გიორგი ნემსაძის სანაკრებო იმედები: მარტო მოგება კი არა, თამაში და წამოსული თაობა მახარებს

გიორგი ნემსაძე ერთა ლიგაზე საქართველოს ნაკრების წარმატებულ გამოსვლაზე გველაპარაკა. "ჯვაროსნებისა" და თბილისის "დინამოს" ყოფილი კაპიტანი მიიჩნევს, რომ ვლადიმირ ვაისმა ნაკრების სტილი ზუსტად შეარჩია და რომ საინტერესო თაობა წამოვიდა...

- საქართველოს ნაკრების გამოსვლამ გულშემატკივარი გაახარა და დააიმედა. გუნდის წინსვლა აშკარად იგრძნობა.

- ჩვენ ამ ნაკრებმა ისეთი დიდი სიხარული მოგვანიჭა, რომლის მსგავსიც ქართულ ფეხბურთს ბოლო ათწლეულები არ მოუნიჭებია. ეს ფაქტია და ძალიან კარგი განწყობა შექმნეს. მე არა მხოლოდ მოგება მახარებს, არამედ თამაშის ხარისხია გაუმჯობესებული. ამას ემატება თამაშის ის სტილიც, რომელიც ქართველებს ძალიან გვიყვარს და გვხიბლავს. გამოჩნდა, ხანგრძლივი მუშაობით რა შედეგის მიღწევა შეიძლება. გუნდს საკუთარი ხელწერა დაატყო.

- საქართველოს ნაკრებს უცხოელები ვერაფერს უგებდნენ და უცნაურია, ეს სლოვაკმა სპეციალისტმა როგორ მოახერხა.

- მან მთავარი იცის: არც ერთ ნაკრებს უცხო სტილი არაფერს არგებს. ადრე "ლელოში" მისი ინტერვიუ წავიკითხე, სადაც ამბობდა - ყიფიანის "დინამო" ძალიან მომწონდაო. ანუ ქართულ ფეხბურთს იცნობდა და კარგი ქნა, რომ სხვა სტილის დანერგვა არ სცადა. ჩვენი ფეხბურთელები ინგლისელების ან გერმანელების სტილით ვერ ითამაშებენ, აქ ჩვენთვის ახლობელი ფეხბურთია საჭირო, რაც ჩვენს ხასიათსა და სისხლშია, რაც ყველაზე კარგად გვეხერხება და გამოგვდის.

- დამაიმედებელი ისაა, რომ გუნდი საკმაოდ ახალგაზრდული შემადგენლობისაა.

- ესაა ყველაზე სასიხარულო და დამაიმედებელი. ფეხბურთელთა 80 პროცენტი ახალგაზრდაა, ან ახლა იწყებს კარიერას და შიშით არ ვიქნებით, 2-3 წელიწადში ვინ წამოვაო. პირიქით, ეს თაობა ნაკრებში კარგა ხანი იქნება და მათი ყურება 6-7 წელი მაინც მოგვიწევს. ეს თაობა ზრდას და განვითარებას ახლა იწყებს, ბევრს კაცური ჯანი რომ მოუვა, კიდევ უფრო უკეთ გამოჩნდება. დღევანდელების გარდა, კიდევ რამდენიმე პერსპექტიული მოთამაშე იზრდება და დარწმუნებული ვარ, მათ ნაკრების კარს მალე გაუღებენ.

- გულისხმობთ 17-წლამდელთა ნაკრების ყოფილ მოთამაშეებს, რომლებიც თქვენი ხელმძღვანელობით თამაშობდნენ?

- რა თქმა უნდა, ამ გუნდში ძალიან ნიჭიერი ბავშვები იყვნენ. სხვა ასაკობრივ ნაკრებებშიც ბევრი საინტერესო მოთამაშეა. ესეც ვაისის დამსახურებაა, რომელიც ენდო მათ და ამ პატარა ბიჭებმა, გამოცდილებთან ერთად, ქართული ფეხბურთის სახე წარმოაჩინეს. გუნდმა იცის ბურთის დაჭერა, რის გარეშეც შეტევის წამოწყება შეუძლებელია. ეს ხერხდება და ჩანდა, რომ ამ კომპონენტში მყარად ვართ, ბიჭები თავდაჯერებულები თამაშობენ და შეტევებს კარგად ამზადებენ. ეს ძალიან დიდი პლუსია.

- მაგრამ ყველაზე დაბალ დივიზიონში გამოვდივართ და მეშინია, ამან ილუზიაში არ ჩაგვაგდოს, თითქოს, ქართულ ფეხბურთში ყველაფერი გამოსწორდა.

- მესმის, ხანგრძლივი რეგრესის შემდეგ ყველაფერი იდეალურად ვერც იქნება. მაგრამ პროგრესი აშკარაა და ამაზე თვალებს ვერ დავხუჭავ. ზოგადად, მიმაჩნია, რომ კარგიცაა, დაბალ დივიზიონში რომ დავიწყეთ.

- კარგი რა კუთხით არის?

- ასე გუნდი უკეთ შეთამაშდება, თავდაჯერებული გახდება და მერე ზემოთა ლიგაში უკეთესი გუნდი გვეყოლება.

- უცნაური ისაა, რომ ხშირად ნაკრები ცენტრალური თავდამსხმელის გარეშე თამაშობს. უფრო ძლიერ მეტოქეებთან ასე გაგვიჭირდება.

- ქვილითაიას და მჭედლიძის ტრავმა ძალიან დიდი დანაკლისია. პლუს კაჭარავა გვყავს და მე მისი იმედიც მაქვს.

- კაჭარავა თავიდან ნაკრებში ბევრად უფრო თამამი იყო. ისეთი შთაბეჭდილება რჩება, რომ ბოლომდე ვერ გაიხსნა. არადა, პოტენციალი აქვს...

- მეც დარწმუნებული ვარ, რომ ნიკას ბევრად მეტი შეუძლია. მან სერბეთთან ისეთი თამაში ჩაატარა, შეუძლებელია, პოტენციალი არ ჰქონდეს. დარწმუნებული ვარ, რომ ქვილითაია და მჭედლიძე მომჯობინებიან, კაჭარავა ფორმაში შევა და გუნდი უკეთ ათამაშდება.

- რა კომპონენტის გამოსწორებას ისურვებდით?

- ახლა გუნდს ტემპის აღება და შეტევაში სწრაფად გადასვლა ბევრად უკეთ გამოსდიოდა, ვიდრე წინა წელს. ვისურვებდი, რომ ეს უფრო და უფრო მეტი ვიხილო. ვაისმა გუნდს ხელი ამ კუთხითაც აშკარად დაატყო, ბურთის უაზრო თრევა აღარ გვახასიათებს და შეტევებს სწრაფად ვიწყებთ. ეს კაცი სულ ამას ცდილობდა და შედეგი გამოჩნდა. დარწმუნებული ვარ, ვაისის ხელში გუნდი კიდევ უფრო სწრაფ ფეხბურთს ითამაშებს. მეორე, რასაც ყურადღება მივაქციე: გუნდი ბურთის დაკარგვისას დაცვაში უფრო სწრაფად დახევას სწავლობს - ეს მხარეც რომ გაუმჯობესდება, ბევრად უკეთესი გუნდი გვეყოლება.

ყოველდღიური სპორტული გაზეთი "ლელო"
1448
მკითხველის კომენტარები / 0 /
მსგავსი ამბები
რუბრიკის სხვა სიახლეები
;