გიორგი არაბიძე ნაკრებში: ჰო თუ არა?

საქართველოს ეროვნული და ახალგაზრდული ნაკრებების შემადგენლობებმა უკვე იხილა დღის სინათლე. რაკი ჯერაც საფეხბურთო ქვეყნად ვრჩებით, ქვეყნის პირველი გუნდის რჩეულთა გამოცხადებამ თავისთავად გამოიწვია დიდი ინტერესი და კამათიც მოჰყვა...

დღეს მკითხველს ჟურნალისტთან არ უჭირს დაკავშირება და სოციალური ქსელის მეშვეობით მკითხეს, რას ვფიქრობ გიორგი არაბიძეზე და კონკრეტულად იმაზე, რომ ის არ არის საქართველოს ეროვნული ნაკრების შემადგენლობაში.

თემა თავისთავად საინტერესოა და მოითხოვს ყურადღების გამახვილებას, რაკი საქმე ეხება თავის თაობაში გამორჩეულ, საქართველოს ერთ-ერთ ყველაზე ნიჭიერ ფეხბურთელს, რომლისაც ძალიან ეიმედება ჩვენს გულშემატკივარს.

სანამ მთავარზე გადავიდოდე, ვიტყვი: არაბიძე გამოძახებულია საქართველოს ახალგაზრდული ნაკრების შემადგენლობაში და მას გია ცეცაძის ხელმძღვანელობით მოუწევს თამაში დანიისა და ფარერების წინააღმდეგ.

ახლა მთავარზეც. არის თუ არა სადღეისოდ გიორგი არაბიძის ადგილი საქართველოს ეროვნული ნაკრების შემადგენლობაში? გვინდა, მკითხველს შევთავაზოთ ერთგვარი PRO და CONTRA-ს მეთოდი.

ჩვენ შემოგთავაზებთ ორივე მოსაზრებას, რომელიც არის ამ საკითხის გარშემო და ამ მოსაზრებებს არგუმენტებით გავამყარებთ. დაე, მკითხველმა აზრი თავად გამოიტანოს. ფეხბურთს უყვარს კამათი და ჩვენც ცოტა ვიკამათოთ...

რატომ უნდა იყოს არაბიძე ეროვნულ ნაკრებში...

საქართველოს ნაკრები დღეს მაინცდამაინც მდიდარი არ არის ინდივიდუალისტებით. არაბიძე კი თამამად შეგვიძლია მივაკუთვნოთ ასეთთა კატეგორიას. მას შეუძლია რამდენიმე მეტოქის მოტყუება და გოლის გატანა, ან საგოლე პასის გაკეთება.

არაბიძისთვის მინდორზე არ არსებობს ავტორიტეტი და ის ერთნაირი ჟინით თამაშობს ნებისმიერი მეტოქის წინააღმდეგ. ეს ფეხბურთელისთვის ძალიან კარგი თვისებაა. ბევრს ახასიათებს შიში და მოკრძალება მაშინ, როცა საქმე მნიშვნელოვან შეხვედრებს ეხება. არაბიძისთვის კი ეს უცხოა.

კიდევ ერთი, ძალიან კარგი თვისება, რომელიც აქვს არაბიძეს - ის შესანიშნავად ასრულებს სტანდარტულ სიტუაციებს. გავრისკავ და ვიტყვი, რომ სადღეისოდ ამ კომპონენტში ის საუკეთესოც კი არის ქართველ ფეხბურთელებს შორის.

დღევანდელ ფეხბურთში ძალიან მნიშვნელოვანია "სტანდარტები". არაერთი გუნდი ვიცით, რომელიც თამაშს, მნიშვნელოვანწილად, სწორედ ამ კომპონენტზე აგებს. ასეთ შემთხვევებში კი არაბიძე ძალიან გამოსადეგი ფეხბურთელია.

მისი კიდევ ერთი პლუსი ის არის, რომ ბუნებით ლიდერია და შეუძლია, ეს თვისება კიდევ უფრო განამტკიცოს. საერთოდ, ფეხბურთს მხოლოდ დღევანდელი დღის პრიზმაში არ უნდა ვუყუროთ. რა თქმა უნდა, საქართველოს ნაკრებს მომავალშიც დასჭირდება ლიდერები და არაბიძე ქართული ფეხბურთის ხვალინდელი დღეა...

რატომ არ უნდა იყოს არაბიძე ეროვნულ ნაკრებში...

რა თქმა უნდა, სანაკრებო სიის შედგენისას ვლადიმირ ვაისს ჰქონდა საკუთარი არგუმენტები, რომლითაც ხელმძღვანელობდა და ამ არგუმენტების თანახმად, არაბიძეს ეროვნულ გუნდში არ უხმო. სლოვაკ მწვრთნელს თავისი არგუმენტებისა თვითონ ეცოდინება, ჩვენ კი ჩვენი მოსაზრებები ჩამოვთვალოთ...

დავიწყოთ იქიდან, რომ არაბიძე ამ დროისთვის თამაშობს "შახტარის" დუბლშემადგენლობაში. დუბლებიდან ეროვნულ ნაკრებში გამოძახება კი, ცოტა არ იყოს, სარისკოა.

ჩემი აზრით, უკვე მოვიდა დრო, არაბიძემ გუნდი შეიცვალოს. იმ შემთხვევაში, თუ "შახტარში" ისევ გაგრძელდება გამორჩეული ბრაზილიელი ფეხბურთელების ექსპორტი, არაბიძისთვის უმჯობესი იქნება, წავიდეს რომელიმე სხვა კლუბში - ისეთში, სადაც მეტად ენდობიან ახალგაზრდა ფეხბურთელებს. სულაც არ არის აუცილებელი, ეს გუნდი ციდან ვარსკვლავებს წყვეტდეს. მთავარია, გიორგის ჰქონდეს სათამაშო პრაქტიკა.

არ ვიცით, რას ფიქრობს ამ საკითხზე ბატონი ვაისი, მაგრამ მე ასე მგონია - პრობლემაა ისიც, რომ არაბიძეს მაინცდამაინც არ უყვარს გუნდური ფეხბურთის თამაში და ხშირად ზედმეტად ერთობა ინდივიდუალიზმით.

ვერავინ იტყვის, რომ ნაკრების თავკაცი მოთამაშეებს თვითშემოქმედების გამოვლინებას უზღუდავს, მაგრამ მთლიანობაში ის მაინც გუნდური ფეხბურთის მიმდევარია.

პირადად არ ვიცნობ არაბიძეს, მაგრამ ქართულ საფეხბურთო თემში ხშირად ითქმება მის რთულ ხასიათზე და ესეც აუცილებლად სათვალავშია ჩასაგდები. თუ ეს მართლაც ასეა, გიორგიმ ამ პრობლემას, რაც შეიძლება, მალე უნდა უწამლოს.

დასკვნის მაგიერ

დარწმუნებულნი ვართ, მომავალში არაბიძეს არაერთხელ მიეცემა სანაკრებო შანსი და იმისიც გვჯერა, რომ ამ შანსს აუცილებლად გამოიყენებს. ახლა კი მან საქართველოს ახალგაზრდულ ნაკრებს უნდა მისცეს ყველაფერი.

ქვეყნის რანგით მეორე გუნდს ორი ოფიციალური შეხვედრა ელის ფარერებსა და დანიასთან. ორივე ამ ნაკრებთან მწარედ დავმარცხდით საგარეო თამაშებში და ახლა რევანში გვმართებს. თუ არაბიძე ითამაშებს ისეთ ფეხბურთს, როგორიც შეუძლია, საქართველოს ახალგაზრდული ნაკრების შანსები ამ შეხვედრებში მნიშვნელოვნად გაიზრდება.

ყოველდღიური სპორტული გაზეთი "ლელო"
2628
მკითხველის კომენტარები / 6 /
კაჭკაჭს
0
მაგი არაა ცუდი აზრი რომ იცოდე
ვასო
0
ანანიძის გარდა დამისახელეთ თუნდაც ერთი ფეხბურთელი, რომელიც მის პოზიციაზე სჯობს არაბიძეს, ამიტომ მიმაჩნია, რომ იგი აუცილებლად უნდა თამაშობდეს ეროვნულ ნაკრებში და ეს რომ ასე იყოს გიორგის კაი ხნის გამოცვლილი ექნებოდა გუნდი
მსგავსი ამბები
რუბრიკის სხვა სიახლეები
;