გიორგი დევდარიანმა 'ტორპედოს' აკადემია ჩაიბარა - პლუს ორი ლეგიონერი

ქუთაისის "ტორპედოში" ბოლოხანს ხმაურიანი და საინტერესო ამბებია.

კლუბში მოსვლის შემდეგ, ზაზა ჩაჩავამ ერთ-ერთ პრიორიტეტად ძლიერი საფეხბურთო აკადემიის ჩამოყალიბება დაასახელა. საამისოდ სერიოზული ნაბიჯი გადაიდგა - როგორც ვწერდით, "ტორპედოს" აკადემიის დირექტორად დაინიშნა გიორგი დევდარიანი, რომელსაც ბავშვებთან მუშაობის დიდი გამოცდილება აქვს.

მთავარ მწვრთნელად მუშაობდა საქართველოს 17 და 19-წლამდელთა ნაკრებებში, ასევე "თბილისში", "საბურთალოს" აკადემიაში, თბილისის "დინამოში", "ლოკომოტივსა" და გორის "დილაში".

"მინდოდა, ისევ ბავშვთა ფეხბურთში მემუშავა და მეკეთებინა ის, რაც კარგად გამომდის. ძალიან გამიხარდა, "ტორპედოდან" რომ დამიკავშირდნენ და შემომთავაზეს აკადემიის აწყობის იდეა, რომელსაც, თამამად ვიტყვი, პრეტენზია ექნება, რეგიონში იყოს ლიდერი თავისი მეთოდიკით, აღჭურვილობით, დაგეგმილი მუშაობით.

ხელმძღვანელობას ველაპარაკე და ჩემი ხედვები გავაცანი. ჩემთვის მნიშვნელოვანია, ვიყო იქ, სადაც ყველას ეცოდინება, რისთვის ვარ. პასუხისმგებლობას ვიღებ - თუკი ბავშვებისთვის ძალიან კარგ პირობებს შევქმნით, რამდენიმე წელიწადში ქუთაისში ბევრი კარგი ფეხბურთელი გაიზრდება", - ამბობს დევდარიანი.

ვინ არიან აზაცკი და მარინი?

საფეხბურთო აკადემიაზე ზრუნვის პარალელურად, სიახლეებია მთავარ გუნდშიც: მარეკ ჰლინკას შემდეგ, ქუთაისის "ტორპედომ" კიდევ ორი ფეხბურთელი დაიმატა - ჩემპიონთა ლიგის საკვალიფიკაციო ეტაპზე გუნდს ოლექსანდრ აზაცკი და ლაზარ მარინი დაემატებიან.

24 წლის აზაცკი "ტორპედოში" ოსტრავის "ბანიკიდან" მივიდა. ქუთაისელებმა უკრაინელი მცველი 6-თვიანი იჯარით დაიმატეს და ტრანსფერის გამოსყიდვის უფლებაც მიიღეს. აზაცკი უკრაინულ "მეტალისტში", კიევის "დინამოსა" და "ჩერნომორეცში" თამაშობდა, სადაც საქართველოს ეროვნული ნაკრების მცველის, დავით ხოჭოლავას მეწყვილე იყო უკანა ხაზში. მას ქუთაისში ხვალ ელოდებიან.

"ტორპედოს" კიდევ ერთი ახალწვეული ლაზარ მარინია. 24 წლის ბულგარელმა მცველმა ქუთაისელებთან კონტრაქტი 2019 წლის აპრილის ბოლომდე გააფორმა.

მარინს აქამდე მხოლოდ ბულგარეთის უმაღლესი ლიგის გუნდებში აქვს ნათამაშები - პლოვდივის "ბოტევში", "რაკოვსკისა" და სოფიას ცსკა-ში. 2017 წელს მარინმა ბულგარეთის თასი მოიგო, 2018 წელს კი ქვეყნის სუპერთასის მფლობელი გახდა. ბოლოს "ბოტევში" გამოდიოდა, სადაც 27 მატჩი ჩაატარა და 1 გოლი გაიტანა.

1113
მკითხველის კომენტარები / 0 /
მსგავსი ამბები
რუბრიკის სხვა სიახლეები
;