გიორგი განუგრავა ბათუმის "დინამოს" ფეხბურთელი გახდა

11 იანვარს "სამტრედიაში" ჩარიცხული გიორგი განუგრავა ამ კლუბის ფეხბურთელი აღარ არის - ეს ინფორმაცია ფეხბურთელმა დაგვიდასტურა.

"იყო გარკვეული პრობლემები და კონტრაქტი ორმხრივი შეთანხმებით გაწყდა. საბოლოოდ, მე და ლობჟანიძე გუნდიდან წამოვედით", - ამბობს განუგრავა, რომელსაც ხელშეკრულების მიხედვით, სამტრედიაში 2018 წლის ბოლომდე უნდა ეთამაშა.

ინფორმაცია კლუბმაც გაავრცელა: "22 მარტს გიორგი განუგრავა "სამტრედიას" რიგებს ოფიციალურად გამოეთიშა. კლუბსა და ნახევარმცველს შორის ურთიერთშეთანხმების საფუძველზე გიორგი განუგრავა "სამტრედიას" რიგებში აღარ ირიცხება".

ამასობაში, ბათუმის "დინამოს" ცნობით, განუგრავა აჭარულ კლუბს თავისუფალი აგენტის სტატუსით შეურთდა და 2-წლიან კონტრაქტსაც მოაწერა ხელი.

არ დადასტურებულა ინფორმაცია, თითქოს, "სამტრედიასთან" ხელშეკრულება უჩა ლობჟანიძემაც გაწყვიტა. შევიტყვეთ, რომ საქართველოს ნაკრების მცველს კონტრაქტი არ გაუწყვეტია. ის კლუბს 14 თებერვალს, თურქულ შეკრებაზე შეუერთდა. მანამდე, ლობჟანიძე ყაზახეთის "ატირაუში" თამაშობდა.

განუგრავამ მიზეზების დაკონკრეტება არ ისურვა. მან კომენტარი არც იმ გავრცელებულ ხმაზე გააკეთა, თითქოს, "სამტრედიასთან" კონტრაქტის გაწყვეტის მიზეზი კოტდივუარელ ინტერს გიისთან კონფლიქტი იყო, ახალი კლუბის ვინაობა კი დაგვიდასტურა:

"რა მოხდა, ვის ვისთან რა შეემთხვა და რატომ წამოვედი, ამაზე ლაპარაკი უკვე უადგილოა. მთავარია, ერთმანეთს ცივილიზებულად დავშორდით და ჩემს კარიერაში "სამტრედიას" პერიოდი დასრულდა. ახალ კლუბში გადავედი და ახლა უკვე მასზე ვფიქრობ. რამდენიმე კლუბი დამიკავშირდა და საბოლოოდ, ბათუმის "დინამოში" გია გეგუჩაძესთან თამაში ვარჩიე".

შეგახსენებთ, რომ ინტერს გიის თბილისის "დინამოსთან" ეროვნული ლიგის მე-3 ტურის ცენტრალური შეხვედრაში არ უთამაშია, მეტიც - ის ვერც განაცხადში მოხვდა. არადა, 24 წლის კოტდივუარელ ფეხბურთელს წინა ტურში ბოლნისის "სიონთან" არც ტრავმა მიუღია და არც დისკვალიფიკაცია ჰქონდა. "სამტრედიას" მთავარი მწვრთნელის, უჩა სოსიაშვილის თქმით, ეს მისი გადაწყვეტილება იყო, თუმცა ამჟამად პრობლემა მოგვარებულია.

განუგრავა "სამტრედიას" საკვანძო მოთამაშე იყო. ამას ემატება მაიკლ ოლაიტანის არყოფნაც. ბოლნისის "სიონთან" შეხვედრისას ნიგერიელმა თავდამსხმელმა ფეხი მოიტეხა, ოპერაცია დასჭირდა და "სამტრედიას" მაისის ბოლომდე ვერ დაეხმარება. ასე რომ, "სამტრედიას" სერიოზულ საკადრო პრობლემებთან მოუწევს გამკლავება.

ყოველდღიური სპორტული გაზეთი "ლელო"
1377
მკითხველის კომენტარები / 0 /
მსგავსი ამბები
რუბრიკის სხვა სიახლეები
;