გიორგი ფოფხაძე: როცა ფეხბურთი შენი ცხოვრებაა, ჩაფხუტითაც ითამაშებ

დღეს გორის "დილა" საშინაო ასპარეზზე თბილისის "დინამოს" მიიღებს. რა თქმა უნდა, შეხვედრის მიმართ ინტერესი ძალიან დიდია. ეს შეხვედრა განსაკუთრებულად შეიძლება ერთმა მოვლენამ აქციოს: არის შანსი, გიორგი ფოფხაძე ხანგრძლივი პაუზის შემდეგ დაუბრუნდეს მინდორს...

გიორგის ამბავი ყველამ ძალიან კარგად ვიცით: "ლოკომოტივთან" შეხვედრაში მძიმე ტრავმა მიიღო. თავიდან ისე ჩანდა, რომ საქართველოს ნაკრების მცველი ფეხბურთს უნდა ჩამოშორებოდა, მაგრამ საქმისადმი უზომო სიყვარულმა თავისი გაიტანა და ფოფხაძე სათამაშოდ მზადაა.

სხვადასხვა დროს მას უთამაშია დანიაში, ავსტრიაში, აზერბაიჯანსა და პოლონეთში. საქართველოს ეროვნული ნაკრების შემადგენლობაში კი 11 მატჩი ჩაატარა.

გუშინ "ლელო" გიორგი ფოფხაძეს გაესაუბრა...

- გიორგი, თავდაპირველად თქვენი ჯანმრთელობის მდგომარეობის შესახებ უნდა გკითხოთ...
- ყველაფერი კარგადაა. უკვე ერთი თვეა, რაც ვვარჯიშობ. შეიძლება, "დინამოსთან" შეხვედრაშიც დავუბრუნდე მინდორს. ვნახოთ, რა და როგორ იქნება.

- ფსიქოლოგიურად როგორ ხართ? ბევრს გარკვეული შიში რჩება მძიმე ტრავმის შემდეგ...
- ეს შიში რომ მქონოდა, გულწრფელად გეუბნებით, საერთოდ დავანებებდი ფეხბურთს თავს. არანაირი შიში! ვეცდები, ეს უშუალოდ თამაშებისას დავამტკიცო.

- თამაში ჩაფხუტით ხომ არ მოგიწევთ?
- კი, ჩაფხუტით უნდა ვითამაშო. ექიმებმა ასეთი დირექტივა მომცეს და რა უფლება მაქვს, არ დავემორჩილო?!

- ხომ არ გაგიჭირდებათ?
- როცა უზომოდ გიყვარს ფეხბურთი, როცა ის შენი ცხოვრებაა, ჩაფხუტითაც ითამაშებ. ვერ ვხედავ ვერანაირ პრობლემას.

- ახლა, ალბათ, შეიძლება ამაზე ღიად ლაპარაკი. გაიხსენეთ ის დღეები, როცა ტრავმას ებრძოდით...
- ძალიან რთული იყო... როცა ჩაწოლილი ხარ ორი თვის განმავლობაში, მოწყვეტილი ხარ საყვარელ საქმეს... ეს მართლა ძალიან რთულია. ღმერთის წყალობით, საკუთარ თავში ვიპოვე ძალა და თან ძალიან დამეხმარა ადამიანების თანადგომაც.

- ამაზე ცალკე უნდა გკითხოთ...
- რა თქმა უნდა, ჩემთვის ურთულეს მომენტში გვერდით მედგა ოჯახი. გარდა ამისა, ჩემი კლუბის წევრები, უბრალო გულშემატკივრები... მუდმივად ვგრძნობდი ხალხის ყურადღებას, ეს მაძლიერებდა და დღემდე მაძლიერებს.

- ალბათ, თქვენი პირველი მიზანი "დილასთან" ერთად უმაღლეს ლიგაში ადგილის შენარჩუნებაა...
- რა თქმა უნდა, პირველი მიზანი ეს არის. და კიდევ: უპირველეს ყოვლისა, საკუთარ თავს უნდა დავუმტკიცო, რომ ფეხბურთის კარგად თამაში კიდევ შემიძლია. ამისთვის ყველაფერს გავაკეთებ.

- "დილა" გვარიანად გადასხვაფერებული დაგხვდათ...
- კი, ახალი ფეხბურთელები დამხვდნენ და მწვრთნელიც ახალია. გიორგი დარასელიასთან შეხება ადრეც მქონია. ასე რომ, ამ მხრივ არანაირი პრობლემა არ არის. "დილაში" თავს ძალიან კარგად და კომფორტულად ვგრძნობ. ახალი მოთამაშეებიდანაც ბევრს ვიცნობდი.

- უნდა გკითხოთ საქართველოს ეროვნულ ჩემპიონატზეც...
- ქართველებს ცოტა გვიჭირს მოთმენა. კი, ჩვენმა კლუბებმა ცუდად ითამაშეს ევროთასებზე, მაგრამ ჩვენ მხოლოდ დიდი გზის დასაწყისში ვართ და მჯერა, ვითარება გამოსწორდება. მე რომ დავბრუნდი საქართველოში სათამაშოდ, მაშინ, ამ სიტყვის სრული მნიშვნელობით, ჭაობში ვიყავით. ახლა თანდათან ამოვდივართ აქედან. ჩვენს პირველობას აშკარად ვამჩნევ უკეთესობას.

ყოველდღიური სპორტული გაზეთი "ლელო"

1510
მკითხველის კომენტარები / 0 /
მსგავსი ამბები
რუბრიკის სხვა სიახლეები
;