გიორგი ნემსაძე: ვუყურებდი თამაშს და ვხედავდი, რომ ფეხბურთელებმა იცოდნენ, რას ითხოვდა მათგან მწვრთნელი

ნაკრების ყოფილი კაპიტნის აზრით, ვაისის მიმართ ნდობის ფაქტორმა გაამართლა

ერთა ლიგის სტარტზე ყაზახეთთან საქართველოს ნაკრების გამარჯვებას გიორგი ნემსაძე იმ ნდობის ლოგიკურ შედეგად მიიჩნევს, რომელიც ფეხბურთის ფედერაციამ ვლადიმირ ვაისს გამოუცხადა.

"ასტანაში გუნდს ეტყობოდა მწვრთნელის ხელი, სტრატეგია და ხედვა. მთლიანობაში, ვლადიმირ ვაისის გაწეულმა ორწლიანმა სამუშაომ შედეგი ახლა გამოიღო", - ამბობს ნემსაძე.

მისივე თქმით, მთავარი იყო ნდობა, რაც ვაისს გამოუცხადეს: "მე ერთ რამეში ვარ დარწმუნებული - ნდობა ბევრს მხოლოდ მოთამაშისთვის არ ნიშნავს, არამედ, მწვრთნელისთვისაც. ყოველ ორ წელიწადში ნაკრების სხვადასხვა მწვრთნელის ხელში მოხვედრა სასურველი არ არის. ვლადიმირ ვაისის ხელმძღვანელობით წინა ციკლში საქართველოს ნაკრებმა ოფიციალური შეხვედრა ვერ მოიგო. ფეხბურთის ფედერაციას შეეძლო, რომ მასთან კონტრაქტი აღარ გაეხანგრძლივებინა. მაგრამ აბსოლუტურად გამართლებული ნაბიჯი გადადგა და ვაისთან თანამშრომლობა გაახანგრძლივა".

/Highlights/ ყაზახეთი-საქართველო 0:2 [VIDEO]

ნემსაძე საქართველოს ნაკრებში მწვრთნელთა ხშირ ცვლაზეც ლაპარაკობს: "ლამის ყოველ წელიწადს, თანაც, მუდმივად, მწვრთნელების ცვლამ ნაკრებზე დამღუპველად იმოქმედა. შესაძლოა, გუნდმა ციკლი ჩააგდოს, მაგრამ მწვრთნელს დრო უნდა ჰქონდეს, რომ გუნდთან მუშაობა გააგრძელოს და შუა გზაზე არ მიატოვოს. ეს იყო ერთ-ერთი მიზეზიც, რის გამოც 25 წელიწადში ნაკრები მუდმივ რეგრესს განიცდიდა".

ვეტერანი ფეხბურთელი ასტანაში მოგების მიზეზს სწორედ ამ დამოკიდებულების შეცვლაში ხედავს: "უცნაურ რამეს ვიტყვი, მაგრამ ამაში დარწმუნებული ვარ - ნაკრებში ისეთი სისტემაც კი იმუშავებს, რომელიც ბოლომდე გამართული არ არის.

ფეხბურთის ფედერაციას შეეძლო, ვაისთან თანამშრომლობა შეეწყვიტა, მაგრამ ძველი გზით არ წავიდა, მუშაობა აცალა და პარტნიორობის გაგრძელებამ პირველი შედეგი მოგვცა. ახლა ვაისიც მოტივირებულია, გუნდიც და ეს საერთო საქმეს წაადგა. მან ნახა, რა გუნდი ჰყავს, რა პოტენციალი აქვს და გუნდს თავისი ხელი დაატყო. სისტემაში მოქცევა გუნდზე დადებითად რომ მოქმედებს, ეს ჩემი მოგონილი არ არის, ნაკრების ჩამოყალიბებას დრო სჭირდება".

ნემსაძე შორსაა იმ აზრისგან, რომ ასტანაში "ჯვაროსნებმა" იდეალურად ითამაშეს: "ამის თქმა სისულელე იქნებოდა. ხარვეზები იყო და ყაზახებს გატანის შანსებიც ჰქონდათ.

მაგრამ მთავარია, მოედანზე ქაოსი არ იყო. ვუყურებდი თამაშს და ვხედავდი, რომ ფეხბურთელებმა იცოდნენ, რას ითხოვდა მათგან მწვრთნელი და მოედანზე რა უნდა გაეკეთებინათ. ეს ბევრს ნიშნავს. გუნდის სახე და ხელწერა გამოიკვეთა. ეს მიმართულება უნდა გაგრძელდეს და დარწმუნებული ვარ, უკეთესი ნაკრები გვეყოლება".
ეროვნული ნაკრებისა და თბილისის "დინამოს" ყოფილმა კაპიტანმა გიორგი ჩაკვეტაძეზე ცალკე ილაპარაკა: "ძალიან კარგი თამაში ჩაატარა და მისი

ინდივიდუალური გაბრწყინებით გავიტანეთ. ნიჭიერი ბიჭია და იმედია, ნაკრებს უფრო მეტად წაადგება და მხოლოდ ამ გოლს არ დასჯერდება. თუმცა, დარწმუნებული ვარ, ვაისს თუ ამ სისტემის განვითარების საშუალებას მისცემენ, ნაკრებში თავის გამოჩენას სხვა ნიჭიერი ახალგაზრდაც მოახერხებს".

ყოველდღიური სპორტული გაზეთი "ლელო"
2878
მკითხველის კომენტარები / 1 /
gaga
2
ისე ლაპარაკობთ თითქოს თუნდაც თურქეთისთვის მოუგო, ერთი თავისავით მაჩანჩალა ყაზახებს მოუგო ვაისმა
მსგავსი ამბები
რუბრიკის სხვა სიახლეები
;