გიორგი ნემსაძე: ალბათ, რაღაც ჩემი შეცდომაც იყო... ჩემთვის ვაანალიზებდი მომხდარს...

საქართველოს 17-წლამდელთა ნაკრებმა ევროპის ჩემპიონატის ელიტრაუნდში მეორე ადგილი დაიკავა და მხოლოდ ირლანდიას ჩამორჩა.

სამწუხაროდ, გიორგი ნემსაძის გაწვრთნილი გუნდი ინგლისში გასამართავ ევროფორუმზე მაინც ვერ მოხვდა - 8 მეორეადგილოსნიდან ევროპის ჩემპიონატზე 7 საუკეთესო გავიდა. საქართველოს ნაკრები ერთადერთი "ზედმეტი" აღმოჩნდა მეორეადგილოსნებიდან.

"ლელო" ჩვენი გუნდის მთავარ მწვრთნელს, გიორგი ნემსაძეს დაუკავშირდა და მასთან ერთად შეაჯამა პოლონეთში დასრულებული ელიტრაუნდის ბატალიები...

- მოდით, ელიტრაუნდის ზოგადი შეფასებით დავიწყოთ...

- სანამ შეჯამებას დავიწყებდეთ, გულწრფელად უნდა ვთქვა, რომ ჩვენი გუნდის აბსოლუტურად ყველა ფეხბურთელი ელიტრაუნდში ბოლომდე დაიხარჯა. თავი არავის დაუზოგავს. ამისათვის მადლობა მინდა ვუთხრა გუნდის თითოეულ წევრს.

მადლობა ფეხბურთის ფედერაციას, რომელმაც ყველა პირობა შეგვიქმნა კარგად მომზადებისთვის... რაც შეეხება კონკრეტულად ტურნირს, იცით, რომ პირველი მატჩი გვქონდა პოლონეთთან.

ორჯერ ვიგებდით, მაგრამ საქმე ბოლომდე ვერ მივიყვანეთ. სასტარტო შეხვედრა იყო და გასაგებია, რომ მას თან ახლდა გარკვეული მღელვარება. ამის მერე იყო მატჩი ირლანდიასთან. შედეგი ყველამ ვიცით. რა თქმა უნდა, ამ მატჩში ვერ განვახორციელეთ ის, რაც გვინდოდა.

კარგი გუნდი იყო ირლანდია, მაგრამ, ჩემი აზრით, სავსებით შესაძლებელი გახლდათ, ეს თამაში არ წაგვეგო. ჯგუფის ბოლო მატჩზე რაღა უნდა ვთქვა - მაკედონიას დიდი ანგარიშით მოვუგეთ. ვიცოდით უკვე, რომ სხვა გუნდების შედეგზე ვიყავით დამოკიდებული. ბიჭებმა მაგრად მოინდომეს. საბოლოო ჯამში მივიღეთ ასეთი შედეგი...

- არადა, სანამ ყველაფერი ბოლომდე გაირკვეოდა, საქართველოში ნაადრევი ზეიმიც დაიწყო...

- ჩვენ ზუსტად ვიცოდით, რა და როგორ იყო, მაგრამ მაკედონიასთან მატჩის შემდეგ მაინც გახარებულები ვიყავით, რადგან შანსს ვინარჩუნებდით.

საბოლოო ჯამში, ისე მოხდა, რომ ერთმა ბურთმა გადაწყვიტა ყველაფერი. ან ერთით მეტი რომ გაგვეტანა, ან ერთით ნაკლები გაგვეშვა, ევროპის ჩემპიონატის ფინალურ ეტაპზე ვითამაშებდით. არადა, ამის შანსიც იყო. წეღანაც ვთქვი - თუნდაც ირლანდიასთან მატჩი რომ ავიღოთ, რეალურად ნაკლების გაშვებაც შეიძლებოდა და გოლის გატანაც.

- თქვენი სიტყვებიდან გამომდინარე, გვეუფლება განცდა, რომ მეტიც შეიძლებოდა...

- ორი აზრი არ არის, რომ შეიძლებოდა. იყო პატარა ნიუანსები, იყო გამოუცდელობის ფაქტორიც... ეს ბიჭები მაინც შედარებით გამოუცდელები არიან. ეს მხოლოდ და მხოლოდ დასაწყისია მათი კარიერის. ამიტომაც, მჯერა, რომ ყველა სათანადო დასკვნებს გამოვიტანთ და ვისწავლით იმისგან, რაც მოხდა.

- ამ ნაკრების მთავარი მისია მაინც ის არის, ეროვნულ გუნდს გაუზარდოს კადრები. როგორ გგონიათ, არის გუნდში 2-3 ისეთი ფეხბურთელი მაინც, რომელიც მომავალში ეროვნული გუნდის კარს შეაღებს?

- გულწრფელად რომ გითხრათ, ასეთი ფეხბურთელების რაოდენობა იმაზე მეტიცაა, თქვენ რომ კითხვაში დაასახელეთ. დროთა განმავლობაში, ეს ბიჭები პროგრესის გზით წავლენ. მათი უმეტესობა ჭაბუკთა ლიგაში თამაშობს. დღეს ამ ლიგაში მაინც ორი გამოკვეთილი ლიდერია - "დინამო" და "საბურთალო".

ალბათ, უკეთესი იქნება ზოგადად ჩვენი ფეხბურთისთვის, თუ სხვა გუნდებიც მიაღწევენ პროგრესს და დონე შედარებით გათანაბრდება. ისე, არ ვიცი, ვგრძნობდი, თუ რა იყო - მთელი ელიტრაუნდის განმავლობაში ვეუბნებოდი ბიჭებს - ეს ისეთი ტურნირია, ისეთი ფორმატია, შეიძლება, ჩვენი ბედი ერთმა გოლმაც კი გადაწყვიტოს-მეთქი... საბოლოოდ, მართლა ასე მოხდა...

- შეიძლება ითქვას, რომ არ გაგვიმართლა?

- მე დადებითად ვერ შევაფასებ შედეგს. მიზნად ევროპის ჩემპიონატზე მოხვედრა გვქონდა დასახული და ეს ვერ შევძელით. პირველ რიგში, საკუთარ თავში ვეძებ მიზეზს.

ალბათ, რაღაც ჩემი შეცდომაც იყო. მართლა შეიძლებოდა და ძალიან რეალურიც იყო, რომ ეს ელიტრაუნდი ჩვენთვის სასიხარულოდ დასრულებულიყო. ამიტომ, როგორ ვთქვა, შევასრულეთ ამოცანა-მეთქი, როცა ვერ გავედით ევროპის ჩემპიონატზე?!

- ალბათ, 17-წლამდელთა ნაკრებს აღარ გაწვრთნით...

- არსებული ფორმაციით ამ გუნდმა არსებობა დაასრულა, შესაბამისად, მეც აღარ ვარ ნაკრების მწვრთნელი. ჯერ ფეხბურთის ფედერაციის ხელმძღვანელებთანაც არ მილაპარაკია განვლილი ბატალიების შესახებ. ცოტა ხნის წინ ჩამოვედით და ჩემთვის ვაანალიზებდი მომხდარს...

ყოველდღიური სპორტული გაზეთი "ლელო"
1164
მკითხველის კომენტარები / 0 /
მსგავსი ამბები
რუბრიკის სხვა სიახლეები
;