გიორგი დიხამინჯია: მოსაგებად არაფერს დავიშურებთ 

სამიოდე დღეც და თბილისის სპორტის სასახლეში დაიწყება IHF-ის ერთა ჩემპიონატი, რომელიც 17 ივნისამდე გასტანს. შეგახსენებთ, რომ საქართველოს დედაქალაქში 12 გუნდი იასპარეზებს, რომლებიც წილისყრით ორ ჯგუფში გადანაწილდნენ: 

ჩვენი ნაკრების შეხვედრათა გრაფიკი ასეთია: 8 ივნისი: საქართველო - ნიგერია, 9 ივნისი: საქართველო - მალტა, 10 ივნისი: საქართველო - ირლანდია, 12 ივნისი: საქართველო - აშშ, 13 ივნისი: საქართველო - ბულგარეთი. 

ჯგუფებიდან 2-2 საუკეთესო მედლებისთვის ბრძოლას განაგრძობს.15 ივნისს ნახევარფინალები, 16-ში კი ფინალები გაიმართება. საუკეთესო ევროპული გუნდი ევრო 2022-ის მეორე საკვალიფიკაციო რაუნდის, ანუ პლეი ოფის საგზურს მიიღებს. 

ქართველი ხელბურთელები კარგა ხანია, ამ ტურნირისთვის ემზადებიან. 3 ივნისიდან ჩვენი გუნდის საწვრთნელ პროცესს ხელმძღვანელობს სერბი მწვრთნელი ნიკოლა მაქსიმოვიჩი, რომელიც 2014 წლიდან თელ ავივის „მაქაბიში“ მუშაობს. 

საქართველოს ნაკრებს შემოუერთდა გიორგი დიხამინჯია, რომელიც მაკედონიურ „სტრუგაში“ თამაშობს. მის გარდა, კლუბში კიდევ ორი ქართველია - ლექსო წითელიშვილი და რევაზ ჭანტურია. 

მაკედონიის ჩემპიონატის პირველ ეტაპზე „სტრუგამ“, რომელიც სუპერლიგის დებიუტანტი იყო, მეექვსე ადგილი დაიკავა და საფინალო ჯგუფში ვერ მოხვდა: პირველ ოთხეულს დაემატა ორი გრანდი - „ვარდარი“ და „მეტალურგი“, ჩემპიონი კი, ტრადიციულად, „ვარდარი“ გახდა. „სტრუგამ“ მეშვიდე-მეთორმეტე ადგილებისთვის განაგრძო პაექრობა. ათიდან 9 მატჩი მოიგო, მხოლოდ ოჰრიდის კლუბს ჩამორჩა და საბოლოოდ მერვე ადგილი დაიკავა, გიორგი დიხამინჯია კი რეგულარული სეზონის შემდეგ ჟურნალისტების, მწვრთნელებისა და გულშემატკივრების გამოკითხვის შედეგებით ჩემპიონატის საუკეთესო მარჯვენა შუამარბად დასახელდა. 

-“სტრუგაში“ სამივე ქართველს კარგი სეზონი გვქონდა, - გვითხრა გიორგიმ. - არაერთხელ დაგვასახელეს ტურების სიმბოლურ ნაკრებში, თუმცა, ჯერ არ ვიცით, სად გავაგრძელებთ კარიერას. მე ერთწლიანი კონტრაქტი მქონდა და სანაკრებო ტურნირის მერე გერმანიაში ვაპირებ სინჯებზე წასვლას.

კონტრაქტი დაუსრულდა რეზო ჭანტურიასაც, რომელიც მეორე წრეში „პელისტერიდან“ შემოგვიერთდა. რეზო მწვრთნელობას აპირებს - შარშან მან პირველი კატეგორიის ლიცენზია მიიღო, წლეულს კი უკვე მეორე დონეზე სწავლობდა. არ ვიცი, „სტრუგაში“ დარჩება თუ არა.

ლექსო წითელიშვილს კიდევ ერთი წელი დარჩა, მაგრამ აქვს შემოთავაზებები „ოჰრიდიდან“, ასევე, სხვა ქვეყნის ორი კლუბიდან. სამწუხაროდ, სეზონი მან ტრავმით დაასრულა - საზარდული აწუხებს და 8-16 ივნისს თბილისის სპორტის სასახლეში, ალბათ, ვერ დაგვეხმარება.

რაც შეეხება ნაკრების ახალ მწვრთნელ ნიკოლა მაქსიმოვიჩს, მასთან აქამდე ურთიერთობა არ მქონია. როცა შევიკრიბეთ, თავისი სახელბურთო ხედვა და გეგმები გაგვაცნო. ტურნირი ჩვენთვის ძალიან მნიშვნელოვანია, რადგან ევრო 2022-ის შესარჩევი ეტაპიცაა და მის მოსაგებად არაფერს დავიშურებთ. 

ყოველდღიური სპორტული გაზეთი "ლელო"
470
მკითხველის კომენტარები / 0 /
მსგავსი ამბები
რუბრიკის სხვა სიახლეები
;