გიორგიოს კეცელიდისი: კალათბურთელები სტატისტიკის მიხედვით არ ამირჩევია 

2018-19 წლების სეზონში „რუსთავმა“ სუპერლიგაში ბოლო ადგილი დაიკავა და მომდევნო წელს „ა“ ლიგაში უნდა ეთამაშა, მაგრამ კალათბურთის ფედერაციის გადაწყვეტილებით გუნდების რაოდენობა 11-მდე გაიზარდა და რუსთაველებიც დარჩნენ. 

დარჩა მთავარი მწვრთნელი გიორგიოს კეცელიდისიც, რომელსაც რუსთავში, გუნდის პრეზენტაციის შემდეგ ვესაუბრეთ.

- გუნდის პრეზიდენტმა კობა კობიაშვილმა, სპორტულმა დირექტორმა ლევან მიქაბერიძემ და მე სამომავლო გეგმები მარტში დავისახეთ. მარტშივე ვიცოდით რა უნდა გაგვეკეთებინა, თუ გუნდი დარჩებოდა უმაღლეს ლიგაში. აგვისტოში ფედერაციიდან შევიტყვეთ, რომ სუპერლიგაში გუნდების რაოდენობა 11-მდე გაიზრდებოდა, შესაბამისად, ვემზადებოდით, რომ ეს მეთერთმეტე ჩვენ ვყოფილიყავით. 

გუნდის პრეზიდენტმა კობა კობიაშვილმა განაგრძო:

- თუ ოჯახის უფროსი სუსტია, ოჯახიც სუსტია. მარტო კარგი კალათბურთელები ძლიერი გუნდის გარანტია არ არის. სინთეზი უნდა იყოს გამოცდილი მწვრთნელისა და მოთამაშეების. ამიტომ გადავწყვიტეთ გიორგიოს კეცელიდისის მიწვევა. ვიცოდით, მასთან ერთად უფრო გაგვიიოლდებოდა დასახული მიზნების მიღწევა. საბოლოოდ სუპერლიგაში გუნდების რაოდენობა ერთით გაიზარდა და „რუსთავი“ დარჩა ერთადერთ კლუბად, რომელსაც საქართველოს ყველა ჩემპიონატი აქვს ნათამაშები. ამ გადაწყვეტილებისთვის მინდა მადლობა გადავუხადო კალათბურთის ფედერაციას, გამგეობის წევრებს, სუპერლიგის კლუბებს... 

გუნდის სპორტულმა დირექტორმა ლევან მიქაბერიძემ 2018-19 წლების სეზონი გაიხსენა:

- გასულ სეზონში, არავის უნდოდა, რომ ლიგაში ბოლო ადგილი დაგვეკავებინა, მაგრამ ზოგჯერ ასეც ხდება, თამაში ვერ დავალაგეთ. ასეთ დროს შუა სეზონში ახალი მწვრთნელის ჩამოყვანა, მისი რეპუტაციისთვის სარისკოა, თუმცა გიორგიოს კეცელიდისი ჩვენს შეთავაზებას დათანხმდა. იგი ჩვენგან წავიდა საუკეთესო მწვრთნელის ამპლუაში და ჩამოდიოდა სატურნირო მდგომარეობით ბოლო ადგილზე მყოფ გუნდში. თუმცა იმედს ვიტოვებდით, რომ ის შეძლებდა სასწაულის მოხდენას და ლიგაში ადგილის შენარჩუნებას, მაგრამ კალათბურთში სასწაული იშვიათად ხდება, აქ ყველაფერი უამრავ საკალათბურთო ნიუანსზეა დამოკიდებული. სწორედ ამაში გამოიხატება მეგობრობა, აქ გამოჩნდა მისი ქართველებისადმი დამოკიდებულება - სხვა შეთავაზებაზე უარი თქვა, ჩამოვიდა, რომ ერთობლივი გეგმა გაგვეხორციელებინა. ამ საქმეში გვერდში დაგვიდგა ქვემო ქართლისა და ქალაქ რუსთავის ადმინისტრაცია, რისთვისაც მათ მადლობა მინდა ვუთხრა. ჩვენს პროექტს აუცილებლად განვახორციელებდით. თუმცა, „ა“ ლიგაში მოხვედრის შემთხვევაში, ერთ წელს დავკარგავდით, ვერ შევკრებდით სასურველ შემადგენლობას, რადგან მეორე ლიგაში თამაშის სურვილი ბევრს არ ექნებოდა. რაც შეეხება მწვრთნელ გიორგიოს კეცელიდისს, მასთან ხანგრძლივი კონტრაქტი გვქონდა, რომლის მიხედვით, პირობები უნდა გადაგვეხედა თუ გუნდი სუპერლიგაში ადგილს ვერ შეინარჩუნებდა. რადგან ეს ვერ მოვახერხეთ, ვცდილობდით „ა“ ლიგაში მუშაობაზეც დაგვეყოლიებინა, რადგან ვიცოდით, რომ სუპერლიგაში გადასვლა მასთან ერთად რეალური იქნებოდა. გიორგიოს კეცელიდისი თითქმის თანახმა იყო, თუმცა სჭირდებოდა ის შემადგენლობა, რომელიც ახლა ჰყავს. რამდენიმე მათგანი ნაკრების წევრია, შესაბამისად მათი დარწმუნება მოგვიხდებოდა, რომ „ა“ ლიგა რთული და ძლიერი ლიგაა, სადაც წარმატების მისაღწევად მათი დონის მოთამაშეებია საჭირო და ისინი იქიდანაც შეძლებდნენ თავის გამოჩენას, ნაკრებში მოხვედრას.

კალათბურთის ფედერაციამ გამოაცხადა, რომ ახალი სეზონისთვის სუპერლიგაში გუნდების რაოდენობას 11-მდე ზრდიდა. სუპერლიგის მეთერთმეტე გუნდი შემდეგი პრინციპით შეირჩეოდა: ბოლოადგილოსანს უნდა ეთამაშა „ა“ ლიგის ფინალისტთან - „რუსთავი“ „კავკასიას“ უნდა დაპირისპირებოდა. თუმცა, იქიდან გამომდინარე, რომ „ა“ ლიგაში სეზონი გვიან იწყება და კავკასიელები სუპერლიგის დაწყებამდე გუნდის სრულად შეკრებას ვერ მოახერხებდნენ, გადათამაშება არ შედგა და „რუსთავმა“ ავტომატურად მიიღო უმაღლესი ლიგის საგზური. 

- გასახარია, რომ საბოლოოდ ყველაფერი ჩვენდა სასიკეთოდ გადაწყდა, - გვითხრა ბერძენმა სპეციალისტმა, - სამწვრთნელო შტაბთან ერთად შორეულ გეგმებს არ ვისახავ - მაგალითად, ახლა იმაზე ვფიქრობთ, როგორი იქნება ჩვენი ვარჯიში ორი საათის შემდეგ. ვცდილობთ მომდევნო დღეს წინაზე უკეთესები ვიყოთ. ეს რეალურია, რადგან გვერდში მყავს პროფესიონალი სამწვრთნელო შტაბი და მშვენიერი კალათბურთელები. ამ ზაფხულს ბევრი ვიმუშავეთ, სეზონის დასრულების შემდეგ საწვრთნელი პროცესი არ შეგვიწყვეტია - ვივარჯიშეთ ივნისში, ივლისში, 5 აგვისტოს დასვენება გამოვაცხადეთ და 20 აგვისტოდან წინასასეზონო შეკრება დავიწყეთ.

გიორგიოს კეცელიდისმა სამწვრთნელო შტაბში შეკრიბა მიხეილ ბერუაშვილი, ანატოლი ბოისა და დავით არეშიძე (ფიზმომზადების სპეციალისტი). 

- მიხეილ ბერუაშვილთან ერთად გასულ სეზონშიც ვმუშაობდი, დავინახე როგორ შეუძლია დახმარება. არ ვამბობ, რომ ევროპაში საუკეთესო მწვრთნელია, მაგრამ ვიცი, რომ მან იცის და უყვარს კალათბურთი და შრომა. ეს ჩემთვის ძალიან ბევრს ნიშნავს. გუნდში მყავს ანატოლი ბოისა, რომელიც, როგორც კალათბურთელი თავდაუზოგავად მუშაობდა და როგორც მწვრთნელს აქვს ახლებური ხედვა... ჩემს ხედვასთან ძალიან მიახლოებული. დარწმუნებული ვარ, დიდებული მწვრთნელი დადგება. რაც შეეხება დავით არეშიძეს, მხოლოდ ერთს ვიტყვი - იგი ჩემი ძმაა. ძალიან კარგი ფიზმომზადების მწვრთნელი და შესანიშნავი ხასიათის ადამიანია. ისინი მხარში ბოლომდე მიდგანან. ერთ მაგალითს მოვიყვან: გუშინ ძალიან განერვიულებული ვიყავი. მიზეზი პერსონალური იყო. ეს ბიჭები დამეხმარნენ დამშვიდებაში და მათთან ურთიერთობის შემდეგ განწყობა რადიკალურად შემეცვალა. ისინი რომ არ მყოლოდა, არ ვიცი, რა მოხდებოდა.

მიხეილ ბერუაშვილი სხვადასხვა დროს საქართველოს ახალგაზრდული ნაკრებების მწვრთნელი იყო, „რუსთავთან“ ერთად საქართველოს ჩემპიონობაც აქვს მოგებული:

- ამ გუნდში ბავშვობიდან ვარ, „რუსთავი“ ჩემთვის ბევრს ნიშნავს. მისი წარმატება ძალიან მიხარია. ყოველთვის დავდგები იქ, სადაც რუსთავის კალათბურთის განვითარებას დასჭირდება. ახალი მწვრთნელისგან მეც ბევრს ვსწავლობ და, იმედი მაქვს, სეზონიც წარმატებული გამოგვივა. 

ანატოლი ბოისამ კარიერა ამ ზაფხულს დაასრულა. თუმცა გასული სეზონი „კაკტუსის“ მოთამაშის გარდა „ორბი-არენის“ მწვრთნელის რანგში დაიწყო. 

- მოხარული ვარ, რომ გიორგიოს კეცელიდისმა ჩემთან შეხვედრა და გასაუბრება მოისურვა. პირველივე შეხვედრის შემდეგ ჩვენი ურთიერთობა საქმიან სფეროში და თანამშრომლობაში გადაიზარდა. მოგეხსენებათ, ზაფხულში, კალათბურთში ანაზღაურება არ არის. ამის მიუხედავად მწვრთნელებიცა და მოთამაშეებიც ენთუზიაზმით ჩამოვდიოდით და ახალი სეზონისთვის მონდომებით ვემზადებოდით. რუსთაველი ვარ, პირველად ამ დარბაზში დავარტყი ბურთი იატაკზე და ძალიან გამეხარდა, როდესაც გუნდის სუპერლიგაში დარჩენა გადაწყდა. რუსთავი კალათბურთის გარეშე მოსაწყენია. მნიშვნელობა არა აქვს, რა დონის მეტოქეა, დარბაზი მაინც ივსება და ხმაურიანია.

- როდესაც გიორგიოს კეცელიდისმა დამირეკა და მითხრა, თბილისში ჩამოვდივარ, მინდა კვლავ ერთად ვიმუშავოთო, არც დავფიქრებულვარ. მის გვერდში ყოფნა ჩემთვის დიდი სიამოვნება და პატივია. ბიჭების ძალიან კმაყოფილი ვარ, ყველაფერში მოგვყვებიან და ვფიქრობთ, სეზონს სრულ მზადყოფნაში შევხვდებით. დანარჩენს დრო გვიჩვენებს, - ეს უკვე დავით არეშიძის სიტყვებია, რომელიც „შსს აკადემიაში“ გიორგიოს კეცელიდისთან, „ქუთაისში კი, კოტე ტუღუშთან ერთად მუშაობდა.

ახლა, რაც შეეხება მოთამაშეებს. მოვუსმინოთ გიორგიოს კეცელიდისს:

- ჩემთვის გუნდი პაზლია. არ ვეძებ ვარსკვლავებს, ვარჩევ ისეთ კალათბურთელებს, რომლებიც ჩემს პაზლს კარგად მოერგებიან. ყველა ის კალათბურთელი დავიმატე, ვინც მსურდა, რადგან მათ კარგად ვიცნობ, შესწავლილი მაქვს მათი თამაშიცა და ხასიათიც. სხვა კუთხიდანაც შევხედოთ სიტუაციას: რომელ მოთამაშეს არ ენდომებოდა ჩვენთან გადმოსვლა და მთელი ზაფხული ვარჯიში? ევროპაში სეზონებს შორის მწვრთნელი რომ დაიქირავო, ფულია საჭირო.

ესეც რუსთაველთა შემადგენლობა: გიორგი ცეკვავა, რომელიც ამჯერადაც გუნდის კაპიტანი იქნება, ილია ლონდარიძე, საბა ლობჯანიძე, ოთარ ფხაკაძე, აკაკი ლომოური, გეგი ბაქრაძე, მერაბ ბოქოლიშვილი, ლუკა სიხარულიძე, გიგი ტაბაღუა და ზურაბ ვაშაკიძე. ქართველ მოთამაშეებს გააძლიერებენ ლეგიონერებიც, „რუსთავის“ შემადგენლობაში იასპარეზებენ უკანახაზელი დენზელ ლივინგსტონი, მძიმე ფორვარდი ნიკოლა ტადიჩი და ცენტრფორვარდი ერიკ კოპსი.

ექსკლუზივი. გიორგიოს კეცელიდისი: ქართველ მწვრთნელებს მხოლოდ ქულები და მოგებები აღელვებთ... ეს შეცდომაა!

როგორც გიორგიოს კეცელიდისმა გვითხრა, შემადგენლობა საბოლოოდაა დაკომპლექტებული.

- ევროპაში წინასასეზონო ბაზარი დაკეტილია, ძალიან რთულია ამ დროს იპოვნო ისეთი კალათბურთელი, რომელიც გჭირდება. ამიტომაც დავიჭირეთ თადარიგი დროულად და უცხოელებიც უკვე ჩვენთან არიან. ისინი სტატისტიკის მიხედვით არ შემირჩევია. მეჯავრება სტატისტიკა. პირველი, რასაც ვუყურებ, კალათბურთელის ხასიათია. სამივე ლეგიონერს საოცარი ხასიათი აქვს.

რაც შეეხება ახალგაზრდებს...

- ახალგაზრდებთან მუშაობა ჩემი პრიორიტეტია. მიმაჩნია, რომ უმაღლესი ლიგის გუნდით დაწყებული, 12-წლამდელებით დამთავრებული, გუნდები ერთი პროგრამით უნდა ვარჯიშობდნენ. გუნდში გვყავს 19 წლამდე ასაკის სამი კალათბურთელი, სიხარულიძე, ვაშაკიზე და ტაბაღუა. შეიძლება კიდევ ერთი დავიმატოთ. ჩემმა მეგობარმა მითხრა, მტრედი მხოლოდ ერთხელ დაგაჯდება მხარზე. ეს შანსი აუცილებლად უნდა გამოიყენო. ამ სამ მოთამაშეს გაუმართლათ, რომ ჩვენს გუნდში არიან და ვარჯიშობენ კარგ მწვრთნელებთან, კარგ თანაგუნდელებთან, ევროპული, პროფესიონალური საკალათბურთო პროგრამით.

ბოლოს მიზნებზე:

- წინასწარ არ შეიძლება ვთქვათ, რა მიზნისთვის იბრძოლებს „რუსთავი“, მაგრამ ფაქტი ერთია - სამწვრთნელო შტაბიც კარგია და შემადგენლობაც. იმედი მაქვს, ღირსეულ კონკურენციას გავუწევთ ძლიერ მეტოქეებს, - გვითხრა პრეზიდენტმა კობა კობიაშვილმა.

ყოველდღიური სპორტული გაზეთი "ლელო"
1587
მკითხველის კომენტარები / 0 /
მსგავსი ამბები
რუბრიკის სხვა სიახლეები
;