გიორგი ტურძილაძე: სერბეთში გამარჯვება ენით აუწერელი სიხარული იყო [VIDEO]

საქართველოს ნაკრების მთავარი მწვრთნელი ილიას ზუროსი არასოდეს ერიდებოდა ახალგაზრდა კალათბურთელების ოფიციალურ მატჩებში გამოცდას. ამის ნათელი მაგალითი თებერვლის ფანჯარა იყო, როცა სამი დებიუტანტი გამოიძახა - გიორგი კორსანტია, გიორგი ტურძილაძე და საბა ლობჯანიძე.

ტურძილაძეს პირველ შეხვედრაში ძალიან ცოტა დრო ერგო, მეორეში - სერბეთთან კი, მწვრთნელი თამამად ენდო და გიორგიმაც გაუმართლა. როგორი ემოციით გამოვიდა მოედნიდან სერბეთთან გამარჯვების შემდეგ გიორგი ტურძილაძის ინტერვიუდან შეიტყობთ.

[სერბეთი-საქართველო 94:90] ილიას ზუროსი: იცით, რა გამეხარდა მოგებაზე მეტად?

საუბარი კი, კორონავირუსით გამოწვეული პაუზით დავიწყეთ.

- საქართველოს ჩემპიონატის რეგულარული ეტაპი დასასრულს უახლოვდებოდა, მალე პლეი ოფი უნდა დაწყებულიყო. ასეთ დროს სპორტისთვის ძალიან ცუდი რამ მოხდა - პანდემიის გამო სპორტული ცხოვრება შეჩერდა. მეც რაჭაში გავემზავრე, სადაც მშობლიურ რაიონში მქონდა ინდივიდუალურად ვარჯიშის საშუალება. თუმცა, მოგეხსენებათ, განმარტოვებით წვრთნა, გუნდურ ვარჯიშს ვერ შეცვლის.

- ამასობაში გადაწყდა, რომ კარიერას საფრანგეთში განაგრძობ...

- ჩემი მენეჯერი სხვადასხვა ვარიანტზე მუშაობდა, თუმცა საბოლოოდ "რუეილში" თამაში გადავწყვიტე. იგი საფრანგეთის რიგით მესამე დივიზიონის წარმომადგენელია. იყო შეთავაზება მაღალი ლიგებიდანაც, თუმცა ამ ეტაპზე მსურდა უცხოელებისთვის თავი კარგად გამეცნო, რისი საშუალებაც "რუეილში" აუცილებლად მომეცემა. ვიცი, რომ სათამაშო დრო საკმარისად მექნება, დანაჩენი კი ჩემზეა დამოკიდებული. კონტრაქტი ერთწლიანია.

- კლუბის ხელმძღვანელობას მიზნებზე თუ ელაპარაკე?

- რა თქმა უნდა. მეორე ლიგაში გადასვლისთვის ვიბრძოლებთ. საამისოდ ძლიერ შემადგენლობასაც კრებენ. საფრანგეთის მეორე ლიგაში მოხვედრა კი უმაღლესლიგური კლუბების დაინტერესების მშვენიერი შესაძლებლობაა.

- ბოლო გუნდი, რომელმაც ნაკრებში მოხვედრის შანსი მოგცა თსუ იყო. თუმცა, ვიდრე სტუდენტურზე ვიტყოდეთ, მოკლედ მოგვიყევი, სად და როდის დაიწყე კალათბურთის თამაში.

- 8 წლისა ვიყავი, გია კაზანჯიანთან "აკადემიაში" რომ მივედი. 15 წლისა რუსთავში გადავედი, შემდეგ იყო "არმია", სლოვენიის "ოლიმპია", ესპანეთის "ლეონი"... 17 წლისა სლოვენიაში კემპზე რომ მიმიწვიეს, ლიუბლიანის "ოლიმპიაშიც" დავრჩი, თუმცა ერთი წლის შემდეგ ესპანეთში გადასვლა გადავწყვიტე და ესპანურ "ლეონთან" ერთად ება ლიგა ვითამაშე.

- ესპანეთიდან უკვე სუპერლიგაში დაბრუნდი...

- ერთი წელი "მგზავრებში" გავატარე, ორი სეზონი "კაკტუსში" ვიყავი, ხოლო წლეულს თსუ-სთან ერთად მაღალი მიზნებისთვის ვიბრძოდი, თუმცა, სამწუხაროდ, სეზონი ვერ დასრულდა.

- დიდი ხნის განმავლობაში თსუ სატურნირო ცხრილის სათავეში იყო. რა მიგაჩნია ამის მიზეზად?

- ერთი კონკრეტული მიზეზის დასახელება გამიჭირდება. დავიწყოთ იქიდან, რომ თსუ-ში საკუთარ კალათბურთელზე ძალიან ზრუნავენ, ვარჯიშები მაღალ დონეზეა, ისევე როგორც დისციპლინა. მშრომელ კალათბურთელს თსუ-ში ადგილის დამკვიდრება ძალიან უადვილდება. მიხარია, რომ ამ სეზონში თამაშით ნაკრების მწვრთნელის ყურადღება მივიპყარი.

- "ჯვაროსნებში" დებიუტი შვეიცარიასთან მატჩში გქონდა. როგორი იყო შთაბეჭდილება?

- გამარჯვება, რა თქმა უნდა სასიხარულოა, მაგრამ ისე ვერ ვითამაშე, როგორც მსურდა. მწვრთნელმაც შემატყო, რომ ვნერვიულობდი და გამომცვალა. საერთოდ, ზედმეტად ემოციური არ ვარ, მაგრამ, ჩემს სიტუაციაში, შეიძლება, ბევრი კალათბურთელი აღმოჩნდეს - ნაკრებში პირველ მატჩს ატარებ სპორტის სასახლის გადაჭედილი ტრიბუნების წინაშე, თამაშობ ევრობასკეტის შესარჩევის პირველ, დაძაბულ შეხვედრას...

- ილიას ზუროსმა პრესკონფერენციაზე თქვა - შანსი კიდევ მიეცემაო...

- სამი დღის შემდეგ, ბელგრადში, სერბეთთან მოედანზე რომ გავედი, ყოველგვარი დაძაბულობა მოხსნილი მქონდა. თავისუფლად ვითამაშე, გავაკეთე ის, რაც მწვრთნელისგან მქონდა დავალებული. ამაში, ცხადია, ხელი გუნდმაც შემიწყო. სერბეთში ყველა კალათბურთელმა მაღალ დონეზე ითამაშა. ზოგისთვის, შეიძლება, მოულოდნელიც იყო საქართველოს ნაკრების ბელგრადში გამარჯვება, მაგრამ არა ჩვენთვის - არ ვიცი, რას ფიქრობდნენ გულშემატკივრები, სერბი კალათბურთელები, მაგრამ საქართველოს ნაკრებში საბრძოლო განწყობა იყო და ენით აუწერელი სიხარული განვიცადე, როდესაც მატჩის საფინალო სირენა გაისმა და ტაბლოს შევხედე - 94:90 ჩვენს სასარგებლოდ.

943
მკითხველის კომენტარები / 0 /
მსგავსი ამბები
რუბრიკის სხვა სიახლეები
;