გიორგი ასანიძე: ლაშა ტალახაძეს მეტის მიღწევაც შეეძლო...

ორიოდე კვირის წინათ ალბანეთის ქალაქ დურესში, როგორც ვწერდით, ახალგაზრდა და 23-წლამდელ ძალოსანთა ევროპის ჩემპიონატში ქართველმა ათლეტებმა სხვადასხვა სინჯის 27 მედალი მოიპოვეს. ამ სპორტსმენებმა (ანასტასია გოტფრიდის გარდა) გასულ უქმეებზე დუშეთში საქართველოს ჩემპიონატში იასპარეზეს.

მათმა უმრავლესობამ ევროპაზე ნაჩვენები შედეგები გააუმჯობესა. უფროსებში საქართველოს ხუთი (ლაშა ტალახაძე - 2, შოთა მიშველიძე - 3) და ახალგაზრდებში ორი რეკორდი (რევაზ დავითაძემ) დამყარდა.

განსაკუთრებით ტალახაძის მიღწევები (ატაცში 220, ორჭიდში 474 კგ) უნდა აღინიშნოს, რადგან მის მიერვე დამყარებულ მსოფლიოს რეკორდებს ეს შედეგები, შესაბამისად, სამი და ერთი კილოთი აჭარბებს.

ითქვა და გავიმეორებთ, საქართველოს ჩემპიონატს ის სტატუსი არ აქვს, რომ აქაური მიღწევები მსოფლიოს რეკორდად აღიარონ, რადგან მას უცხოელი საერთაშორისო არბიტრები არ ესწრებიან.

აღსანიშნავია ისიც, რომ შეჯიბრებაში პირველად მონაწილეობდა უკრაინელი სპორტსმენი ანტონ პლესნოი (94კგ), რომელმაც საქართველოს მოქალაქეობა ორი თვის წინ მიიღო. ფიცარნაგზე არ გამოსულა ოლიმპიური პრიზიორი ირაკლი თურმანიძე (+105 კგ), რადგან იგი ახალმოშუშებული ტრავმის გამიზეზებას მოერიდა.

სინკლერის ცხრილით (საკუთარი წონის კოეფიციენტის ნამრავლი ორჭიდის ჯამზე) პირველ-მეექვსე ადგილებზე გავიდნენ: 1. ლაშა ტალახაძე (474,7 ქულა), 2. გიორგი ჩხეიძე (423,3), 3. ანტონ პლესნოი (422), 4. რევაზ დავითაძე (419,3), 5. შოთა მიშველიძე (419,1), 6. დავით ხეცურიანი (412,5).

გამარჯვებულები და პრიზიორები საქართველოს პრეზიდენტმა გიორგი მარგველაშვილმა, ძალოსნობის ეროვნული ფედერაციის თავკაცმა, სამგზის ოლიმპიურმა ჩემპიონმა კახი კახიაშვილმა და ოლიმპიური თამაშების გამარჯვებულმა და მსოფლიოს ჩემპიონმა, საქართველოში სომხეთის საგანგებო და სრულუფლებიანმა ელჩმა იურიკ ვარდანიანმა დააჯილდოვეს.

გიორგი ასანიძე, საქართველოს ძალოსანთა ნაკრების მთავარი მწვრთნელი, ოლიმპიური ჩემპიონი:

"საქართველოს ჩემპიონატმა უმაღლეს დონეზე ჩაირა. რაც შეეხებათ სპორტსმენებს, თითოეულმა მათგანმა ამ ეტაპისთვის შესაძლებლობის მაქსიმუმი აჩვენა. ტურნირზე დამყარებული ათამდე რეკორდიც ამის შედეგია.

განსაკუთრებით ლაშა ტალახაძის მიღწევა უნდა გამოვყო. მას მეტის მიღწევაც შეეძლო, მაგრამ ზედმეტ რისკს მოვერიდეთ, რადგან 3-5 დეკემბერს ამერიკულ ანაჰაიმში მსოფლიოს ჩემპიონატი გვაქვს და იქ უნდა ვიბრძოლოთ მწვერვალების დასაპყრობად.

კარგი შედეგები აჩვენეს ახალგაზრდა სპორტსმენებმა - შოთა მიშველიძემ და რევაზ დავითაძემ, რომლებსაც ლაშა ტალახაძესთან, ირაკლი თურმანიძესა და ანასტასია გოტფრიდთან ერთად ამერიკაში მსოფლიოს ჩემპიონატზე წავიყვანთ. ამის საბაბსა და საშუალებას, უპირველესად, მათი შედეგები და ისიც გვაძლევს, რომ ამ პირველობაზე დისკვალიფიკაციის გამო რამდენიმე ქვეყნის წარმომადგენლები ვერ იასპარეზებენ.

მსოფლიომდე დუშეთში ვივარჯიშებთ და ხარვეზებს გამოვასწორებთ, რომ ამერიკაში საქართველოს ჩემპიონატზე უკეთესი შედეგები ვაჩვენოთ".

კვარცხლბეკი
56 კგ: 1. გოდერძი ბერდელიძე (საჩხერე)- 225 (105+120), 2. ზვიად სამუკაშვილი (თბილისი)- 211 (92+119), 3. ზაზა ფუტკარაძე (აჭარა)- 188 (88+100).
62 კგ: 1. შოთა მიშველიძე (ქუთაისი)- 294 (137+157), 2. რამინ შამილიშვილი (აჭარა)- 266 (120+146), 3. გურამ გიორბელიძე (ქუთაისი)- 247 (110+137).
69 კგ: 1. გოგა ჩხეიძე (ზუგდიდი)- 297 (132+165), 2. კახი ასანიძე (თბილისი)- 274 (115+159), 3. თორნიკე თოდაძე (საჩხერე)- 273 (120+153).
77 კგ: 1. გიორგი ლომთაძე (ქუთაისი)- 295 (135+160), 2. ვახტანგ ვეკუა (ზუგდიდი)- 291 (136+155), 3. არჩილ მალაყმაძე (აჭარა, ოლიმპიური მზადების ცენტრი))- 283 (131+152).
85 კგ: 1. რევაზ დავითაძე (თბილისი)- 351 (161+190), 2. ლომია თებიძე (აჭარა)- 297 (132+165), 3. ბეგლარ სოლომონიძე (აჭარა),- 283 (128+155).
94 კგ: 1. ანტონ პლესნოი (თბილისი)- 368 (170+198), 2. ნოდარ კაკაბაძე (ქუთაისი)- 326 (148+178), 3. ირაკლი ჯალაღონია (ზუგდიდი)- 320 (140+180).
105 კგ: 1. დავით ხეცურიანი (ქუთაისი)- 378 (171+207), 2. ირაკლი ჩხეიძე (ზუგდიდი, ომც)- 365 (165+200), 3. თორნიკე კოკაია (ზუგდიდი)- 360 (160+200).
+105 კგ: 1. ლაშა ტალახაძე (საჩხერე)- 474 (220+254), 2. გიორგი ჩხეიძე (ზუგდიდი)- 411 (186+225), 3. ბაქარ თურმანიძე (აჭარა, ომც)- 340 (155+185).
გუნდური: 1. ქუთაისი, 2. ზუგდიდი, 3. აჭარა.

(იბეჭდება მცირე ცვლილებით)
ყოველდღიური სპორტული გაზეთი "ლელო"
2679
მკითხველის კომენტარები / 0 /
მსგავსი ამბები
რუბრიკის სხვა სიახლეები