გიორგი კოხრეიძეს ევროპაში უნდა...

სულ რაღაც ერთი წლის წინ, გიორგი კოხრეიძე "საბურთალოს" სათადარიგო მოთამაშე იყო და თავი იმით დაგვამახსოვრა, რომ შეცვლაზე შესულს მნიშვნელოვანი გოლები გაჰქონდა.

შარშან, თბილისში გამართულ 19-წლამდელთა ევროპის ჩემპიონატზე საკმაოდ კარგი შთაბეჭდილება დატოვა, გამოცდილება შეიძინა და "საბურთალოს" ძირითად შემადგენლობაში ადგილი დაიმკვიდრა...

"ბათუმში ვისვენებდი, ხვალ კი თბილისში დავბრუნდები და მესამე წრისათვის მზადებას დავიწყებ. ვეცადე, ეს დრო მაქსიმალურად გამომეყენებინა და ძალები სრულად აღმედგინა.

პირველი ნახევრის შემდეგ "საბურთალო" ჩემპიონატს ლიდერობს და მიმაჩნია, რომ ჩვენთვის კარგი ნახევარი სეზონი იყო, რადგან სტაბილურად ვითამაშეთ.

გუნდურობითაც გამოვირჩევით და ჩვენი დიდი პლუსია, სწრაფ ფეხბურთს რომ ვთამაშობთ. უკვე წლებია, ერთად მოვდივართ და ყველა ერთი მიზნისკენ ვისწრაფვით - გვინდა, კლუბმა გამოსვლა ბევრად მაღალ დონეზე გააგრძელოს. საამისოდ "საბურთალოში" ბევრს მუშაობენ.

კონკურენტთან მაინცდამაინც დიდი სხვაობა არაა - ხუთქულიანი ჰანდიკაპი მოდუნების საშუალება არა მოგვცემს. მეორე წრე ბევრად რთული იქნება, რადგან გუნდები საკმაოდ გაძლიერდნენ. დარჩენილ შეხვედრებშიც პირველის მსგავსად უნდა გავაგრძელოთ.

თუ ჩემპიონები გავხდებით, ისეთი პატარა კლუბისთვის, როგორიც "საბურთალოა", დიდი წარმატება იქნება. ჩვენ კი ლიდერობის შენარჩუნება შეგვიძლია. მთავარია, საქმე კვლავ მონდომებით გავაგრძელოთ და მჯერა, ყველაფერი გამოგვივა. ვფიქრობ, "საბურთალო" დღეს ყველაზე კარგი და გამორჩეული კლუბია და მისი ლიდერობაც ლოგიკურია", - ამბობს კოხრეიძე.

კოხრეიძემ მიმდინარე სეზონის პირველ ნახევარში პირადი რეკორდი უკვე გააუმჯობესა - 2017 წელს, 31 თამაშში მოწინააღმდეგის კარი 5-ჯერ აიღო, წლეულს კი მის ანგარიშზე 17 შეხვედრაში უკვე 6 გოლია:

"წელს უკეთესი მაჩვენებელი რომ მექნებოდა, ვიდრე გასულ სეზონში, წარმოვიდგენდი და მიზნადაც მქონდა დასახული - ყოველ წელს პროგრესი უნდა მქონდეს, შემდეგ კარიერა ევროპაში რომ გავაგრძელო. მინდა დიდი ფეხბურთი ვითამაშო, ამისთვის კი ყველაფერს გავაკეთებ.

რაც შეეხება გატანილ გოლებს, რაც ბევრჯერ ავიღებ მეტოქის კარს, უფრო მეტად გამიხარდება. მე და ვაგნერს 6-6 გოლი გვაქვს, აქედანაც ჩანს, რომ "საბურთალოში" ფუნქციები თანაბრადაა გადანაწილებული".

კოხრეიძის აზრით, მსოფლიოს ღირსეული ახალი ჩემპიონი ჰყავს: "საფრანგეთის ჩემპიონატი ნაკრებმა დამსახურებულად მოიგო. თუმცა, ხორვატიის ნაკრები ძალიან სიმპათიური ნაკრებია, რთულად დასამარცხებელია და ფინალში ამხელა სხვაობით მარცხს არ იმსახურებდა".

ყოველდღიური სპორტული გაზეთი "ლელო"
1087
მკითხველის კომენტარები / 0 /
მსგავსი ამბები
რუბრიკის სხვა სიახლეები
;