გიორგი ქინქლაძე: ტკივილამდე საწყენი იყო სიტიდან წასვლა... ცრემლები წამომცვივდა [VIDEO]

რუსულმა ინტერნეტგამოცემა sports.ru-მ გამოაქვეყნა ძალიან საინტერესო და თბილი წერილი, რომელიც "მანჩესტერ სიტისა" და ქართული ფეხბურთის ცოცხალ ლეგენდას, გიორგი ქინქლაძეს ეძღვნება.

მართალია, ეს ეხება მისი კარიერის მხოლოდ იმ პერიოდს, რომელიც "სიტიში" გაატარა, მაგრამ რუსი ჟურნალისტის ნამუშევარი მაინც ერთი ამოსუნთქვით იკითხება...

"მე მქონდა წასვლის შანსი. "ბარსელონამ" და სხვა კლუბებმა გამოხატეს ინტერესი. მე კი მინდოდა, "სიტი" პრემიერლიგაში დამებრუნებინა. ეს იყო მძიმე გადაწყვეტილება", - გიორგი ქინქლაძე.

ვინც რა უნდა თქვას და, "მანჩესტერ სიტის" აქვს თავისი ისტორია. ჩვენ ვიწყებთ კლუბის ლეგენდების გახსენებას. გადავწყვიტეთ, ჩვენი რუბრიკა დავიწყოთ გიორგი ქინქლაძით - "სიტის" "ათიანით", რომელიც დღემდე ამ კლუბის ქომაგთა გულებშია.

ის იყო ნამდვილი შუქი გვირაბის ბოლოს. ის იყო შუქურა, რომელიც მარტო, მაგრამ ამაყად ანათებდა. მან ინგლისურ პრემიერლიგას საუკეთესო კუთხით გააცნო ქართული ფეხბურთი.

   ⇒გიორგი ქინქლაძე \"მანჩესტერ სიტის\" ყველა დროის 10 საუკეთესში დაასახელეს

ვეწვიოთ 90-იანი წლების "სიტის". არანაირი სტაბილურობა. გუნდი ჯერ პრემიერლიგაში ადგილის შესანარჩუნებლად იბრძვის, მერე კი დივიზიონიდან დივიზიონში ინაცვლებს. არადა, დღეს სტაბილურობა "სიტიში" ჩვეულებრივი ამბავია.

ის დრო "სიტის" ერთგული გულშემატკივრებისთვის ნამდვილი კოშმარია. და მაინც, იყო ერთი ვარსკვლავი, რომელიც ენთო მარტო და ამაყად. საქმე ეხება ახალგაზრდა ქართველს, ვისაც სიყვარულით "ქინქის" ეძახდნენ.

"მეინ როუდი" ჭკუაზე გადადიოდა მისი დიდებული დრიბლინგების შემყურე. ქინქლაძის გოლი "საუთჰემპტონის" კარში კი საკულტოდ ითვლება კლუბის მთელ ისტორიაში.

მას შემდეგ, რაც "სიტი" პრემიერლიგიდან ჩემპიონშიფში დაქვეითდა, ქართველმა კლუბში დარჩენის გადაწყვეტილება მიიღო. ამან ქინქლაძე ადგილობრივი გულშემატკივრების თვალში ნამდვილ კერპად აქცია. სააშკარაოზე გამოგვაქვს ერთ-ერთი წერილი, რომელიც "ქინქიმ" "სიტის" ქომაგებისაგან მიიღო.


"ეს წერილი შეიცავს დიდ თხოვნას შენ მიმართ, გიო. ჩვენი სურვილია, ერთი სეზონის განმავლობაში კიდევ დარჩე "სიტიში".

გასაგებია, რომ შენთვის ეს შეიძლება არ იყოს საუკეთესო არჩევანი, მაგრამ ახლა ჩვენს გუნდს ავარჯიშებს კარგი დამრიგებელი და ფულიც არის იმისთვის, რომ შემადგენლობა გაძლიერდეს.

ჩვენ დიდი იმედი გვაქვს, რომ მალე შესაძლებელი იქნება გვირაბის ბოლოს ცისფერი ზეცის დანახვა. ეს სეზონი სრული კოშმარი იქნება შენ გარეშე. შენ მოგვეცი ბრძოლის სტიმული.

ჩვენ, უბრალოდ, ვიტყვით - შენ საუკეთესო ხარ! შენ ერთ-ერთი ყველაზე  პოპულარული ფეხბურთელი ხარ ბოლო 30 წლის განმავლობაში! შენ ჩვენ გვიყვარხარ.

შენ საუკეთესო ხარ და ძალიან გვჭირდები. თუ მომავალ სეზონში ჩვენი მდგომარეობა არ იქნება უკეთესი, შეგიძლია, წახვიდე. ამ დროისთვის მხოლოდ 24 წლის იქნები.

მადლობას გადაგიხდით და წადი. ეს მნიშვნელოვანია "სიტის" ყველა ქომაგისთვის მთელ მსოფლიოში. ეს მნიშვნელოვანია ყველა იმ ადამიანისთვის, ვინც ამ წერილს აწერს ხელს".

გიორგი ქინქლაძე "სიტის" ქომაგებისთვის ყველა დროის ლამის ყველაზე საყვარელი ფეხბურთელია. კიდევ დიდი ხნის განმავლობაში შეიგრძნობა მისი გავლენა გუნდის თამაშზე.

"სიტის" მაშინდელმა პრეზიდენტმა ფრენსის ლიმ, ის საქართველოსა და უელსის მატჩის შემდეგ "მოჩხრიკა". ლიმ იმ შეხვედრის ვიდეოჩანაწერი ნახა და აღფრთოვანდა ახალგაზრდა ქართველის თამაშით.

იქამდე ქინქლაძეს ჰქონდა უცხოეთში დამკვიდრების ვარიანტები, მაგრამ გერმანული და უკრაინული მცდელობები წარმატებით ვერ დასრულდა. საბოლოო ჯამში, მან გერმანულ "ზაარბრიუკენში" მხოლოდ 11 მატჩი ჩაატარა, მერე იყო არგენტინული გრანდი "ბოკა ხუნიორსი", სადაც ვერ შეეგუა ადგილობრივ გარემოს...

ქინქლაძეს ჰქონდა ესპანური ვარიანტიც, მაგრამ საბოლოოდ ლიმ კლუბისთვის დიდი ფული, 2 მილიონი ფუნტი გამოყო "ქინქის" სანაცვლოდ და დაარწმუნა ფეხბურთელი, რომ კარიერა სწორედ ინგლისში გაეგრძელებინა.

თავიდან ქინქლაძეს გაუჭირდა ცივ ინგლისურ კლიმატთან შეგუება, მაგრამ ყველაფერი მოგვარდა მას შემდეგ, რაც მანჩესტერში ჩავიდა გიოს დედა და კიდევ ორი ქართველი. მათ იქ ჩაიტანეს ქართული კონიაკი და მთელი ჩანთა გემრიელობები.

სულ მალე ქინქლაძე პრემიერლიგის ნამდვილ მშვენებად იქცა. მაშინ ინგლისური ლიგა ღარიბი იყო ტაქტიკური თვალსაზრისით, დაბალი იყო ტექნიკური დონე. იყო ბევრი უხეშობა და ორთაბრძოლებზე კეთდებოდა აქცენტი. მეტოქეებმა სწრაფად დააფასეს ქართველი.

არადა, ქინქლაძეცა და მისი გარემოცვაც თვლიან, რომ გაცილებით მეტის მიღწევაც შეიძლებოდა. მაშინდელი "სიტის" ყველა მწვრთნელი ქინქლაძის გარშემო აშენებდა გუნდს, თავად ქართველს კი საფეხბურთო ანალიტიკოსები აკრიტიკებდნენ იმისთვის, რომ ყოველთვის დიდი მონდომებით არ მუშაობდა დაცვაში, იმისთვის, რომ ის ერიდებოდა ორთაბრძოლებს და ტოპბომბარდირების დონეზე ვერ გაჰქონდა გოლები.

"ქინქი" აღიარებდა, რომ თავის დროზე ჯეროვან ყურადღებას არ უთმობდა მნიშვნელოვან საფეხბურთო ელემენტებს. ის ფიქრობდა, რომ ფეხბურთში წარმატების მიღწევა მხოლოდ ნიჭის ხარჯზე შეიძლებოდა. არ მოიძებნა ადამიანი, რომელიც მას ყველა ვარჯიშზე თავდადებით მუშაობას აიძულებდა.

"სიტის" მაშინდელი მენეჯმენტი ქინქლაძესთან დაკავშირებით ერთ მეტად მნიშვნელოვან პრობლემას შეეჩეხა. ქართველი ვერ ეწერებოდა 4-4-2 ტაქტიკურ განლაგებაში, რომელსაც მაშინ ყველა ინგლისური კლუბი იყენებდა. ალან ბოლმა ტაქტიკურ ექსპერიმენტებს მიმართა, რათა ეპოვა ოპტიმალური ადგილი ქართველისთვის.

"ის მორიდებული იყო ორი რამის გამო. არ იცოდა ინგლისური და არ იცოდა, ინგლისურად როგორ ებრძოლა ბურთისთვის. ბიჭს უდიდესი ტალანტი ჰქონდა, მე ვიცოდი, რომ თუ მას ბურთს მიაწვდიდი, ის გაიბრწყინებდა. გახსოვთ პირველი თამაშები, მისი ერთი-ორი გენიალური შეხება ბურთთან?" - იხსენებს ბოლი.

იდეამ ფრთები ბოლომდე ვერ შეისხა. შეიძლება, იმიტომაც, რომ ქართველს ძალიან დიდი ტვირთი აჰკიდეს. მას კი უნდოდა, თავისი საყვარელი საქმით ყოფილიყო დაკავებული და მოეტყუებინა ნელი ინგლისელები.

ქინქლაძე იმ ფეხბურთელების კატეგორიას მიეკუთვნება, ვის დიდებულებასაც ვერ განსაზღვრავ ციფრებით და ტიტულებით. მისი ღირსება იყო მატჩის კონკრეტული მონაკვეთის გალამაზება.

"ქინქის" დიდებულმა თამაშმა "სიტი" სხვა ქართველებით დააინტერესა. ასე გამოჩნდნენ "მეინ როუდზე" მიხეილ ყაველაშვილი, მურთაზ შელია, კახა ცხადაძე... ვერცერთმა მათგანმა ვერ შეძლო, ოდნავ მაინც მიახლოვებოდა ქართველის მიღწევას.


ლაიამ გალაჰერს მოსკოვში ჰქონდა კონცერტი. გახურებაზე მან შეიტყო, რომ კონცერტზე ქინქლაძე იყო ჩამოსული. თავის კერპთან შეხვედრის გამო გალაჰერმა ერთი საათით გადადო ღონისძიება.

ქინქლაძემ "სიტიში" სულ 3 სეზონი ითამაშა და აქედან მხოლოდ ერთი - პრემიერლიგაში. 107 შეხვედრაში მან 16 გოლი გაიტანა. მათ შორისაა დიდებული გოლი "მიდლსბროს" კარში და ასევე ჩვენგან ზემოთ ნახსენები - "საუთჰემპტონის" კარში.

1998 წლის ზაფხულში "სიტი" ინგლისის რანგით მესამე დივიზიონში გავარდა. მწვრთნელად მოვიდა ძველი ფეხბურთის აპოლოგეტი ჯო როილი. მან გადაწყვიტა ქინქლაძის გაყიდვა, რათა შემოსული ფულით შემადგენლობა გაეძლიერებინა.

საბოლოო ჯამში, "სიტის" ფანებმა თვალზე ცრემლით გააცილეს ქინქლაძე "აიაქსში", კლუბის სალარო კი ერთობ სოლიდური თანხით, 5 მილიონი ფუნტით შეივსო. როილი, ალბათ, მართალი იყო. მომდევნო ორ სეზონში მისი ხელმძღვანელობით "სიტი" პრემიერლიგას დაუბრუნდა.

"ტკივილამდე საწყენი იყო ჩემთვის "სიტიდან" წასვლა. "აიაქსმა" კონტრაქტის ყველა დეტალი შეათანხმა. ბოლო მატჩის შემდეგ გულშემატკივრებთან მივედი, რომ "უბრალოდ" მადლობა მეთქვა ყველაფრისთვის. ცრემლები წამომივიდა. არ მინდოდა წასვლა და ვქვითინებდი. ახლა რომ ვიყო იმავე სიტუაციაში და ჩემთვის "ბარსელონას" დაეძახა, მაინც "სიტიში" დავრჩებოდი", - ყვება გიორგი.

ის ასეთია. კაშკაშა, ქარიშხლისებური, ემოციური... შეიძლება მხოლოდ იოცნებო იმაზე, რა სიმაღლეებს მიაღწევდა გიორგი, დღეს რომ "სიტიში" ყოფილიყო.
დღეს ხომ "სიტის" ისეთი ადამიანი წვრთნის, რომელმაც კარგად იცის, როგორ გამოიყენოს ტალანტი...

ყოველდღიური სპორტული გაზეთი "ლელო"
5096
მკითხველის კომენტარები / 0 /
მსგავსი ამბები
რუბრიკის სხვა სიახლეები