გიორგი მერებაშვილი: მზად ვართ ისე, როგორც არასდროს!.. ერთი უნდა გავითავისოთ - ეს არის ქვეყნის საქმე

საქართველოს ეროვნული ნაკრები ისტორიული წარმატების ზღურბლზე დგას. ვლადიმირ ვაისის გაწვრთნილი გუნდი ძალიან ახლოსაა ევროპის ჩემპიონატზე მოხვედრასთან.

ფაქტია, კარგად მივდივართ, რისი მიზეზიც სამწვრთნელო შტაბისა და ფეხბურთელების კარგ გარჯასთან ერთად ქართული საფეხბურთო თემის ერთიანობაც გვგონია.

"ლელო" პოლონეთში დაუკავშირდა 32 წლის გიორგი მერებაშვილს, ვინც ვლადიმირ ვაისის ფორმაციის ნაკრებში მნიშვნელოვანი ფეხბურთელია. პლოცკის "ვისლას" გარემარბთან ვრცელი ინტერვიუ ჩავწერეთ, რომელიც საინტერესო უნდა იყოს ჩვენი მკითხველისთვის...

- თავდაპირველად, კლუბზე ვისაუბროთ. როგორ აფასებთ მიმდინარე სეზონს გუნდისთვის და პირადად თქვენთვის?

- რა თქმა უნდა, ჯერ სეზონი დადებითად ვერ შეფასდება. ცხრილის ქვედა ნაწილში ვართ, ცუდად დავიწყეთ სეზონი. ალბათ, ამას აქვს თავისი მიზეზები. თუნდაც ის, რომ სეზონის დაწყების წინ მწვრთნელი შეგვიცვალეს.

ჩვენი გუნდის ყოფილი მწვრთნელი პოლონეთის ნაკრების დამრიგებლად დანიშნეს. ახალი მწვრთნელი, როგორც ასეთ დროს ხდება ხოლმე, თავისი ხედვით მოვიდა გუნდში. ამას გუნდმა ალღო ვერ აუღო, ვერ ვითამაშეთ ის ფეხბურთი, რასაც ითხოვდა. ამის შემდეგ კიდევ შეიცვალა მწვრთნელი. ახლის ხელში ორი თამაში ჩავატარეთ და ორივე ფრედ ვითამაშეთ.

მთლიანობაში რომ ავიღოთ, გუნდი ისევ იმ ფეხბურთელებით არის დაკომპლექტებული, რომლებიც იყვნენ გასულ სეზონში. იმედი მაქვს, მომავალ თამაშებში უკეთეს შედეგს მივაღწევთ, გამოვასწორებთ ვითარებას და საუკეთესო 8 გუნდს შორის მოვხვდებით. ეს საშუალებას მოგვცემს, ვითამაშოთ პლეი ოფი და მერე უკვე ვიფიქროთ ევროსაგზურის მოპოვებაზე. ამასთან, მესმის ისიც, რომ ამის გაკეთება რთული იქნება. განსაკუთრებით ისეთი დასაწყისის შემდეგ, როგორიც გვქონდა.

მე მაინც მჯერა, რომ შევძლებთ მიზნის მიღწევას. ამის პოტენციალი გუნდს ნამდვილად გააჩნია... რაც შეეხება ჩემს თამაშს, ყველამ იცით, რომ ხუთი თვის წინ ოპერაცია გავიკეთე. ეს ნამდვილად არ იყო იოლი ოპერაცია. ძალიან რთული პერიოდი გამოვიარე. იმის შემდეგ ყველანაირად ვცდილობ, ფორმა აღვიდგინო.

ნაკრებში ჩატარებულმა თამაშებმაც, რა თქმა უნდა, უფრო მეტი თავდაჯერება შემმატა. საკუთარი თავის მჯერა და დარწმუნებული ვარ, მომავალ თამაშებში კიდევ უფრო მოვუმატებ. იმედი მაქვს, მიმდინარე სეზონი წინაზე წარმატებული მექნება. გასულ სეზონს კი ნამდვილად წარმატებულად ვთვლი.

- ფაქტია, გუნდის ლიდერი ხართ. როდის იწურება თქვენი კონტრაქტი "პლოცკთან"?

- 2019 წლის ივნისის ბოლოს. ჯერ არ ვჩქარობ გაგრძელებას. ვიცი, რომ კლუბს აქვს ამის სურვილი, ოღონდ, ჯერ მხოლოდ ლაპარაკის დონეზე. ამ ეტაპზე გადართული ვარ იმაზე, რომ პირველი წრე ჩავამთავრო კარგად. ამის შემდეგ გაირკვევა, კონკრეტულად რომელ გუნდში შეიძლება გავაგრძელო კარიერა.

- თუ არის კარიერის უკეთეს გუნდში გაგრძელების რეალური ვარიანტი ან პოლონურ ლიგაში, ანდაც ევროპის სხვა ქვეყნებში?

- ზაფხულში იყო კონკრეტული ვარიანტები, თუმცა ტრავმის გამო ჩაიშალა. იმედი მაქვს, დეკემბერში ისევ გაგრძელდება მოლაპარაკება და არა მარტო იმ კლუბებთან, რომლებთანაც ზაფხულში მიდიოდა მოლაპარაკება, იმედი მაქვს, უფრო მეტი კლუბი დაინტერესდება და არჩევანის მეტი საშუალება მექნება. ალბათ, ნოემბრის ბოლოდან, დეკემბრის შუა რიცხვებიდან უკვე დაიწყება მოლაპარაკებები. ამ დროს უფრო კონკრეტულად მეცოდინება, სად გავაგრძელებ კარიერას.

- რაში მოუმატეთ მას შემდეგ, რაც პოლონურ ექსტრაკლასაში თამაშობთ, რომელ კომპონენტში გაიზარდეთ, როგორც ფეხბურთელი?

- ვინც პოლონეთის ჩემპიონატს ადევნებს თვალს, დამეთანხმება, რომ იქ ძირითადად ძალისმიერი ფეხბურთია. გამორიცხულია, ფიზიკურად არ იყო მზად და გათამაშონ. აქ ამას უდიდეს ყურადღებას აქცევენ. რაც პოლონეთში ვარ, "ფიზიკაში" აშკარად მოვუმატე. 32 წლის ვარ, მაგრამ სირბილი არ მიჭირს.

- გადავიდეთ საქართველოს ნაკრებზე. ჯერ ჯგუფში ჩავლილი თამაშების თქვენეულ შეფასებას მოვისმენდით სიამოვნებით...

- ძალიან ბედნიერი ვარ, რომ ნაკრებმა დაიწყო მოგებები, დაიწყო წარმატებით თამაში... რაც შეეხება ჯგუფს, მეც, ჩემი თანაგუნდელებიც, სამწვრთნელო შტაბიც, ფედერაციის ხელმძღვანელები და გულშემატკივრები ყველანი იმედიანად ვიყავით, რომ ამ ჯგუფს მოვიგებდით. ამის მიუხედავად, ჩემთვის მაინც გასაკვირია ასეთი თამაში. რა თქმა უნდა, წარმატებას ველოდით, ველოდით მოგებებს, მაგრამ ასე თუ ვითამაშებდით და ასეთი მაჩვენებლები თუ გვექნებოდა, არ ველოდი. უზომოდ ბედნიერი ვარ! კიდევ უფრო მოვუმატებთ და გავიზრდებით. ამის მჯერა. მჯერა იმისიც, რომ ავიხდენთ იმ ოცნებას და ევროპის ჩემპიონატის ფინალურ ეტაპზე გავალთ.

- ჯგუფი უკვე ოფიციალურად მოვიგეთ. ალბათ, დარჩენილ თამაშებშიც უდიდესი მოტივაცია გვექნება. თუნდაც იმიტომ, რომ პლეი-ოფის ნახევარფინალში წყვილის მასპინძლები ვიყოთ...

- დარჩენილი ორი თამაში ძალიან მნიშვნელოვანი იქნება ჩვენთვის. ჯგუფი კი მოვიგეთ, მაგრამ ჩვენთვის ერთა ლიგაზე გასამართავი ყველა თამაში ფინალის ტოლფასია. ორივე თამაშის მოგებას ვეცდებით. ქართველი გულშემატკივარი მოწყურებულია მოგებებს. ასევე ვართ ჩვენც - ფეხბურთელები. ყველაზე თვალშისაცემი და გამოსარჩევი, ჩემი აზრით, ის არის, რომ გუნდში არის ერთსულოვნება. ყველას ერთი მიზანი გვამოძრავებს. ქომაგებისგანაც დიდ მხარდაჭერას ვგრძნობთ. რომ არა ეს მხარდაჭერა და ნდობა, გამორიცხულია, რაიმესთვის მიგვეღწია. ჩვენი გამარჯვება მთელი საქართველოს დამსახურებაა.

- დაახლოებით უკვე შეგვიძლია ვილაპარაკოთ საქართველოს ნაკრების პოტენციურ მეტოქეებზე პლეი ოფის ნახევარფინალში. არის რომელიმე ნაკრები, რომელსაც მეტოქედ არ ისურვებდით?

- სიმართლე გითხრათ, ჩემთვის არ აქვს მნიშვნელობა, ვის შევხვდებით პლეი ოფის ნახევარფინალში. ჩემი და ყველა ფეხბურთელის მიზანია, მოვიგოთ ნახევარფინალიც და ფინალიც. ნამდვილად არ მიფიქრია სასურველ და არასასურველ მეტოქეებზე.

- ევროპის ჩემპიონატის ფინალურ ეტაპამდე ორი ნაბიჯი დარჩა. როგორ ფიქრობთ, მენტალურად მზად ვართ იქ მოსახვედრად?

- ვფიქრობ, მზად ვართ ისე, როგორც არასდროს! თითოეული ფეხბურთელი უზომოდაა მოტივირებული. ახლა ერთიანობის დროა. არ არის ბოღმის, შურის, ცუდი კომენტარების დრო... ამას ხაზს ვუსვამ იმიტომ, რომ თუნდაც მოგებული თამაშის შემდეგ, ამა თუ იმ ფეხბურთელზე, მათ შორის ჩვენზეც, გვხვდება არასასიამოვნო კომენტარები.

ერთი უნდა გავითავისოთ - ეს არის ქვეყნის საქმე. თითოეული ფეხბურთელი, თითოეული მოქალაქე ვაკეთებთ ქვეყნის საქმეს. მაქვს დიდი იმედი, რომ ერთად დგომით შევძლებთ მიზნის მიღწევას. როგორც ვდგავართ ახლა, ასე უნდა ვიდგეთ. მჯერა, ასეთ შემთხვევაში წარმატება მოვა.

- და ბლოს, როგორ იქნება, ვლადიმირ ვაისზეც არ გკითხოთ. რა არის მისი წარმატების საიდუმლო?

- არ მინდა, გულშემატკივარმა სხვანაირად გაიგოს, მაგრამ ვფიქრობ, წარმატების მთავარი მიზეზი არის ის, რომ თითოეულ ფეხბურთელთან კარგ ურთიერთობაშია. ჯანსაღი ატმოსფერო შექმნა გუნდში. გუნდში შეიძლება გყავდეს ვარსკვლავები, მაგრამ გარემო არ იყოს ჯანსაღი და ეს იყოს წარუმატებლობის მიზეზი. ამ შემთხვევაში, მწვრთნელისგან მოდის ეს ატმოსფერო, ეს ურთიერთობები ფეხბურთელებთან. 11-12 წელია ნაკრებში ვარ და ვფიქრობ, დღეს ამ მხრივ ყველაზე კარგი სიტუაციაა.

- ხომ არ დაგრჩათ რამე სათქმელი?

- არაფერი, უბრალოდ, მადლობა ქართველ გულშემატკივარს! ჩვენ შევძლებთ და ერთად გავიმარჯვებთ!

ყოველდღიური სპორტული გაზეთი "ლელო"
1072
მკითხველის კომენტარები / 0 /
მსგავსი ამბები
რუბრიკის სხვა სიახლეები
;