გიორგი ქოჩორაშვილის კილომეტრები: ყველაზე მეტი 'ჟირონაში', - ქართველი ესპანეთში შეაქეს

გიორგი ქოჩორაშვილმა "ჟირონაში" გასულ კვირას სადებიუტო თამაში ჩაატარა - ჯერ, "საბადელის" წინააღმდეგ, შემდეგ "ტოტენჰემთან".

"საბურთალოს" აღზრდილმა 19 წლის ნახევარმცველმა ინტერვიუში განაცხდა, რომ ესპანური ლა ლიგის მთავარ გუნდში საუკეთესო სტატისტიკა აღმოაჩნდა.

"ჩვენი საყრდენი ნახევარმცველი "ვალიადოლიდში" გადავიდა და მისი ამპლუის მოთამაშე დასჭირდათ. პირველი გუნდის მთავარმა მწვრთნელმა ეუსებიომ ძალიან დიდი ნდობა გამოხატა და პირველად "საბადელთან" მომცა თავის გამოჩენის შესაძლებლობა. ამას ესპანეთში ძალიან დიდი გამოხმაურება მოჰყვა.

არავინ მიცნობდა და უცებ მწვრთნელმა პირველი გუნდის ძირითად შემადგენლობაში მათამაშა. ამის შემდეგ იყო, რომ "ტოტენჰემთანაც" მომეცა შანსი, მართალია, მცირე დროით, მაგრამ ესეც სასიამოვნო იყო.

"ტოტენჰემი" ისეთი გუნდია, მის წინააღმდეგ ბევრი შიშით ითამაშებდა, მაგრამ ისინიც ისეთივე ადამიანები არიან, როგორც ყველა დანარჩენი. კარგი გარემო იყო - სავსე ტრიბუნები და კარგი ქომაგობა, რაც ფეხბურთელს დამატებით მოტივაციას აძლევს.

მატჩის შემდეგ მწვრთნელმა ჩემ მიმართ საქებარი სიტყვები არ დაიშურა. აღმოჩნდა, რომ "საბადელთან" ყველაზე მეტი კილომეტრი მე დავფარე, სპრინტებიც საკმაო რაოდენობით დამიგროვდა.

იოლი არ არის, აქაურ ტემპს აჰყვე, თუმცა ვცდილობ, ავყვე. "საბურთალოში" აკადემიის დირექტორი ესპანელი ანდრეს კარასკო იყო, რომლის ხელმძღვანელობითაც ბევრი ვისწავლე და ესპანურ ფეხბურთთან შეგუება ამიტომ მიადვილდება.

ყველაფერს ვაკეთებ და მომავალშიც შევეცდები, მაღალი დონის ფეხბურთელად ჩამოვყალიბდე. ვფიქრობ, წლეულს პრიმერა დივიზიონში თამაშის საშუალება მომეცემა, რადგან ესპანეთის ჩემპიონატი ხანგრძლივი ტურნირია. მთავარია, მეორე გუნდში თამაშები მაღალ დონეზე ჩავატარო, დანარჩენს კი დრო გვაჩვენებს", - ამბობს ქოჩორაშვილი.

ყოველდღიური სპორტული გაზეთი "ლელო"
1002
მკითხველის კომენტარები / 0 /
მსგავსი ამბები
რუბრიკის სხვა სიახლეები