-ერთი საუკეთესო იყო ქართველთა შემადგენლობაში, პასს ელოდა და უეჭველად გაიტანდა, მაგრამ... გიორგიმ ძალიან მსუბუქად აიღო საკუთარ თავზე ეპიზოდის მთელი სიმძიმე და დააგვირგვინა კიდეც - 3:0!
კიდევ ერთი დიდებული ეპიზოდი ჩაკვეტაძის შესრულებით, ვინც ლატვიის მთელ ნაკრებს საფეხბურთო მასტერკლასი ჩაუტარა.

მისია შევასრულეთ

თამაშის ბოლომდე პირნათლად შევასრულეთ ჩვენი ამოცანა. ლატვიას ერთი მომენტი კი ჰქონდა, მაგრამ გადავრჩით და მიმდინარე ერთა ლიგაზე საკუთარი კარი "მშრალად" შევინახეთ. მეოთხე გოლის გატანაც შეგვეძლო. მშვენიერი საგოლე შანსი ჰქონდა ყაზაიშვილს. "სან ხოსეს"ქართველმა შემტევმა მომენტი თავად შეიქმნა, მაგრამ კარს ზემოდან გადააცილა.
ვერ გაიტანა ჯაბა ჯიღაურმა, რომლის დარტყმული მცირედით გადასცდა ხარიხას. სულ ბოლო მომენტი ლატვიელებისა იყო, მაგრამ გიორგი ლორიამ დამაჯერებლად იმოქმედა.

ბრავო, ვლადიმირ!

საქართველოს ნაკრები აშკარად დაემსგავსა გუნდს, რომელიც არა ცალკეული ინდივიდუალისტების, არამედ პროფესიონალების კრებულია. ყველა ერთისთვის და ერთი ყველასთვის - ასე თამაშობს ვაისის გუნდი!
სლოვაკმა მწვრთნელმა კი იმდენი მაინც მოახერხა, რომ ბევრი მუშაობის ხარჯზე ამ დონის გუნდებთან მაინც ვთამაშობთ ისეთ ფეხბურთს, როგორიც აშკარა ფავორიტს ეკადრება. მოკლედ, ისტორიის პირველი ნაწილი დაიწერა - საქართველომ მოიგო ჯგუფი. ისტორიის მეორე ნაწილიც აუცილებლად უნდა დაიწეროს!

1. საქართველო 4 4 0 0 9:0 12
2. ყაზახეთი 4 1 2 1 6:4 5
3. ლატვია 4 0 2 2 1:5 2
4. ანდორა 4 0 2 2 1:8 2

მომდევნო ტური
15 ნოემბერი
ყაზახეთი-ლატვია

16 ნოემბერი
ანდორა-საქართველო

ყოველდღიური სპორტული გაზეთი "ლელო"
1907
მკითხველის კომენტარები / 3 /
Alex.F
0
მჯერა ამ გამარჯვებით ძალიან
დიდ წარმატებას ჩაეყარა საფუძველი! რატომღაც დარწმუნებული ვარ რომ,ევრო2020-ზე და მსოფლიოზე 2022-ში ეს თაობა ითამაშებს!
სოსო
0
ყურადღება მიაქციეთ,საქართველოს ნაკრებმა უფრო მეტი გოლი გაიტანა,ვიდრე დანარჩენმა სამმა,ერთად.
მსგავსი ამბები
რუბრიკის სხვა სიახლეები
;