U21. გიორგი თევზაძის სლოვაკური ბარიერი

საქართველოს ახალგაზრდული ნაკრები ლიეტუვასთან მატჩისთვის ემზადება. გია ცეცაძის გუნდი გაგრჟდაიშია, სადაც უკვე ლეგიონერებიც ჩავიდნენ. შეკრებაზეა "ჟილინას" მარცხენა მცველი გიორგი თევზაძე, რომელიც მომავალ მატჩსა და სლოვაკურ კარიერაზე ლაპარაკობს...

ის "ჟილინას" მთავარი გუნდის 18-კაციან განაცხადში რამდენჯერმე მოხვდა, თუმცა ჯერ ოფიციალურ მატჩში არ უთამაშია. თევზაძე მაინც იმედოვნებდა, რომ ნაკრებში გამოიძახებდნენ:

"ველოდი გამოძახებას, რადგან ბოლო დროს ვითამაშე როგორც პირველ, ისე მეორე გუნდებში და ურიგო შთაბეჭდილება არ დამიტოვებია. ძირითად გუნდში ამხანაგური შეხვედრები ჩავატარე და გოლიც გავიტანე. ხოლო დუბლებში 6 ოფიციალური მატჩი ვითამაშე. ახლა უკვე დროა, პირველ გუნდში ოფიციალური დებიუტი მქონდეს. უცხო გარემოში ადაპტაციას ნელ-ნელა გავდივარ, თუმცა ყველაზე დიდი პრობლემა ენის ბარიერია. ინგლისურად კი ვლაპარაკობ, მაგრამ სლოვაკურის სწავლა მსურს და მასწავლებელთანაც დავდივარ".

თევზაძემ "ჟილინა" დაახასიათა: "საშუალო-ევროპული კლუბია, რომელიც ბრძოლისუნარიანობით გამოირჩევა. აქვს თავისი სათამაშო სტილი და ფეხბურთის ხედვა. ხელმძღვანელობა ძალიან დიდ ყურადღებას აქცევს აკადემიას. მათ მიაჩნიათ, რომ კლუბი წარმატებას მხოლოდ იმ შემთხვევაში მიაღწევს, თუ ფეხბურთელებს თავადაც გაზრდის".

თევზაძე "საბურთალოს" აკადემიის აღზრდილია. 2015 წლის დასაწყისში "დინამოში" გადავიდა, სადაც დიდი სათამაშო პრაქტიკა არ ჰქონია. თუმცა ამ ნაბიჯს მაინც გამართლებულად მიიჩნევს:

"ვფიქრობ, მაშინ სწორი ნაბიჯი გადავდგი. იმ პერიოდში "დინამოს" გია გეგუჩაძე ხელმძღვანელობდა, რომელიც საქართველოში ერთ-ერთი საუკეთესო მწვრთნელია და ეს მთავარი ფაქტორი იყო.

"საბურთალოს" ერთ-ერთ მაშინდელ ხელმძღვანელთან, კახა ჭუმბურიძესა და მწვრთნელ გიორგი ჭიაბრიშვილთან ვილაპარაკე და მათაც მირჩიეს, რომ კარიერა გეგუჩაძესთან გამეგრძელებინა... სხვათა შორის, "საბურთალოს" უმაღლეს ლიგაში 2 გოლი გავუტანე და ორივე - "სტანდარტებიდან".

გოლები კი გამიხარდა, მაგრამ ემოცია არ გამომიხატავს და არც მომავალში გამოვხატავ. სიმართლე გითხრათ, როცა "დინამოში" გადავედი, ძალიან გამიჭირდა, რადგან ყველა ჩემი საუკეთესო მეგობარი "საბურთალოში" დავტოვე. ეს კლუბი ჩემი მეორე ოჯახია და ყოველთვის ჩემს გულში დარჩება".

თევზაძე "საბურთალოს" იმ თაობის წარმომადგენელია, რომელმაც "სალერის" საერთაშორისო ტურნირზე სამჯერ გაიმარჯვა. მაშინ მისი თანაგუნდელები იყვნენ ჯიმი ტაბიძე, გიორგი ხარაიშვილი, გაგი მარგველაშვილი, ოთო გოშაძე.

"ამ კლუბში იციან მუშაობა და ნელ-ნელა შედეგსაც იმკიან. ევროპის კლუბებში არაერთი ფეხბურთელი გაუშვეს, ზოგიერთი ეროვნულ ნაკრებშიც თამაშობს. "საბურთალო" წლეულს შთამბეჭდავად გამოდის ეროვნულ ლიგაში, ევროტურნირებზე მოხვედრა თითქმის გარანტირებული აქვს და ჩემპიონობაც შორეულ პერსპექტივას არ ჰგავს. მინდა, ჩემს ყოფილ კლუბს წარმატებები ვუსურვო, რადგან აქ ბავშვობა და საუკეთესო წლები გავატარე".

ყოველდღიური სპორტული გაზეთი "ლელო"
775
მკითხველის კომენტარები / 1 /
გიზოგ
0
გაიხარე გიორგი, შენი თამაში დინამოდან მახსოვს და როგორც ფეხბურთის ნახევარ საუკუნოვან ქომაგს მიმაჩნია, რომ დიდი წარმატებების მიღწევის პოტენციალი გაქვს. უფალმა დაგლოცოს და გაგაძლიეროს. გისურვებ დიდ ფეხბურთში დიდ წარმატებებს.
მსგავსი ამბები
რუბრიკის სხვა სიახლეები
;