გიორგი არაბიძე: ჰოლანდიური ვარიანტი მაქვს...

გიორგი არაბიძე დონეცკის "შახტარში" ჩარიცხვის დღიდან ძირითად შემადგენლობაში მოხვედრას იმედოვნებდა. იყო პერიოდი, როცა პაულო ფონსეკამ მთავარ გუნდში გადაიყვანა და ყველას გვეგონა, რომ დამკვიდრების შანსს აძლევდა...

მაგრამ გავიდა დრო და გამოჩნდა, რომ ფონსეკა არაბიძეს "შახტარის" პირველ გუნდში ვერ ხედავდა და წასვლის სურვილი თავად ფეხბურთელსაც გაუჩნდა.

ზაფხულში იყო ლაპარაკი თურქულ "გალათასარაიში" ტრანსფერზე, ასევე, სხვა ვარიანტები, მაგრამ ჯერჯერობით, არაბიძე დონბასური კლუბის წევრად რჩება.
არაბიძემ "ლელოს" საინტერესო ამბები გაუმხილა...

- ვიცით, რომ "შახტარში" პაულო ფონსეკასგან ნდობას ვერ გრძნობთ და წამოსვლა გსურთ. რეალური ვარიანტი თუ გამოგიჩნდათ?

- დაინტერესებული გუნდის პრობლემა არ არის, მსურველები არიან.

- აბა, ხელს რა გიშლით?

- უბრალოდ, "შახტარს" ჩემი დატოვება სურს, მე კი - წასვლა მინდა და აქ "ვიჭედებით". ძალიან რთულადაა საქმე.

- დიდ ფულს ითხოვს "შახტარი"?

- დიდ ფულსაც ითხოვენ და შემდგომი ტრანსფერიდან პროცენტებსაც. მაგრამ მთავარი მაინც ისაა, რომ ჩემი გაშვება არ უნდათ. ფაქტია, ახალი კონტრაქტი შემომთავაზეს.

ჩემი პერსპექტივის რომ არ სჯეროდეთ, გამორიცხულია, სხვაგვარად ხელშეკრულების გახანგრძლივებას არ შემომთავაზებდნენ. ვნახოთ, რა გადაწყდება. წესით, იანვრის ბოლოს ბევრი რამ უნდა გაირკვეს.

- ხელშეკრულება როდის გიმთავრდებათ?

- სამ თვეში. ტრანსფერის განხორციელება ზაფხულში უფრო ადვილია და არ ვჩქარობ. ჯობია, ასეთი საკითხი მშვიდად გადაწყდეს და არა - სიჩქარეში.

- ამჟამად, კონკრეტული შემოთავაზება რომელი კლუბისგან გაქვთ?

- არ მინდა ამაზე ლაპარაკი. კონკრეტულია ყველა ის წინადადება, რომელიც ბოლო პერიოდში მივიღე. მთავარია, რომელი მათგანი გამოვა.

- და რომელია უფრო მისაღები ვარიანტი?

- დაკონკრეტებას მოვერიდები. მაგალითისთვის გეტყვით, რომ... ვთქვათ, ჰოლანდიაში თამაში გამიხარდებოდა და ვარიანტიც არის.

- ეს უკვე საინტერესოა. რა დონის გუნდია?

- მინდა, რომ ეს იყოს საშუალო დონის ევროპული გუნდი, სადაც თავიდანვე ვითამაშებ და პრაქტიკასთან ერთად, თავის გამოჩენის საშუალება მექნება. ასეთ გუნდში უფრო გავიზრდები და დავწინაურდები. მაგრამ ჯერ გადაწყვეტილი არაფერია. ამიტომაც ვთქვი, რომ ჯობს, ზაფხულს დაველოდო.

ყოველდღიური სპორტული გაზეთი "ლელო"
5626
მკითხველის კომენტარები / 4 /
vaso sosos
0
ბატონო სოსო, 20 წლის ბიჭს, კაი გუნდში, სადაც მოტივაცია ექნება რა ფორმის აკრება გაუჭირდება, ფეხბურთი არ გითამაშებია ბავშვობაში მაინც? გაუჭირდება არა კვახი. 2 ტვეში 100 პროცენტით იქნება მზად, შეიძლება უფრო ადრეც, რას ლაპარაკობთ საერთოდ? ვადევნებ თქვენს კომენტარებს თვალს და ეჭვი მეპარება, რომ რაიმე გაგეგებათ ფეხბურთში. არ მინდოდა ასეთის დაჭერა, მაგრამ ნამდვილად დაიმსახურეთ. სხვებიც დამეთანხმება, ნეგატივითაა სავსე თქვენი დამოკიდებულება, ასე რამ შეგაზარათ ეს ბიჭი?
ნინოო
0
არაფერიც არ გაუჭირდება. ჰოლანდია ზედგამოჭრილია მაგისთვის, რა თქმა უნდა ერედივიზიონი, დარწმუნებული ვარ, იქ მომენტალურად დაწინაურდება. მან უკვე ყველაფერი დაამტკიცა და შახტარის მეორე გუნდში თამაში ნამდვილად შეურაცხმყოფელია, მიტომაც არ თამოაშობს. წადი გიო, ოონდ თურქეთი და პოსტსაბჭოთა არა, არც ბელგია, დანარჩენში ლუბოიში და ხელფასზე არ დახარბდე, რადგან 1 სეზონში სტოპრო მაგარ გუნდში გაიჩითები და ბარეორს დაადუმებ. წარმატებები
მსგავსი ამბები
რუბრიკის სხვა სიახლეები
;