გიორგი გოგოლაშვილი: 29 გოლი ლატვიაში და ორი ახალი გუნდის ვარიანტი

21 წლის ქართველმა ფორვარდმა გიორგი გოგოლაშვილმა ლატვიის პირველ ლიგაში ზედიზედ მეათე ტურში გაიტანა.

"სუპერნოვას" ფორვარდმა ჯერ თავისი ყოფილი გუნდი, რიგის "სკონტო" დაამწუხრა 3:0 (გოლი და საგოლე პასი), ბოლო ტურში კი "ალბერტსის" განადგურებაში (8:0) 3 გოლითა და 2 საგოლე გადაცემით ლომის წილი დაიდო.

საბოლოოდ, სუპერნოვამ 56 ქულა დააგროვა და ლიდერ "დაუგავპილსს" 5 ქულით ჩამორჩა. ამის შემდეგ ლატვიის პირველი ლიგის პირველი 4 გუნდი პლეი ოფში თამაშობს და დაგროვილი ქულები თან გადაჰყვათ. გოგოლაშვილმა არც პლეი ოფის პირველი მეტოქე "ტუკუმს 2000" დაინდო: 3:0-ზე დუბლი და ერთი საგოლე პასი მიითვალა. პლეი ოფის კიდევ ორი თამაშია დარჩენილი და მალე გადაწყდება, ლატვიის ვირსლიგაში (უმაღლესი) რომელი ორი გუნდი გადავა.

გოგოლაშვილი 16 თამაშში გატანილი 29 გოლით ბომბარდირთა სიაში მეორე ადგილზეა "დაუგავპილსის" 34 წლის აზერბაიჯანელი ვეტერანის, ვუგარ ასკეროვის (30 გოლი) შემდეგ, თუმცა აზერბაიჯანელმა 7 თამაშით მეტი ჩაატარა.

აღსანიშნავია, რომ ყველა ბოლო თამაშში გოგოლაშვილი მატჩის საუკეთესო მოთამაშედ აღიარეს, ლატვიის ფეხბურთის ფედერაციამ სექტემბრის თვის საუკეთესო ფეხბურთელადაც დაასახელა და საგანგებო პრიზიც გადასცა. ამის აღსანიშნავად სპორტულმა არხმა "სპორტასცენტრსმა" გოგოლაშვილთან სატელევიზიო ინტერვიუ ჩაწერა.

რა დასამალია და, თავიდან მის ამბავს სკეპტიკურად ვუყურებდით, რადგან დაბალ ლიგაში თამაშობდა. მაგრამ 29 გოლი 16 თამაშში ნებისმიერ შემთხვევაში მშვენიერი შედეგია და წესით, ეს ტანმაღალი გოლეადორი ახალგაზრდული ნაკრებისთვის უინტერესო არ უნდა იყოს. საინტერესოა, რომ მისით ლატვიის და პოლონეთის უმაღლესი ლიგების რამდენიმე გუნდი დაინტერესდა და, დიდი ალბათობით, სეზონის ბოლოს (ლატვიაში ახლა მთავრდება) ახალ გუნდში ვიხილავთ.

ყოველდღიური სპორტული გაზეთი "ლელო"
1105
მკითხველის კომენტარები / 1 /
gg
0
მოვიწვიოთ მერე ეს ახალგაზრდა კაცი ნაკრებში, სურ არაფერს არ ჯობია? სანამ ჩვენი თავდამსხმელები მკურნალობენ შეიძლება გასინჯვა
მსგავსი ამბები
რუბრიკის სხვა სიახლეები
;