გიორგი ქვილითაია: საქართველოს ნაკრები ვალდებულია, ერთა ლიგაზე წარმატებით ითამაშოს!

საქართველოს ეროვნული ნაკრების 24 წლის ფორვარდი გიორგი ქვილიაია ბოლო მატჩებში უბრალოდ შეუჩერებელია ავსტრიის ჩემპიონატში. იქაური ბუნდესლიგის ბოლო ტურში ჩვენებურმა "აუსტრიასაც" გაუტანა. არადა, იყო პერიოდი, როცა გიორგის გოლის გატანა უჭირდა.

ქვილითაია რომ კარგ ფორმაშია, ეს საქართველოს ნაკრების ბოლო მატჩებმაც დაადასტურა, როცა იგი ერთ-ერთი საუკეთესო იყო მინდორზე. არ შეიძლება, გიორგის ასეთი ფორმა არ გვახარებდეს, რაკი ერთა ლიგა კარს მოგადგა - უმნიშვნელოვანესი ტურნირი ზოგადად ქართული ფეხბურთისათვის.

გუშინ "ლელო" ავსტრიაში შეეხმიანა ვენის "რაპიდის" შემტევს და მასთან ინტერვიუ ჩაწერა.

- "საგოლე გვალვა" დაასრულეთ და გოლი გოლზე გაგაქვთ - რამ განაპირობა ეს?

- თუ გახსოვთ, ბოლოს რომ ვისაუბრეთ, ვთქვი, ასეთი პერიოდი ყველა თავდამსხმელის კარიერაში არის - მეთქი და შევთანხბდით ამაზე. რა თქმა უნდა, არ იყო იოლი ჩემთვის ეს. "რაპიდი" ავსტრიაში ყველაზე ტრადიციული და ცნობილი კლუბია. ბევრი ქომაგი ჰყავს და მოთხოვნაც დიდია. საქართველოშიც იყო კრიტიკა. მე ყველაფერს ვაკეთებდი იმისათვის, რომ უკან მომეტოვებინა ეს პერიოდი. ვარჯიშების შემდეგ ვრჩებოდი და სხვადასხვა კომპონენტებზე ვმუშაობდი. ასევე აზრს ვეკითხებოდი ყოფილ თავდამსხმელებს, რა და როგორ შეიძლებოდა, რომ გამეკეთებინა. კარგია, რომ ეს პერიოდი დასრულდა.

- ერთა ლიგაზე ცალკე უნდა გკითხოთ...

- ქართველი გულშემატკივარი დიდი იმედებით ეგებება ამ ტურნირს. ეს არის ჩვენთვის უნიკალური შანსი და ალბათ, არ იქნება გადაჭარბებული იმის თქმა, რომ ამ ტურნირზე წარმატებით თამაში სასიცოცხლოდ მნიშვნელოვანია ჩვენთვის. მეც და საქართველოს ნაკრების თითოეული ფეხბურთელიც ძალიან ბედნიერები ვართ იმის გამო, რომ ეს შანსი გამოჩნდა ჩვენი თამაშის პერიოდში. ამავე დროს, ეს დიდი პასუხიშმგებლობაა. რა თქმა უნდა, პატივს ვცემ ერთა ლიგაზე ჩვენს ყველა მოწინააღმდეგეს, მაგრამ ჩემი პოზიცია ასეთია - საქართველოს ნაკრები ვალდებულია, ამ ტურნირზე წარმატებით ითამაშოს.

ინტერვიუს სრულ ვერსიას "ლელოს" 17 აპრილის ნომერში გაეცნობით.

933
მკითხველის კომენტარები / 0 /
მსგავსი ამბები
რუბრიკის სხვა სიახლეები