გიორგი იანტბელიძე: ფაქტობრივად, გარკვეულია და ჩვენთვისაც ყველაფერი გადაწყვეტილია

თავისუფალი სტილით მოჭიდავეთა ნაკრებმა წარმატებით იასპარეზა ბულგარეთის საერთაშორისო ტურნირზე, სადაც 5 მედალი მოიპოვა: თითო ოქრო-ვერცხლი და 3 ბრინჯაო.

ჩემპიონი მძიმეწონოსანი გენო პეტრიაშვილი გახდა, ვერცხლი ირაკლი მწითურმა (92) მოიპოვა, მესამეზე კი ოთარ გოგავა (61), ჯაბა ყველაშვილი და ნიკა კენჭაძე (ორივე - 79) გავიდნენ.

ნაკრების მთავარ მწვრთნელ გიორგი იანტბელიძეს ევროპაზე წასაყვანი შემადგენლობაც უკვე გარკვეული ჰყავს, მაგრამ დასახელებას არ ჩქარობს. მოვუსმინოთ მას...

- როგორ შეაფასებთ ბულგარეთში ნაკრების გამოსვლას, ხართ კმაყოფილი შედეგებით, ჭიდაობით?

- ამ ტურნირმა სრულად შეასრულა თავისი დანიშნულება. გვინდოდა, შეკრების შემდეგ ბიჭებს სატურნირო გამოცდილება მიეღოთ, ჩაგვეტარებინა საშეჯიბრო შეხვედრები და დავკვირვებოდით, ვინ როგორ მდგომარეობაშია, ვინ როგორ გამოასწორა ადრინდელი შეცდომები.

ამასთან, ზოგიერთ წონაში კონკურენციაც გასარკვევი იყო და ესეც გვაინტერესებდა. საბედნიეროდ, ამ ყველაფერმა კარგად ჩაიარა და ყველა კითხვაზე მივიღეთ პასუხი.

- ანუ შეიძლება ითქვას, რომ საევროპო ნაკრები უკვე გარკვეულია?

- ფაქტობრივად, გარკვეულია და ჩვენთვის - მწვრთნელებისთვის ყველაფერი გადაწყვეტილია, მაგრამ დარჩენილია ორი შეკრება და მათ გავლამდე საჯაროდ დასახელებისგან თავს შევიკავებ.

- ბულგარეთში ნაჭიდავებთაგან ყველაზე მეტად ვის გამოარჩევთ?

- რა თქმა უნდა, გენო პეტრიაშვილს, რომლის გამოსვლაც ცალკეა აღსანიშნავი. ასევე მინდა აღვნიშნო ნიკა კენჭაძე, ვისაც პატარა, ბავშვური შეცდომა მოუვიდა რუს მეტოქესთან, თორემ შეიძლებოდა, ფინალში გასულიყო და ახალი სიურპრიზი შემოეთავაზებინა.

კარგად იჭიდავა ოთარ გოგავამაც, თუმცა ნახევარფინალში დასანანი მარცხი იწვნია ბულგარელთან, ვინც მერე ჩემპიონიც გახდა. ბიჭებმა დამაჯერებლად იჭიდავეს და თავიანთი მაქსიმუმი გააკეთეს.

მთავარია, მონდომებულები და საბრძოლველად განწყობილები არიან. ახლა ჩვენი მთავარი ამოცანაა, ისინი ამ განწყობით მივიყვანოთ ევროპის ჩემპიონატამდე.

- თუმცა ამათ გვერდით იყო რამდენიმე ლიდერი, რომელთაგანაც, ალბათ, მეტს ელოდით...

- ლიდერებიდან ირაკლი მწითური ფინალში გავიდა, იქ კი რუსთა უძლეველ ფალავან აბდულრაშიდ სადუალევთან წააგო, მისი შესაძლებლობები კი ყველამ კარგად ვიცით. 79-ში ჯაბა ყველაშვილმა და იაკობ მაქარაშვილმა ერთმანეთში იჭიდავეს და მესამე-მეხუთე ადგილებზე გავიდნენ. 97 კილოგრამში ელიზბარ ოდიკაძეს ნეკნი ჰქონდა გატეხილი და არ უჭიდავია, მხოლოდ აიწონა. ბულგარეთში ლამის ნახევარი გუნდით გამოვედით.

- 79-ში საინტერესო შედეგი მივიღეთ: საქართველოს ჩემპიონატის ფინალში მაქარაშვილმა მოუგო ყველაშვილს, ახლა კი ყველაშვილმა რევანში აუღო. ამ წონაშიც გადაწყვეტილია კონკურენცია?

- ამ წონის საკითხს ავწონ-დავწონით, ყველაფერს შევაჯერებთ, გადავხედავთ მათ განვლილ ჭიდაობას და გადაწყვეტილებას ისე მივიღებთ.

- როდის დაასახელებთ კონტინენტის პირველობაზე წამსვლელ გუნდს?

- ნაკრებს დავასახელებ მეორე შეკრების დასაწყისში, ან მისი დასრულებისას. თან გუნდის ეკიპირებასაც ველოდებით და გვინდა, ის გუნდს საზეიმო ვითარებაში გადავცეთ, რომ ეს უბრალო ფაქტი კი არ იყოს.

- ალბათ, იქნება ისეთი წონებიც, სადაც დასამალავი არაფერია და იქნება ადრეც გქონდათ ამის შესახებ გაცხადებული...

- კი, არის ასეთი წონებიც. მაგალითად, პეტრიაშვილი, 70-ში ზურაბ იაკობიშვილი, 65-ში ვლადიმერ ხინჩეგაშვილი, 61-ში ბექა ლომთაძე ის ხალხია, ვინც შეინარჩუნეს თავისი ადგილი. ევროპის ჩემპიონატზე, ძირითადად, საქართველოს პირველობის გამარჯვებულები იჭიდავებენ, თუმცა იქნებ, ერთი-ორი ცვლილება კიდეც მოხდეს...

- დაბოლოს, როგორ მოემზადებით ევროპის ჩემპიონატამდე დარჩენილ დროში?

- ორ შეკრებას გავივლით საქართველოში. პირველს 2 აპრილს დავიწყებთ ბორჯომში, მეორეს კი - 19-ში დუშეთში. 2 მაისს მივდივართ კასპიისკში, 3-ში წილისყრაა, 4-ში კი ჩვენი შეჯიბრება იწყება.

ყოველდღიური სპორტული გაზეთი "ლელო"
922
მკითხველის კომენტარები / 0 /
მსგავსი ამბები
რუბრიკის სხვა სიახლეები
;