გიორგი დევდარიანი: თურმე, მე დამინგრევია ქართული ფეხბურთი!..

საქართველოს ნაკრების შემადგენლობას რომ გადახედო, თვალში გეცემა იმ ფეხბურთელთა სიმრავლე, რომლებსაც სხვადასხვა დროს გიორგი დევდარიანის ხელში გაუვლიათ. დევდარიანს ვიცნობთ, როგორც წარმატებულ მწვრთნელს - ეს ეხება როგორც ბავშვთა ფეხბურთს, ისე პროფესიულ დონეს.

ძალიან ძნელია, საქართველოში იპოვო სპეციალისტი, თანაც ოთხი შვილის მამა, რომელსაც ოჯახი სახლიდან გაეშვას და... გუნდისთვის შეკრება საკუთარ სახლში მოეწყოს. ასევე, ან სადღაც საამქროში დაემზადებინოს სპეციალური "კედელი" და თბილისის იმ ეზოებში მიეტანოს, სადაც მისი შეგირდები ცხოვრობდნენ, ბიჭებს კარგად რომ ევარჯიშათ...

ფაქტია - ასეთი სპეციალისტი დღეს უმუშევარია. არადა, მისი აღზრდილი ფეხბურთელები ძალიან თავისებური, ტექნიკური მანერით გამოირჩევიან. სხვადასხვა დროს მათ დევდარიანის მეშვეობით შეაღეს დიდი ფეხბურთის კარი - ვაკო ყაზაიშვილმა, გიორგი ჭანტურიამ, დავით ხოჭოლავამ, გოჩა ხოჯავამ, სანდრო იაშვილმა... სხვებმაც.

ის საინტერესო მოსაუბრეცაა. გუშინ "ლელომ" დევდარიანთან ინტერვიუ ჩაწერა...

- ჩვენს ბოლო ინტერვიუში ილაპარაკეთ საინტერესო პროექტზე. გსურდათ, კიდევ ერთხელ შეგეკრიბათ ნიჭიერი ბავშვები და მათთვის დიდ ფეხბურთში შესასვლელად გაგეწიათ დახმარება...

- სამწუხაროდ, ამ საქმიდან არაფერი გამოვიდა, არანაირი ინტერესი არ ყოფილა. სახლში ჯდომას არ ვარ მიჩვეული. შეიძლება ითქვას, კარდაკარ ვიარე, მაგრამ ვერ ვნახე ვერანაირი ინტერესი. ასეთია ვითარება ამჟამად.

- ახლა ბავშვებსაც აღარ ავარჯიშებთ?

- არა, აბსოლუტურად ჩამოშორებული ვარ ფეხბურთს. სახლში ვზივარ...

- მართლაც პარადოქსია, ასეთი საინტერესო პროექტი ყურადღების გარეშე რომ დარჩა, თანაც, საჭირო იყო მხოლოდ მინიმალური დანახარჯები...

- რა გითხრათ... ფაქტია, ასე მოხდა. არ ვიცი, რა დავარქვა ამას. ის კი არა, არცერთ სკოლაში არ გამოჩნდა ჩემი ადგილი. ყველაფერს რომ თავი დავანებოთ, ბავშვთა ფეხბურთში ხომ მქონდა რაღაც შედეგი? რატომ ვარ ასეთი მიუღებელი, არ ვიცი. გამოდის, მე დამინგრევია ქართული ფეხბურთი.

- იმედია, თქვენი უქმობა დიდხანს არ გასტანს. ახლა საქართველოს ეროვნულ ჩემპიონატზე უნდა გკითხოთ. საით მივდივართ?

- მეც ჩვენი ფეხბურთის ნაწილი ვარ და, როგორ შეიძლება, ნიშნის მოგებით ვილაპარაკო. შარშანდელ ევროთასებზე რა მოხდა, ყველას კარგად გვახსოვს. პირველივე წრიდან გამოვარდა ყველა ქართული კლუბი.

მითხარით, ამაზე უარესი რა შეიძლება მოხდეს? ახლა ისევ გვიახლოვდება ევროთასები და ვისურვოთ, რომ ჩვენმა კლუბებმა კარგად ითამაშონ. ჩვენი საკლუბო ფეხბურთის მთავარი პრობლემა ის არის, რომ კლუბების ხელმძღვანელებს არ აქვთ განვითარების ერთწლიანი გეგმაც კი. ყველაფერი ხდება სპონტანურად.

არის 2-3 კლუბი, რომელსაც თითქოს აქვს ეს გეგმა და ისიც საკითხავია, აქვს თუ არა. მე ახლა მხოლოდ "საბურთალოზე" შემიძლია ვთქვა, რომ აქვთ ასეთი გეგმა.

გია ჭიაბრიშვილი სამი წლის განმავლობაში მუშაობს ამ გუნდში და მან დიდი შრომის ფასად, ამ ნდობის ფასად მიაღწია დღევანდელ სტაბილურობას. ყველა მწვრთნელს სჭირდება დრო იმისთვის, რომ მიაღწიოს შედეგს. ეს აქსიომაა.

- ცალკე პრობლემაც სწორედ ეს არის - მწვრთნელების ხშირი ცვლა...

- მე ჩემს აზრს პირდაპირ ვიტყვი: ძალიან ხშირად ვლაპარაკობთ იმაზე, რომ არ გვყავს შესაბამისი კვალიფიკაციის მწვრთნელები, ან ფეხბურთელები. რა თქმა უნდა, ამ მხრივ არის პრობლემები, მაგრამ, რაც ხდება ჩვენი კლუბების მენეჯმენტში, ეს არის სრული სიბნელე და იმის იქით საერთოდ არაფერი აღარ არის.

მე არ ვამბობ, რომ უნაკლო ვარ. ვინც მუშაობს, ის ცდება კიდეც, მაგრამ თქვენი გაზეთის საშუალებით მინდა პირდაპირ ვთქვა - თუ ვინმე გამოვა და იტყვის, რომ გიორგი დევდარიანმა ოდესმე ერთი თამაში მაინც გაყიდა, ან რომელიმე ნიჭიერი ბავშვი დაჩაგრა, ავდგები და იმ წუთშივე სამუდამოდ წავალ საქართველოდან. ნაკლებად მესმის იმ ხალხის მოტივაცია, ვინც ქართულ ფეხბურთში საკუთარ ფულს ხარჯავს.

რაც შეეხება იმათ, ვინც სახელმწიფო ფულზეა დამოკიდებული, მათთვის მთავარია, ვთქვათ, ერთი წელი კარგად გადააგორონ. საერთოდ არ იყურებიან წინ...

ჩვენ, მწვრთნელებს, გვინდა, რომ ფეხბურთელებს ინსტინქტების დონეზე ჩავუნერგოთ ის დავალებები, რომლებიც მათ უნდა შეასრულონ მინდორზე. როცა ფეხბურთელი იღლება, ითიშება, მაშინ ირთვება ეს ინსტინქტები და ხდება გადამწყვეტი. ექვსი თვე და თუნდაც ერთი წელი არ ჰყოფნის ამ ინსტინქტების ჩაწერას, ამას, სულ მცირე, 3-4 წელი მაინც უნდა.

ახალი მწვრთნელი თავის ინსტინქტებს რომ უნერგავს ფეხბურთელს, ეს წამში არ ხდება. ჯერ ძველი უნდა წაიშალოს... სრული პასუხისმგებლობით ვამბობ - სადაც 3-4 წელი მაცალეს, ყველგან დავდე შედეგი, ასეთი რამ კი ჩემს კარიერაში სულ ორჯერ მოხდა.

პირველად, ეს იყო "ოლიმპისა" და "თბილისის" პერიოდი და მერე "საბურთალოს" დროს... წეღან ტყუილად არ ვახსენე დროის ფაქტორი. თუნდაც, სპრინტების და დაგეგმილი კომბინაციების რაოდენობა სტანდარტს რომ მიუახლოვდეს, ამასაც დრო სჭირდება.

"ლოკომოტივში" მესამე და მეოთხე წრეში 9 გოლი გავიტანეთ დაგეგმილი კომბინაციების შედეგად. ახლა "ლოკომოტივს" ახალი მწვრთნელი ჰყავს და წარმატებებს ვუსურვებ მას. უბრალოდ, ისევ იმას ვუბრუნდები - სანამ თავის ინსტინქტებს ჩაწერდეს ფეხბურთელების თავში, მან ჩემ მიერ ჩაწერილი ინსტინქტები უნდა ამოშალოს მოთამაშეებიდან. ამას ხომ დრო სჭირდება.

ჩვენს საკლუბო ფეხბურთში ძალიან ხშირად იცვლებიან მწვრთნელები და ამიტომაცაა, ნულოვან სართულს რომ ვერ ვცდებით... მართლა არ ვიცი, რატომ გამიშვეს "ლოკომოტივიდან".

მქონდა სამწლიანი პროგრამა, რომელიც ვერ დასრულდა. არ ვიცი, როგორ შეიძლება გაამტყუნო ის მწვრთნელი, რომელიც გუნდისთვის შეკრებას ითხოვს. ეს ხომ წარმატების ერთ-ერთი მთავარი საფუძველია.

ზოგადად, დღევანდელ საქართველოში მწვრთნელის შერჩევის კრიტერიუმი არის არა მისი კვალიფიკაცია, არამედ ის, თუ რამდენად დაბალ ხელფასზე თანხმდება მუშაობას. ასეთი მიდგომით რაიმე წარმატებაზე ფიქრი გამორიცხულია. ცუდადაც რომ მემუშავა "ლოკომოტივში", თუნდაც ადამიანური თვალსაზრისით უნდა გაეგოთ ჩემთვის, რადგან მე არ წავედი თელ-ავივში მაშინ, როცა შოთა არველაძე მეძახდა.

ახლა გამოჩნდა, რომ უპატიებელი შეცდომა დავუშვი. ადამიანური მომენტებიც ხომ უნდა იყოს გათვალისწინებული? მაშინ მე ვფიქრობდი, რომ მომეცემოდა დრო ჩემი პროექტის ბოლომდე მისაყვანად, მაგრამ ასე არ მოხდა. ბევრი ქართველი მწვრთნელი დგება იმ პრობლემის წინაშე, რასაც ჰქვია "დროის დეფიციტი".

- დასაკომპლექტებელია საქართველოს ასაკობრივი ნაკრებების სამწვრთნელო შტაბები. ფეხბურთის ფედერაციიდან ხომ არავინ შეგხმიანებიათ?

- ბოლო რამდენიმე დღის განმავლობაში მიმდინარეობს ასეთი სახის კონსულტაციები და ვნახოთ, რა და როგორ იქნება. შევხვდებით, ისინი თავიანთ პოზიციას დააფიქსირებენ, მე - ჩემსას. ერთი ზუსტად ვიცი, რომ ფეხბურთის გარეშე ცხოვრება არ შემიძლია...

ყოველდღიური სპორტული გაზეთი "ლელო"
1734
მკითხველის კომენტარები / 0 /
მსგავსი ამბები
რუბრიკის სხვა სიახლეები