გიორგი ქინქლაძე: ინგლისში მცველები ფეხების მომტვრევით მემუქრებოდნენ [VIDEO]

...დრო გადის. "სიტიში" მიდიან ახალი ვარსკვლავები, მაგრამ ამ კლუბის გულშემატკივრებისთვის გიორგი ქინქლაძე კვლავ რჩება უსაყვარლეს მოთამაშედ. "დეილი მეილი" ინგლისში ერთ-ერთი ყველაზე პოპულარული გამოცემაა. სწორედ მან მიუძღვნა ვრცელი წერილი ჩვენებურ ვარსკვლავს, ვინც "ქალაქელთა" შორის 90-იანი წლების შუაში ბრწყინავდა...

"ძალიან ბედნიერი ვარ იმის გამო, რომ ინგლისში ვითამაშე. რომ შემეძლოს ახლა არჩევა, ისევ "სიტიში" ვითამაშებდი. როცა ვადევნებ თვალს "სიტის" შეხვედრებს, ხანდახან მეუფლება შეგრძნება, რომ ეს იქნებოდა ჩემთვის შესაფერისი გუნდი. სილვა, სტერლინგი, დე ბრუინი - ეს ხომ "ფლეისთეიშენის" გუნდს ჰგავს. ვთქვათ, აგუეროს პასს ისე მივცემდი, რომ მისკენ გახედვა არც კი დამჭირდებოდა...

გიორგი ქინქლაძე \"მანჩესტერ სიტის\" ყველა დროის 10 საუკეთესში დაასახელეს

ცდება ის, ვინც ფიქრობს, რომ ადვილია პეპ გვარდიოლას გაწვრთნილ გუნდში თამაში. ყველა თამაშში ბოლომდე უნდა დაიხარჯო. მესიც რომ იყოს და ვერ ითამაშოს, სკამზე დაჯდება. ყველაზე ღირებული ქომაგების ტაშია. როცა კარიერა დასრულდება, ეს მოგონება შენთან უნდა იყოს. მე ყველაფერი ისე მახსოვს, თითქოს გუშინ მოხდა", - ეს, რა თქმა უნდა, გიორგი ქინქლაძის სიტყვებია.



"მანჩესტერ სიტის" დიდი ფანი, "ოაზისის" სოლისტი ნოელ გალაჰერი ამბობდა: "ის ან ყველაზე საშინელია, ან ყველაზე გამორჩეული. ჩემს ცხოვრებაში ასეთი არაფერი მინახავს".

ამ ამბიდან 19 წლის შემდეგ ნოელის ძმა, ლაიამი, მისთვის სათაყვანებელი "სიტის" ჩემპიონობას აღნიშნავდა. 2014 წელი იდგა. ის გიორგი ქინქლაძეს შეხვდა. ქინქლაძეს უბრალოდ აღმერთებენ "სიტის" ქომაგები.

დიახ, იყო "იუნაიტედის" ინტერესი. მაშინ იქ თამაში ყველას უნდოდა. შემეძლო, გაცილებით პოპულარული გავმხდარიყავი... მაშინ მე არ მიფიქრია ტიტულების მოგებაზე. "იუნაიტედი" ჩვენი მთავარი მეტოქე იყო და იქ გადასვლაზე არ მიფიქრია. ეს გამორიცხული იყო

"მაშინ მცველები ხშირად ამბობდნენ, რომ ფეხებს მომამტვრევდნენ. ჩემთვის კი, რაც მეტი მცველი იყო, მით უკეთესი - მე შემეძლო მათ შორის გავლა. მაშინ მე ვერ ვლაპარაკობდი ინგლისურად. ჩვენი მწვრთნელი ალან ბოლი ვარჯიშებზე ამბობდა, ბურთი გიოს მიეცითო. ეს ჩემთვის დიდი გამოწვევა იყო და ბევრს ვცდილობდი, თუმცა როგორც მახსოვს, პირველ სეზონში, 11 ტურის შემდეგ, სულ 2 ქულა იყო ჩვენს ანგარიშზე".

ქინქლაძე ინგლისში საქართველოდან ჩამოვიდა. მაშინ იქ იყო ომი, ქინქლაძე კი თბილისის "დინამოს" ლიდერი გახლდათ. კლუბის პრეზიდენტმა გაყიდა გუნდის ლიდერები. ეს იყო ზრუნვა მათ უსაფრთხოებაზე...



ქინქლაძე ერთი ხანობა არგენტინაში, "ბოკაში", ვარჯიშობდა: "მარადონა კარიერის დასრულებას აპირებდა. ის თამაშობდა ჩემს პოზიციაზე. ვუყურებდი და ვფიქრობდი, რომ ის ჩემი კუმირია. მე არ შემეძლო მასთან კონკურენცია და საქართველოში დაბრუნება გადავწყვიტე".

ქინქლაძემ ზღაპრული გოლი გაიტანა უელსთან საგარეო შეხვედრაში - 20 იარდიდან გადაუგდო ბურთი თავზე ნევილ საუთჰოლს. "სიტის" პრეზიდენტმა ფრენსის ლიმ ქართველის სანაცვლოდ 2 მილიონი გირვანქა გაიღო.

"პირველად მან სადილზე დამპატიჟა. ჩემთვის თავიდან ყველაფერი მხოლოდ სამუშაოს ჰგავდა. მანქანა და "სიტის" თამაში უნდა მემართა. ვარჯიშებზე დამიგვიანია. არ ვიცოდი ქუჩები და ინგლისური, თუმცა მესმოდა ყველაფერი გასახდელში, თუნდაც, უცენზურო სიტყვები. ქალაქი დიდებული იყო. "მეინ როუდზე" კი დიდებული ატმოსფერო გახლდათ. სტადიონი ყოველთვის სავსე იყო, მაშინაც კი, როცა ჩვენ ქვედა ლიგაში ვთამაშობდით"...

გიორგი ქინქლაძე: ტკივილამდე საწყენი იყო სიტიდან წასვლა... ცრემლები წამომცვივდა [VIDEO]

1995-96 წლების სეზონის ბოლო შეხვედრაში "სიტი" "ლივერპულს" დაუზავდა - 2:2. "სიტიმ", "საუთჰემპტონმა" და "ქოვენთრიმ" 38-38 ქულა მოაგროვეს. "სიტის" ფეხბურთელებს თამაშის ბოლოს ეგონათ, რომ მათთვის ყველაფერი იდეალურად მიდიოდა, კუთხურის ალამთან ჰქონდათ ბურთი და დროც კი გაჰყავდათ...

"ეს ჩემთვის ძალიან სამწუხარო მოგონებაა. სტივ ლომასს დრო გაჰყავდა. ამ დროს ხალხმა ყვირილი დაიწყო და მივხვდი, რომ სიტუაცია შეიცვალა. დრო აღარ იყო მდგომარეობის გამოსწორებისთვის... მე ინგლისში მოგებისათვის ჩამოვედი და ყველაფერი სხვანაირად მოხდა. ჩავედი გასახდელში და ვტიროდი, ჩაფიქრებული ვიყავი"...



როცა ქინქლაძე ჩავიდა ინგლისში, ძვირადღირებული "ფერარი" იყიდა. მალე ის ავტოავარიაში მოჰყვა.

"ფრენსის ლი მირჩევდა, არ მეყიდა ეს მანქანა. მე ჩემი გავაკეთე. რა თქმა უნდა, მერე სხვა მანქანა ვიყიდე", - ამბობს ქინქლაძე.

ის ყველას არ ეხატებოდა გულზე. "სიტის" ფორვარდი პოლ უოლში ამბობდა, რომ "სიტის" პრობლემებს სწორედ ქინქლაძე უქმნიდა. "მისი როლი გუნდში გაზვიადებული იყო. გოლები ვერ გაჰქონდა და თავითაც ვერ თამაშობდა", - ამბობდა ის.

"ის ტექნიკური თვალსაზრისით უძლიერესი ფეხბურთელი იყო. ასეთთან ერთად ნამდვილად არასოდეს მითამაშია. სტადიონზე ხალხი სპეციალურად დადიოდა, რათა მისი თამაში ენახა. და მაინც, ვფიქრობ, ქინქლაძე ვერ ითამაშებდა გვარდიოლას გუნდში, რადგან ვერ შეძლებდა მოედანზე რიგი სამუშაოების შესრულებას".

"ეჭვი და შური არასოდეს მიგრძვნია. შეიძლება, რამდენიმე ჩემს თანაგუნდელს უნდოდა კიდეც, რომ ისე ეთამაშათ, როგორც მე. შემტევი ვიყავი, მცველი არ ვყოფილვარ და ეს რა გასაკვირია? დღეს "სიტი" ექვსი შემტევი ფეხბურთელით თამაშობს, მაგრამ ყველა მათგანი ჩადის დაცვაში".

1997 წლის გაზაფხულზე ქინქლაძის გადაბირება "მანჩესტერ იუნაიტედს" უნდოდა. მაშინ "სიტი" მე-14 ადგილზე გავიდა. გუნდმა 3 მწვრთნელი გამოიცვალა - ალან ბოლი, სტივ კოპელი და ფრენკ კლარკი.

ქინქლაძემ "სიტიში" დარჩენა გადაწყვიტა. "რედინგთან" შეხვედრის შემდეგ გუნდის 25 ათასმა გულშემატკივარმა პეტიცია შეადგინა და ქინქლაძეს დარჩენა სთხოვა.



"იმიტომ დავრჩი, რომ გულშემატკივრებისგან დიდ სიყვარულს ვგრძნობდი. მინდოდა, ჩემი პასუხიც ასეთივე ყოფილიყო. იმედი მქონდა, რომ გუნდთან ერთად პრემიერლიგაში დავბრუნდებოდი. შემეძლო, სხვაგან წავსულიყავი და ორმაგი ხელფასი ამეღო. ერთი წლის შემდეგ "აიაქსში" სწორედ ასეთი ანაზღაურება მქონდა, მაგრამ მთავარი ხალხის სიყვარულია და არა - ფული. დიახ, იყო "იუნაიტედის" ინტერესი. მაშინ იქ თამაში ყველას უნდოდა. შემეძლო, გაცილებით პოპულარული გავმხდარიყავი... მაშინ მე არ მიფიქრია ტიტულების მოგებაზე. "იუნაიტედი" ჩვენი მთავარი მეტოქე იყო და იქ გადასვლაზე არ მიფიქრია. ეს გამორიცხული იყო".

მესამე სეზონმა კიდევ უფრო დიდი იმედგაცრუება მოიტანა. "სიტი" ჩემპიონშიფიდანაც გავარდა. გუნდის ახალი მთავარი მწვრთნელის, ჯო როილის გეგმებში ქართველი ბოლომდე ვერ ჯდებოდა. როილმა ის მარცხენა ფლანგზე გადაიყვანა.

"არ ვიცი, ასე რატომ მოიქცა. შეიძლება, ანდრეი კონჩელსკისში ავერიე".

ქინქლაძემ "სიტიში" სამი სეზონი ითამაშა, 20 გოლი შეაგდო და გულშემატკივრებს თავი ძალიან შეაყვარა.

"არ შეიძლება, არ მოვიწყინო, რადგან აქ მე გამარჯვებებისთვის მოვედი, ჩვენ კი დავმარცხდით. დღესაც მხვდება ხალხი ქუჩაში, მაჩერებს და მადლობას მიხდის იმისთვის, რაც გავაკეთე. ეს ქალაქი ჩემი მეორე ოჯახია".

4990
მკითხველის კომენტარები / 0 /
მსგავსი ამბები
რუბრიკის სხვა სიახლეები
;