გიორგი ნემსაძე: მოსამზადებლად გერმანიაში წავედით, მაგრამ თბილისში ჩამოვედით თამაშის წინა ღამეს, რაც შეცდომა იყო... მატჩი, როცა ჩემმა თაობამ შანსი ვერ გამოიყენა...

საქართველოს ნაკრების ყოფილი კაპიტნის, გიორგი ნემსაძის მეთაურობით გორის "დილამ" სეზონი დამაკმაყოფილებლად ჩაამთავრა. რაც მთავარია, გუნდმა შეინარჩუნა ადგილი ქართულ საკლუბო ელიტაში. შეგვიძლია ვთქვათ, რომ ნემსაძემ "დილაში" კარგად იმუშავა.

"ლელო" გუშინ დაუკავშირდა მას და ინტერვიუ ჩამოართვა, საკლუბო საკითხებით დავიწყეთ და სანაკრებო ამბებით დავასრუეთ...

- "დილამ" დასახული ამოცანა გადაჭრა, დარჩა რა უძლიერესთა შორის. როგორ შეაფასებდით სეზონს?

- გუნდის კრება გვქონდა, ფეხბურთელებს ვესაუბრე და მადლობა გადავუხადე. მოგეხსენებათ, ჩვენი უპირველესი მიზანი იყო უმაღლეს ლიგაში ადგილის შენარჩუნება. მერე ისე მოხდა, რომ ჩვენი თამაშითა და ჩემპიონატში შექმნილი ვითარებით ევროპალიგაზე მოხვედრის შანსიც გაგვიჩნდა, მაგრამ საბოლოო ჯამში აღარ გამოვიდა. რაც მთავარია, ჩვენს მთავარ მიზანს მივაღწიეთ და მინდა, მადლობა გადავუხადო ყველას - ხელმძღვანელობას, ფეხბურთელებს, სამწვრთნელო შტაბს, სამედიცინო სამსახურს, კლუბის ყველა თანამშრომელს...

- წესით, "დილაში" მუშაობა უნდა გააგრძელოთ...

- სიმართლე გითხრათ, საქმეს ჯერ საამისო პირი ნამდვილად არ უჩანს. არ მგონია, რომ გაიყაროს ჩვენი გზები, მაგრამ ამ მომენტისთვის კონტრაქტი არ გაგვიგრძელებია. სანამ ეს არ მოხდება, თქვენს კითხვაზე ზუსტი პასუხის გაცემა გამიჭირდება.

- გუნდიდან წასვლის სურვილი ხომ არ გამოუთქვამს რომელიმე ფეხბურთელს?

- არა, რამდენადაც მე ვიცი, ჯერ ოფიციალურად არავის მიუმართავს კლუბის ხელმძღვანელობისთვის.

- დიდი ალბათობით, მომავალ სეზონში გუნდს ლეანდრო რიბეირო დაუბრუნდება. ეს გვარიანი გაძლიერება უნდა იყოს "დილასთვის"...

- მოდით, ჯერ ნუ ვიჩქარებთ. ეს საკითხი ლაპარაკის დონეზეა მხოლოდ. თუ მართლა დაბრუნდა, რა თქმა უნდა, რიბეირო გუნდს მნიშვნელოვნად გააძლიერებს. ამაში დარწმუნებული ვარ.

- გადავიდეთ საქართველოს ნაკრებზე. ბელარუსთან ეპოქალური მნიშვნელობის მატჩი გვიახლოვდება...

- ფეხბურთელებთან ერთად მეც განვიცდი და მოუთმენლად ველოდები 26 მარტს. ის, რაც ვერ შეძლო ჩვენმა თაობამ, ამ ბიჭებმა უნდა შეძლონ. ჩვენ, ყველა, ქართული ფეხბურთის გულშემატკივრები, მეთორმეტე მოთამაშედ უნდა ვიქცეთ ნაკრებისთვის. ასეთი შანსი მხოლოდ ერთხელ მქონდა კარიერაში და ჩვენმა თაობამ ის ვერ გამოიყენა. რას არ მივცემდი ახლა, კიდევ ერთხელ რომ შემეძლოს იმ თამაშის ჩატარება... გეხსომებათ, რუმინეთთან მატჩი...

- იმდროინდელი კადრები ახლაც თვალწინაა. მაინც, რა დაემართა ნაკრებს იმ თამაშში?

- მოგეხსენებათ, მაშინ როგორ იყო - როცა საქართველოში ვემზადებოდით თამაშებისთვის, ხშირად გვაწუხებდნენ მეგობრები, ნათესავები, ახლობლები... თუნდაც ბილეთების გამო. ეს ხდებოდა რიგითი სანაკრებო მატჩების წინ და წარმოიდგინეთ, რა მოხდებოდა რუმინეთთან გადამწყვეტ თამაშამდე - რომ მოგვეგო, ჯგუფიდან გასასვლელად გვეხსნებოდა გზა. მოსამზადებლად გერმანიაში წავედით, იქ პირობები კარგი იყო, მაგრამ თბილისში ჩამოვედით თამაშის წინა ღამეს - პრაქტიკულად, გამთენიას, თამაშის დღე რომ დგებოდა. ძალიან ძნელია ასე - ჩამოხვიდე, გახვიდე მინდორზე და ითამაშო... ორი დღით ადრე მაინც უნდა ჩამოვსულიყავით...

- ნუთუ მარტო ეს იყო მიზეზი?

- ძირითადი მიზეზი ეს იყო. კიდევ იყო ერთი მიზეზი - ძალიან დიდი წნეხის ქვეშ ვიყავით. უდიდესი აჟიოტაჟი იყო მაშინ საქართველოში. თქვენ წარმოიდგინეთ, პოლიტიკაც კი გაქრა ტელეეკრანებიდან, მთავარი თემა ფეხბურთი იყო... სწორედ ამიტომ მინდა ვთქვა: მაქსიმალურად უნდა ვეცადოთ, რომ ჩვენი ფეხბურთელები წნეხს ავარიდოთ.

- როგორ უნდა ვითამაშოთ ბელარუსთან?

- როგორც ვთამაშობთ, ისე უნდა ვითამაშოთ. ამ ნაკრებმა გვაჩვენა, რომ თამაში იცის და შეუძლია. ნაკრები უკვე წლებია, ერთად მოდის. მარტამდე ცოტა დროა, რადიკალურად ვერც ჩვენი ნაკრების სათამაშო სტილი შეიცვლება და ვერც ბირთვი. კარგია, შინ რომ ვთამაშობთ, მაგრამ დამიჯერეთ - ერთი თამაში რომ არის, ძალიან რთულია. ამ ერთი თამაშის ჩატარება ყველას შეუძლია და ეს, გარკვეულწილად, გვიმცირებს საშინაო კედლების უპირატესობას. მე მაინც მგონია, რომ უკეთესი იქნებოდა, 2-მატჩიანი პლეი ოფი ყოფილიყო. თუმცა მაინც მჯერა, რომ საქართველოს ნაკრები ბელარუსზე უკეთესი გუნდია და ამ განსხვავებას მინდორზე ყველა ერთად ვნახავთ.

- რას ელით ჩვენი მეტოქისგან?

- ველი "მეორე ნომრად" თამაშს. ისინი შეეცდებიან, ძალიან ყურადღებით ითამაშონ დაცვაში, ჩაჭრან ბურთი და განავითარონ კონტრშეტევები. აქედან გამომდინარე, მთელი შეხვედრის განმავლობაში მაქსიმალური კონცენტრაციით უნდა ვითამაშოთ.

1805
მკითხველის კომენტარები / 0 /
მსგავსი ამბები
რუბრიკის სხვა სიახლეები
;