გიორგი ასანიძე: არ დაიჯერებთ და... მინდა კოსმოსში გავფრინდე

სახელი: გიორგი

გვარი: ასანიძე

დაბადების თარიღი და ადგილი: 30 აგვისტო, 1975 წელი. საჩხერე.

ზოდიაქოს ნიშანი: ქალწული.

ოჯახური მდგომარეობა: დაოჯახებული, მრავალშვილიანი მამა.

პროფესია: პედაგოგ-მწვრთნელი და ეკონომისტი.

პოლიტიკური შეხედულებები: ჩემი პოლიტიკური შეხედულება სამშობლოს სიყვარულია და ესაა ჩემი მთავარი ამოცანა - ვიყო ჯარისკაცი, კიდევ ჯარისკაცი და კიდევ ჯარისკაცი!

სამაგალითო, მისაბაძი სპორტსმენი: უამრავი სპორტსმენია, რომელთა მაგალითზეც გავიზარდეთ, თუმცა, ძალოსნობაში ისეთი გენიალური სპორტსმენი გვყავს, როგორიცაა ჩვენი ფედერაციის პრეზიდენტი - კახი კახიაშვილი და არ შეიძლება თანამედროვე ძალოსნობაზე საუბრისას, სხვა ალტერნატივა გქონდეს. თუმცა, ჩვენ ვიზრდებოდით მაგალითზე, სადაც არაერთი საამაყო ოლიმპიური ჩემპიონი იყო, მათდამი ჩემი ღრმა პატივისცემა მინდა გამოვთქვა.

სპორტული დებიუტი: ძალოსნობა საჩხერეში ათწლეულების წინ განვითარდა და ძალიან პოპულარული იყო, დარბაზი ჩემი სახლიდან სულ რაღაც ოც მეტრში მდებარეობდა და დიდი ბიჭების ვარჯიშს რომ ვუყურებდი, წარმატებით გამოწვეულ სიხარულსა და ყიჟინას, ამან ჩემზეც იქონია გავლენა. ხასიათიდან გამომდინარეც, ინდივიდუალურ სახეობაში მეტს მივაღწევდი. პროფესიონალურად ვარჯიში 12 წლიდან დავიწყე და პირველი წარმატება საქართველოს ჩემპიონატში ასაკობრივ შეჯიბრებაში გამარჯვება იყო, ბედნიერი ვიყავი. შემდეგ კი ამას საერთაშორისო გამოსვლები მოჰყვა.

   ⇒სოფიო შაფათავას ბლიც-პოინტი: მომწონს დიკაპრიო, მძულს ხაში

ოლიმპიური ჩემპიონობა: ჩემი ცხოვრების ყველაზე მნიშვნელოვანი დღე სწორედ 2004 წლის 21 აგვისტო იყო, სადაც სპორტული კარიერის მაქსიმუმს მივაღწიე. დღესაც საამაყო და ტკბილად გასახსენებელი შეგრძნებაა.

მწვრთნელობა: 10 მაისს 5 წელი გახდება, რაც უფროს მწვრთნელად დამნიშნეს და მადლობა ყველა სპორტსმენს, ყველა იმ ადამიანს, ვინც ამ საქვეყნო საქმეს აკეთებს ჩემთან ერთად. ეს დიდი პასუხისმგებლობაა, იმაზე მეტიც, ვიდრე პირადი სპორტული კარიერა. მე მიხარია, რომ ამდენი კარგი სპორტსმენი გვყავს და მათ არაერთი მედალი მოუტანეს ჩვენს ქვეყანას. ლაშა ტალახაძის წარმატებამ კი ძალოსნების ისტორია შეცვალა. არ შემიძლია არ აღვნიშნო სხვა ბიჭები - თურმანიძე, მიშველიძე, დავითაძე და სხვები. ყველას დიდი მადლობა, რომ ჩვენს ქვეყანას ასახელებენ! წინ ახალი გამარჯვებებისკენ! რომ არა ძალოსნობა, შეიძლებოდა ვყოფილიყავი: ექიმი. თუმცა, ისტორიას ვერ შევცვლით და ისევ ძალოსანი ვიქნებოდი, ოღონდ ალბათ უფრო კარგი (იცინის).

ტრადიცია შეჯიბრებაზე გასვლის წინ: რაიმე აკვიატებული ჩვევა არ მაქვს, თუმცა, გასვლის წინ გარკვეული ემოციები, ნერვოზული გადახრები მაინცაა, "წიკების" მაგვარი. "განსაკუთრებული რიტუალი" ალბათ საქმის სიყვარული და ღმერთის რწმენაა.

მავნე ჩვევა: ბევრია, ნებისმიერ ადამიანს აქვს და გამონაკლისი არც მე ვარ.

გამარჯვებით მიღებული ემოცია: სიამაყე, რომელიც გრძელდება.

ცხოვრებისეული შეცდომა: ყოფილა ასეთიც. ამ გადასახედიდან, სხვანაირად მოქცევაც შეიძლებოდა, თუმცა, მერე ვეღარაფერს შეცვლი. მე რომ რაიმეს შეცვლა შემეძლოს, იმ ტრაგედიებს შევცვლიდი, რომლებიც ჩემს ცხოვრებას უკავშირდება. მადლობა იმ შეცდომებს, რომლებმაც სწორი გზა მიჩვენა.

დაუვიწყარი მომენტი: ბევრი მომენტი ყოფილა ცხოვრებაში, რომელიც სიხარულით არ დამვიწყებია და რომელიც ტრაგედიით არ მავიწყდება. თუმცა, მაინც, კადრი, რომელიც ჩემს მეხსიერებაში პოზიტიურად აღიქმება ეს 2004 წლის 21 აგვისტოს დღეა.

ოჯახი და შვილები: ჩემთვის ყველაფერია!

თავისუფლება ჩემთვის არის: თავისუფლებაა, შეუზღუდავი. თუმცა, თავისუფლებას მოვალეობაც რომ მოჰყვება, ეს არ უნდა დაგვავიწყდეს.

მაღიზიანებს ადამიანი, რომელიც: ხშირად მატყუებს. ხანდახან შეიძლება მომატყუოს, მაგრამ თუ ამის მცდელობა ხშირადაა, მერე უკვე ძალიან ვღიზიანდები.

ადვილად ტყუვდებით:  ვერ ვიტყვი. კარგი ინტუიცია მაქვს და ვხვდები, როდის მატყუებენ ან როდის შემიძლია მოვიტყუო თავი.

მომიტყუებია: ისეთი ტყუილი არასდროს მითქვამს, რომ ჩემით ვინმეს რაიმე ზარალი მიადგეს, წვრილმანი ტყუილი კი ალბათ ყველას გვითქვამს.

ვკამათობ, როცა: უსამართლობაა. გამოდის, რომ ხშირად მიწევს (იცინის).

მეშინია: ამქვეყნიურად ნაკლებად მეშინია რაიმესი.

ბავშვობისას მიყვარდა: კარგი გოგონები (იცინის) და ბევრი რამ, კარგი იყო ბავშვობა, ბევრი ტკბილი მოგონება მაქვს.

საყვარელი თამაში: ბავშვობისას ყველანაირი თამაში მიყვარდა. 80-იან წლებში ფეხბურთი მაინც განსაკუთრებით პოპულარული იყო და მეც ხშირად ვთამაშობდი. თუმცა, როგორც სპორტსმენი, მძლეოსნობას დიდ პატივს ვცემ, ყველასთვის აუცილებელია და აქ არის ჩვენი ქვეყნის სისუსტე, რომ ვერ განვავითარეთ ისე, როგორც საჭიროა. ჯანსაღი ცხოვრების წესი უნდა დავნერგოთ და სწორად განვავითაროთ. ამისი მზაობა არის. კარგი სპორტული ბაზები თუ გვექნება, საქართველოს დიდი პოტენციალი აქვს.

სასმელი: ბოლო ოთხი წელიწადია ძალიან იშვიათად ვსვამ, ადრე უფრო მიწევდა, დეპუტატობის პერიოდში.

განტვირთვის საუკეთესო საშუალება: დარბაზში ყოფნა, აქ ბევრად საღი და პოზიტიური ვარ.

ხელოვნება: მხატვრობა მომწონს, მუსიკა, ქართული სიმღერა, ხშირად ვუსმენ და დიდ პატივს ვცემ.

ჰობი: არ დაიჯერებთ და მინდა, რომ კოსმოსში გავფრინდე (იცინის). გალაქტიკური თემები მაინტერესებს.

უახლოესი გეგმები: მსოფლიო ჩემპიონატი! რომელიც ოქტომბრის ბოლოს, ნოემბრის პირველ დეკადაში აშხაბადში გაიმართება, სადაც ინდივიდუალური ლიცენზიების ქულების მოპოვება დაიწყება. ჩვენი სპორტსმენები კარგ ფორმაში იქნებიან და მაქსიმალურად შევეცდებით, კარგი ადგილებისთვის იბრძოლონ. მანამდეც ბევრი შეჯიბრება და ჩემპიონატია დაგეგმილი და ჩვენ ყველგან აქტიურ მონაწილეობას მივიღებთ. მთავარი აქცენტი კი მსოფლიოს ოლიმპიურ თამაშებზე გვაქვს გადატანილი. ჩვენი გულშემატკივრის იმედები ბოლომდე უნდა გავამართლოთ. მინდა, დიდი მადლობა გადავუხადო ჩვენი ფედერაციის ხელმძღვანელობას, რომ ძალიან მოკლე პერიოდში შევძელით დიდი ბორბლის გადატრიალება, რომელმაც უნდა იბრუნოს და წარმატებისკენ იაროს. მადლობა სახელმწიფოს, ყველა იმ ადამიანს, ვინც გვასპონსორებს და მხარში გვიდგას.

თამთა დადეშელი

1847
მკითხველის კომენტარები / 0 /
მსგავსი ამბები
რუბრიკის სხვა სიახლეები