გიორგი რეხვიაშვილი საბურთალოში ითამაშებს

გიორგი რეხვიაშვილმა სეზონის დასრულების შემდეგ თბილისის "ლოკომოტივი" დატოვა და მას შემდეგ ლამის ყველა დარწმუნებული იყო, რომ 29 წლის ფეხბურთელი "რუსთავში" გადავიდოდა

მშობლიური ქალაქის მადააღძრული კლუბი არა მხოლოდ მას, სხვა ამბიციური მოთამაშეებისთვისაც მიმზიდველი აღმოჩნდა...

მაგრამ საქართველოს ნაკრების მცველმა "საბურთალოში" თამაში ამჯობინა. რეხვიაშვილი თბილისურ კლუბს გუშინ თურქეთში შეუერთდა და მზადება დაიწყო.
"მოხარული ვარ, "საბურთალოში" რომ გადმოვედი.

მოთამაშეების უმეტესობას ვიცნობ და ბევრთან ვმეგობრობ კიდეც. მათგან ვიცი, რომ "საბურთალოში" კარგი გარემოა, ჰყავთ კვალიფიციური მწვრთნელი, აქვს საინტერესო ვარჯიშები.

ყველაფერია საიმისოდ, ფეხბურთი რომ ითამაშო და შედეგი აჩვენო. "საბურთალოს" ფეხბურთიც ძალიან მომწონს - გუნდური, სწრაფი და შემტევი თამაში. სხვათა შორის, მოლაპარაკება ორიოდე წლის წინაც გვქონდა, მაგრამ მაშინ ვერ შევთანხმდით, ახლა კი ეს მოვახერხეთ.

"საბურთალო" პროგრესირებადი კლუბია, სწორ გზაზე დგას და ვითარდება. წლეულს კარგი შემადგენლობაა შეკრებილი და მინიმუმ სამეულში უნდა მოვხვდეთ", - ამბობს რეხვიაშვილი.

მან გასულ სეზონსა და კლუბზეც ილაპარაკა: "ლოკომოტივში" ნორმალური სეზონი მქონდა. თავიდან კარგად დავიწყეთ, თუმცა ბოლოში რაღაც დაგვაკლდა. ვისარგებლებ შემთხვევით და ჩემი ყოფილი კლუბის ფეხბურთელებს, მწვრთნელებსა და ხელმძღვანელებს მადლობას გადავუხდი.

რაც შეეხება ახალ სეზონს, ვფიქრობ, ეროვნული ლიგა ძალებს იკრებს, გუნდები ძლიერდებიან და წლეულს კიდევ უფრო საინტერესო ჩემპიონატი გველის".

აქვე ვიტყვით, რომ "საბურთალო" თურქეთში მოსამზადებელ ეტაპს აგრძელებს და დღეს მორიგ ამხანაგურ შეხვედრას რუმინეთის უმაღლესი ლიგის ბინადარ "სეპსთან" გამართავს. მატჩი თბილისის დროით 17 საათზე დაიწყება.

შეგახსენებთ, რომ პირველი საკონტროლო შეხვედრაც რუმინულ კლუბთან, "კონკორდიასთან" შედგა და "საბურთალოს" გამარჯვებით 2:1 დასრულდა.

ყოველდღიური სპორტული გაზეთი "ლელო"
1117
მკითხველის კომენტარები / 0 /
მსგავსი ამბები
რუბრიკის სხვა სიახლეები
;