გიორგი არაბიძის ემოციური ინტერვიუ ოპერაციის შემდეგ: ბოლოს და ბოლოს, თავმოყვარეობა არ გვაქვს?! ცეცაძეს ეს ქვეყანა უყვარს და მისი შეურაცხყოფა ვერ მოითმინა!

გიორგი არაბი ოქტომბრის შემდეგ ვეღა თამაშობს. მას კოჭის და წვივის ტრავმა დაუდგინეს. საქართველოს ახალგაზრდული ნაკრების კაპიტნისა და თურქული "ადანასფორის" ნახევარმცველი კლუბშიც ტრავმირებული თამაშობდა და შვეიცარიასთან სანაკრებო მატჩიც დაშავებულმა ჩაატარა, რამაც მდგომარეობა კიდევ უფრო გართულა და 21 წლის ფეხბურთელს საფრანგეთა და სლოვაკეთთან ამასწინანდელი მნიშვნელოვანი მატჩები გამოატოვებინა.

საბოლოოდ, არაბიძეს დასჭირდა ოპერაცია, რომელიც გუშინ თურქეთის ქალაქ ადანის კლინიკაში გაიკეთა. მას სწორედ ოპერაციის შემდეგ დავუკავშირდით და ინტერვიუ ჩავწერეთ...

ორი თვე ასე ვთამაშობდი...

- იმედია, ოპერაციამ კარგად ჩაიარა...

- მეც ამის იმედი მაქვს. ყველაფერს ზუსტად რეაბილიტაციის შემდეგ გავიგებ. ისე, ოპერაცია ერთი საათის ნაცვლად, როგორც ვარაუდობდნენ დაახლოებით 2 საათი გაგრძელდა - აღმოჩნდა, რომ მყესი სამ ადგილას იყო გაწყვეტილი, მუხლიდან აიღეს და დააკერეს. პლუს ამას კოჭი იყო დაწიანებული.

- ასეთ მდგომარეობაში რამდენი ხანი იყავით?

- 2 თვე. სამკურნალო კი ვიყავი, მაგრამ ახალგაზრდულ ნაკრებში გამომიძახეს, რომელიც შვეიცარიასთან პრინციპულ თამაშს ატარებდა და მისი გამოტოვება არ მსურდა.

- უცნაურია, რომ ამ თამაშში ჯარიმიდან გოლიც გაიტანეთ. ასეთ მდგომარეობაში მყოფმა როგორ ითამაშეთ?!

- მაშინ არც ვიცოდი, რომ ტრავმა ასეთი გართულებული იყო. შვეიცარიასთან შეხვედრის შემდეგ მივხვდი, რომ ასე გაგრძელება აღარ შეიძლებოდა და მკურნალობა დავიწყე. აღმოჩნდა, რომ საოპერაციო ვიყავი. მდგომარეობა რომ გართულდა, მერე მყესი გაწყდა, კოჭი დაზიანდა... ექიმმა რომ ნახა, გაუკვირდა, ასე მოედანზე როგორ გადიოდიო?!

პროგრამა-მინიმუმი

- მოედანს როდის დაუბრუნდებით?

- თაბაშირს ერთ კვირაში მომხსნიან. მერე იქნება რამდენიმე პროცედურა და შემდეგ დაიწყება რეაბილიტაცია. სავარაუდოდ, სამ თვეში, მაქსიმუმ თებერვლის ბოლოს ვითამაშებ. სრულფასოვან დაბრუნებასა და სრულ გამოჯანმრთელებას ვგულისხმობ.

- თქვენს კარიერაზეც ვილაპარაკოთ. თურქეთში გადასვლის შემდეგ ძირითადი შემადგენლობის ფეხბურთელი გახდით, იყო შემთხვევა, სამი საგოლე გადაცემაც გააკეთეთ ერთ მატჩში. წესით, კმაყოფილი უნდა იყოთ...

- კმაყოფილებაზე ლაპარაკი ნაადრევია, სანამ იმ დონეზე არ ვითამაშებ, როგორც მე მინდა. მაგრამ ამ ეტაპზე ჩემთვის პროგრამა-მინიმუმი სათამაშო პრაქტიკის მიღება და ფორმის აღდგენა იყო. პორტუგალიიდან ამის გამო წამოვედი და თურქეთის მეორე ლიგის გუნდში გადასვლაზე დავთანხმდი. ახლა ტრავმამ ხელი შემიშალა, მაგრამ მანამდე ყველა თამაშს ვატარებდი, რაც  ჩემთვის მთავარი იყო. ანუ "ადანაში" რის გამოც გადავედი, იმ მიზანს მივაღწიე.

ევროზე გასვლის შანსი მაინც დაგვრჩა...

- საინტერესოა თქვენი აზრი იმ ორ მატჩზე, რომელიც საქართველოს ახალგაზრდულმა ნაკრებმა თქვენს გარეშე ჩაატარა...

- ყველა დამაბრკოლებელი ფაქტორის გათვალისწინებით, მიმაჩნია, რომ ბიჭებმა და მწვრთნელებმა ძალიან მაგარი თამაშები ჩაატარეს. ეს ის თამაში იყო, რასაც მატჩებამდე ვგეგმავდით. ცეცაძე მაგარი ტაქტიკოსია, თამაშის "დადგმა" იცის, თამაშის მიმდინარეობის სცენარს წინასწარ წერს და მეტოქეებს ამას ვუპირისპირებთ. სამწუხაროდ, შედეგი სახარბიელო არ იყო და ორივე თამაში წავაგეთ. რა იყო მიზეზი, ეს ყველამ ვიცით და საკუთარი თვალით ვიხილეთ.

ჩვენ მოგება გვსურდა, მათ შორის, საფრანგეთთანაც კი. მაგრამ მთავარი ისაა, რასაც ბიჭები ამ თამაშის შემდეგ იგრძნობენ - ბრძოლა ნებისმიერ მეტოქესთან შეიძლება, მათ შორის, საფრანგეთთანაც, რომელიც ცნობილი კლუბების ფეხბურთელებით იყო დაკომპლექტებული.

- საფრანგეთი, შვეიცარია და სლოვაკეთი დაწინაურდნენ და, თქვენი აზრით, ევროპის ჩემპიონატზე გასვლის შანსი კიდევ დაგვრჩა?

- შანსი მაინც გვაქვს, რადგან ახლა საშინაო შეხვედრებს ჩავატარებთ და თუ იმას გავითვალისწინებთ, რა სულისკვეთებაა გუნდში და წინა მატჩებში რა ფეხბურთი ვაჩვენეთ, ეს რეალური მიზანია. ფაქტია, რომ გია ცეცაძის ხელში ამ გუნდს დიდი პერსპექტივა აქვს. ყოველ თამაშზე მობილიზებულები გავდივართ და ყველასთან მოსაგებად ვიბრძვით.

ნაკრები გუნდურადაც კარგად გამოიყურება და ინდივიდუალურადაც კარგი ფეხბურთელებითაა დაკომპლექტებული. იმდენად ერთსულოვანი და მეგობრული ატმოსფეროა, შეკრებაზე ჩასვლა მიხარია. 5 მატჩი ჩავატარეთ, მათ შორის, 3 - გასვლაზე და წაგებული თამაშების შემდეგაც ვერ ვიტყოდი, რომ მეტოქე გვჯობდა. ეს სწორედ გია ცეცაძის დამსახურებაა.

გიას ადგილზე სხვა უკეთესად მოიქცეოდა?

- ნიტრაში მომხდარზე უკვე ბევრი ითქვა და დაიწერა. საინტერესოა, შენ რას ფიქრობ.

- კიდევ კარგი იქ არ ვიყავი, თორემ მეც გიას მსგავსი რეაქცია მექნებოდა. რომ გჩაგრავენ და თავზე ლაფს გასხამენ, ამის მოთმენა ძალიან ძნელია. გიას ყელში ამოუვიდა ის სარმები, რასაც ამ შესარჩევ ციკლში ჩვენი ნაკრების წინააღმდეგ იყენებდნენ. საფრანგეთში დაგვჩაგრეს და არაფერი - გავატარეთ. სლოვაკეთში კი რაც მასპინძლებმა იკადრეს, ეს თავზე დაფურთხება იყო და ეტყობა, ესეც უნდა გაგვეტარებინა. ბოლოს და ბოლოს, თავმოყვარეობა არ გვაქვს?! გია თავმოყვარე კაცია, ქვეყანა უყვარს და მისი შეურაცხყოფა ვერ მოითმინა.

- მაგრამ ჩხუბით ისევ თავად დაზარალდება...

- ცუდი იყო, რაც მოხდა... ახლა დასჯიან, ჩვენ კი მეტისმეტი არ უნდა მოგვივიდეს! მოდით, პირდაპირ ვთქვათ - ამ დაჩაგვრით და შეურაცხმყოფელი საქციელით, ორივე მატჩს ვგულისხმობ, საქართველოს უებნებიან, რომ არაფრად აგდებენ და მე არ ვიცი, გიას ადგილზე სხვა უკეთესად მოიქცეოდა? ისეთი ადამიანი არ არის, საქმის გამო საკუთარი თავის და ქვეყნის დამცირება აიტანოს. თუ ეს ახლა სირცხვილად ითვლება? შენს თავს და შენს ქვეყანას თუ პატივს არ სცემ, აბა რისთვის ცხოვრობ?!

- ადრეც გითქვამთ, რომ გია ცეცაძე არის ის მწვრთნელი, რომელთან მუშაობაც გიადვილდება...

- ახლაც გავიმეორებ: გიასთან მუშაობა არა მხოლოდ მიადვილდება, არამედ - მიყვარს. უბრალო და გახსნილი ადამიანია, შემიძლია მივიდე და უფროსი მეგობარივით დაველაპარაკო. შენიშვნასაც კი ადამიანურად იძლევა - მისი ასეთი დამოკიდებულების შემდეგ, მინდა, მეც ვასიამოვნო. ნდობისა და თანადგომისთვის კი მადლობას ჩემი თამაშით თუ გადავუხდი.

იმის თქმა რომ, სლოვაკეთის ინციდენტის გამო მწვრთნელი ჩვენ უნდა დავსაჯოთ, დიდი სისულელეა და ისეთი ხალხი ამბობს ამას, ვინც ვერ ერკვევა, ცეცაძემ გუნდი როგორ ააშენა. ცეცაძის გარეშე ჩვენს ახალგაზრდულ ნაკრებს ბევრი დააკლდება. ამ ადამიანს თუ ამ ერთი გამწარებით და მდგომარეობიდან გამოსვლის გამო მოუნდომებენ ჩამოწერას, ჩვენი სირცხვილი იქნება - ის სიხარული უნდა დავივიწყოთ, რომელიც მისმა ნაკრებებმა საქართველოს მოუტანეს?

ასე ხომ არ შეიძლება?! ევროპაში რაც იბრაჰიმოვიჩს უჩხუბია, ცეცაძე მასთან ახლოსაც ვერ მივა, მაგრამ ვინმეს აზრად მოსვლია, ზლატანი ფეხბურთიდან მოეკვეთა? მაინცდამაინც ჩვენ, ქართველებმა უნდა გადავაჭარბოთ ყველაფერში? ახლა ცეცაძეს მივარდნენ. კარგით, რა, ზედმეტები ნუ მოგვდის!..

2555
მკითხველის კომენტარები / 2 /
თეიმურაზ რეხვიაშვილი
1
ცეცაძე კარგი ადამიანიაო ამბობს არაბიძე და მეც მჯერა ეხლა დარჩა უმნიშვნელო რამ–მიხვდეს რომ ნინუა კვარაცხელია კოხრეიძე და დავითაშვილის ერთად და სწორად თამაშია საჭირო და არა მათი ნაწილობრივ იგნორირება რასაც მოყვა სამივე წაგება.
თამაზი
0
ვეთანხმები გიორგი არაბიძეს, დავფიქრდეთ!!!!
მსგავსი ამბები
რუბრიკის სხვა სიახლეები
;