გიორგი ქვილითაია: მოგებას უნდა მივეჩვიოთ!

საქართველოს ეროვნული ნაკრების 24 წლის ფორვარდი გიორგი ქვილითაია ბოლო მატჩებში, უბრალოდ, შეუჩერებელია ავსტრიის ბუნდესლიგაში.

ბოლო ტურშიც, ვენის დერბიში, მან "აუსტრიასაც" გაუტანა, თან მოედანზე შესვლიდან ერთ წუთში. არადა, იყო პერიოდი, როცა ქვილითაიას გოლის გატანა უჭირდა...

ის რომ კარგ ფორმაშია, საქართველოს ნაკრების ბოლო მატჩებმაც დაადასტურა. არ შეიძლება, ქვილითაიას ასეთი კონდიციები არ გვახარებდეს კარსმომდგარი ერთა ლიგის წინ, ტურნირისა, რომელიც უმნიშვნელოვანესია ზოგადად ქართული  ფეხბურთისთვის...

გუშინ "ლელო" ავსტრიაში შეეხმიანა ვენის "რაპიდის" შემტევს და რამდენიმე კითხვით მიმართა...

- საგოლე "გვალვა" დაასრულეთ და ახლა გოლი გოლზე გაგაქვთ. რამ განაპირობა ეს?

- თუ გახსოვთ, ბოლოს რომ ვილაპარაკეთ, ვთქვი - ასეთი პერიოდი ყველა თავდამსხმელის კარიერაში არის-მეთქი. რა თქმა უნდა, ჩემთვისაც არ იყო იოლი ეს პერიოდი.

"რაპიდი" ავსტრიაში ყველაზე ტრადიციული კლუბია, ბევრი ქომაგი ჰყავს და მოთხოვნაც დიდია. საქართველოშიც იყო კრიტიკა. ყველაფერს ვაკეთებდი იმისთვის, რომ უკან მომეტოვებინა ეს პერიოდი.

ვარჯიშების შემდეგ ვრჩებოდი ბაზაზე და სხვადასხვა კომპონენტზე ვმუშაობდი. აზრს ვეკითხებოდი ყოფილ თავდამსხმელებსაც, რა და როგორ უნდა გამეკეთებინა. კარგია, რომ ეს პერიოდი დასრულდა.

- საინტერესოა თქვენი აზრი საქართველოს ნაკრების ბოლო ორ მატჩზე...

- ჩვენ უნდა მივეჩვიოთ მოგებას! ამას ითხოვს საქართველოს ნაკრების მთავარი მწვრთნელი და ეს მოთხოვნა აბსოლუტურად სწორია. ჩვენი დონის ნაკრებებს ვეთამაშეთ და ორივე შეხვედრა დამაჯერებლად მოვიგეთ.

ეს ძალიან კარგია ერთა ლიგის წინ. ტურნირის დაწყებამდე კიდევ გვაქვს ორი ამხანაგური თამაში და იქაც მაქსიმუმი უნდა გავაკეთოთ. მერე უკვე ერთა ლიგა დაიწყება...

რაც შეეხება ჩემს თამაშს, ლიტვასთან მატჩში კმაყოფილი დავრჩი. მეორე შეხვედრაში, ესტონეთთან, ერთი ძალიან კარგი მომენტი მქონდა და დასანანია, რომ ვერ შევძელი მისი გამოყენება.

    გიორგი ქვილითაიას ჰეთ-თრიკი ვოლფსბერგერთან!!! [VIDEO]

- ერთა ლიგაზე ცალკე უნდა გკითხოთ...

- ქართველი გულშემატკივარი დიდი იმედებით ეგებება ამ ტურნირს. ეს არის ჩვენთვის უნიკალური შანსი და, ალბათ, არ იქნება გადაჭარბებული იმის თქმა, რომ ამ ტურნირზე წარმატებით თამაში სასიცოცხლოდ მნიშვნელოვანია ჩვენთვის.

მეც და საქართველოს ნაკრების თითოეული ფეხბურთელიც ძალიან ბედნიერები ვართ იმის გამო, რომ ეს შანსი გამოჩნდა სწორედ ჩვენს პერიოდში. ამავე დროს, ეს დიდი პასუხისმგებლობაა. რა თქმა უნდა, პატივს ვცემ ერთა ლიგაში ჩვენს ყველა მოწინააღმდეგეს, მაგრამ ჩემი პოზიცია ასეთია - საქართველოს ნაკრები ვალდებულია, ამ ტურნირზე წარმატებით ითამაშოს.

- ამ დროისთვის, "რაპიდი" ავსტრიულ ბუნდესლიგაში მესამე ადგილზეა. რა მიზნები დაისახა გუნდმა სეზონის დაწყების წინ? რა შესრულდა ან რა ვერ შესრულდა?

- მიზანი თავიდანვე სამეულში მოხვედრა იყო, პლუს ამას - წარმატებით თამაში ავსტრიის თასზე. ახლა ჩემპიონატში მესამე ადგილზე ვართ, ხოლო თასზე - ნახევარფინალში, სადაც ოთხშაბათს გასვლაზე "შტურმს" ვეთამაშებით. ურთულესი თამაში იქნება, რადგან ავსტრიაში სათასო მატჩები ერთრაუნდიანია. იმედი მაქვს, ფინალში ჩვენ გავალთ.

- და ბოლოს, როგორ პირად შედეგს გეგმავთ სეზონის ბოლოსთვის?

- ბოლო 8 თამაშში ამდენივე გოლი გავიტანე. მეორე წრეში, ზამთრის შესვენების შემდეგ, ყველაზე მეტი გოლი სწორედ მე დამიგროვდა ბუნდესლიგაში. პირველ წრეში ჯერ ტრავმამ გამაცდენინა 8 მატჩი, მერე მწვრთნელს უფრო ხშირად შეცვლაზე შევყავდი, იყო თამაშებიც, როცა სადღაც მე-60 წუთისთვის მცვლიდნენ.

ეს გასაგებია, რადგან აქ დიდი კონკურენციაა. ზედაპირულად რომ გადავხედოთ, ბევრი მატჩი ვითამაშე, მაგრამ წუთობრივად ეს დრო არცთუ ბევრია.

რა თქმა უნდა, კლუბშიც და ნაკრებშიც ჩემთვის სეზონის მეორე ნახევარი უფრო წარმატებულია. ალბათ, არ იქნება ურიგო, თუ სეზონის ბოლომდე კიდევ 3-4 გოლის გატანას შევძლებ.

ყოველდღიური სპორტული გაზეთი "ლელო"
820
მკითხველის კომენტარები / 0 /
მსგავსი ამბები
რუბრიკის სხვა სიახლეები