გიორგი ილურიძე ბათუმის დინამოში ითამაშებს

გუშინ ბათუმის "დინამო" თურქეთში შეკრებაზე გაემგზავრა. აჭარის მთავარი გუნდი ანთალიაში 22 თებერვლამდე დარჩება და ოთხ ამხანაგურ შეხვედრას გამართავს.

გია გეგუჩაძემ სამეზობლოში ეს ფეხბურთელები წაიყვანა:

მეკარეები - ლევან შოვნაძე, რომან ტაკიძე, მიხეილ ალავიძე;

მცველები - მალხაზ გაგოშიძე, დავით სამსონია, მირზა ფარტენაძე, ვაჟა ქორიძე, გურამ ადამაძე, გელა გოგიტაძე, ზაზა ჭელიძე, ლაშა ჩალაძე;

ნახევარმცველები - ვაკო თევდორაძე, გიორგი ქავთარაძე, გიორგი ჯანელიძე, ბექა ვარშანიძე, ჯოვინო ფლამარიონი, ლევან შარიქაძე, გიორგი ჭანკოტაძე, გეგი კეკუა, გიორგი ქუთელია, თორნიკე დევაძე;

თავდამსხმელები: გიორგი ილურიძე, ტატო აბუსელიძე, რიჩარდ ტროფიმოვი, ვახტანგ კვარაცხელია, ბესიკ დეკანოიძე.

შემადგენლობიდან ჩანს, რომ ბათუმის "დინამოში" ბევრი ახალწვეულია: "რუსთავიდან" - მეკარე მიხეილ ალავიძე, "ჩიხურადან" - ზაზა ჭელიძე და ბესიკ დეკანოიძე, "დილადან" - მალხაზ გაგოშიძე, ქუთაისის "ტორპედოდან" - გურამ ადამაძე,

ქობულეთის "შუქურადან" - გელა გოგიტაძე, მარტვილის "მერანიდან" - ლაშა ჩალაძე, "კოლხეთიდან" - გიორგი ჯანელიძე, "გურიადან" - ლევან შარიქაძე, ბოლნისის "სიონიდან" - გიორგი ჭანკოტაძე და უგუნდო ვახტანგ კვარაცხელია.

საბოლოო სიაში აღარ არის ქედას "ბეთლემის" ფლანგის შემტევი ნიკა დიასამიძე, რომელიც გუნდთან ერთად ვარჯიშობდა...

კიდევ ერთი მნიშვნელოვანი სიახლე: ბათუმის "დინამოში" ჩაირიცხა გიორგი ილურიძე, რომელიც ბოლოს კვიპროსულ "ეთნიკოსში" თამაშობდა. 25 წლის ილურიძეს, რომელიც საქართველოს ნაკრების იმედად ითვლებოდა, სამწუხაროდ, ჯერ კარიერა ვერ აეწყო.

დასანანია, რომ ახლა მხოლოდ ეროვნულ ლიგა 2-ში ითამაშებს და ნაკრებსაც ძალიან დაშორდება. თუმცა, ასაკიდან გამომდინარე, ჯერ კიდევ აქვს შანსი, პოტენციალი გამოავლინოს.

აქვე ვიტყვით, რომ პირველ ლიგაში წლეულს კიდევ რამდენიმე ისეთი მოთამაშე მოხვდა, რომელთაც უკეთეს კომპანიაში შეეძლოთ თამაში. მაგალითად ქობულეთის "შუქურაში" გადასული საქართველოს ნაკრების წევრობის კანდიდატი ელგუჯა ლობჯანიძეც გამოდგება...

ბათუმის "დინამოს" პრესსამსახურის ცნობით, გუნდის დაკომპლექტება ჯერ არ დასრულებულა. დამატებით დეტალებს თურქეთიდან დაბრუნების შემდეგ საგანგებო წინასასეზონო პრესკონფერენციაზე გავიგებთ.

რაც შეეხება თურქეთში გასამართავ საკონტროლო მატჩებს. 11 თებერვალს გეგუჩაძის გაწვრთნილები პოლონეთის რანგით მესამე ლიგის კლუბ "რაკუვას" შეხვდებიან, 15 თებერვალს - ესტონურ "ლევადიას" (ტალინი), 18 თებერვალს - ყაზახურ "ირტიშს" (პავლოდარი), ხოლო 21 თებერვალს - ასევე ყაზახურ "ტობოლს" (კუსტანაი).

ყოველდღიური სპორტული გაზეთი "ლელო"
1692
მკითხველის კომენტარები / 0 /
მსგავსი ამბები
რუბრიკის სხვა სიახლეები
;