გიორგი შერმადინი: ვერ ავდგებით და დაუკითხავად ვერ წამოვალთ

საქართველოს კალათბურთელთა ნაკრები 23 თებერვალს წლის ყველაზე მნიშვნელოვან მატჩს გამართავს - ავსტრიას დაუპირისპირდება.

როგორი შემადგენლობით გავა ჩვენი გუნდი უშუალო კონკურენტთან სათამაშოდ? დაგვეხმარებიან ევროლიგელები, თორნიკე შენგელია და გიორგი შერმადინი?

ჯერჯერობით, ამ შეკითხვებზე პასუხი არ გვაქვს. თუმცა, შეგვიძლია, მოვისმინოთ თავად შერმადინის მოსაზრება, რომელსაც ინტერვიუსთვის მალაგაში დავუკავშირდით.

საუბარი კვირის მატჩით დავიწყეთ, რომელიც მან 16 ქულითა და "მურსიასთან" გამარჯვებით დაასრულა. შეხვედრის საუკეთესო კალათბურთელადაც დასახელდა.

ამ შეხვედრაში საინტერესო იყო ბოლო წუთები, როდესაც გიორგი და მისი უშუალო კონკურენტი ჯეიმს ოგასტინი მწვრთნელმა ჟოან პლაზამ მოედანზე ერთდროულად გაიყვანა.

- ვფიქრობ, ჩვენი მოედანზე ერთდროულად ყოფნა გუნდისთვის სასარგებლო იყო. ოგასტინმა არაერთი კარგი პასი მომცა, არც მე დავრჩი ვალში. იგი გახარებული იყო - ვარჯიშებზეც არაერთხელ უთქვამს, გვერდიგვერდ რომ ვთამაშობთ, კარგად გამოგვდისო. ძალიან კარგი პიროვნებაა.

მწვრთნელს ჩვენი ერთდროულად თამაშის გადაწყვეტილება, შესაძლოა, ჯეფ ბრუკსის ტრავმამაც მიაღებინა, რომელიც მძიმე ფორვარდის პოზიციაზე თამაშობს.

- პასები ახსენე და არ შეიძლება არ ითქვას: განსაკუთრებით ამერიკელებს ძალიან ენანებათ გადაცემები პარტნიორებისთვის...

- ამ მხრივ სიტუაცია ნელ-ნელა რეგულირდება. გვყავს კალათბურთელები, რომლებიც მართლაც მაღალი დონისანი არიან, მაგრამ ევროპაში პირველ სეზონს ატარებენ. ადაპტაციისთვის დრო სჭირდებათ. ცხადია, მწვრთნელი მათაც და სხვებსაც გუნდური თამაშისკენ მოუწოდებს...

- სეზონის დასაწყისში ჩავარდნა, ალბათ, გუნდის შემადგენლობის განახლების მიზეზი იყო. სათამაშო დროც არასაკმარისი გქონდა.

- თავიდან ყველას გაუჭირდა. ბევრი მატჩი წავაგეთ, თამაშის დალაგებას ვერ ვახერხებდით. ფარქვეშაც არ მოდიოდა პასები. შემდეგ ნელ-ნელა თამაში გამოვასწორეთ, ყველა კალათბურთელი საკუთარ ადგილს პოულობს.

ჩემკენაც მოდის გადაცემები. როდესაც მეტოქე სამწამიან ზონაში ძალების მობილიზებას არ ახდენს, ვცდილობთ, აქცენტი ფარქვეშ გადავიტანოთ, ერთი-ერთზე თამაშისას ქულების მოგროვებას ვახერხებ.

არის მატჩები, როცა მეტოქე ფარს არ გვანებებს. მაგალითად, "ბურგოსთან" შეხვედრაში ცენტრი მმეურვეობდა, მას მძიმე ფორვარდი ეხმარებოდა, ხოლო თუ ბურთს იატაკზე დავარტყამდი, ჩვენი გამთამაშებლის მეურვეც ჩემკენ გამორბოდა.

რთულია, ასეთ დროს ფარქვეშ უპირატესობის მოპოვება, სამაგიეროდ, დანარჩენებს უთავისუფლდებათ სივრცე.

- მწვრთნელი ბოლო წუთებზე უფრო ავგუსტინს ენდობა...

- რა გითხრა? ამ თემაზე მწვრთნელთან არც მილაპარაკია და ჩემი მხრიდან არ იქნება გამართლებული. მწვრთნელია და საკუთარი მოსაზრება აქვს. ჩემი საქმეა, ვივარჯიშო და იმ დროში, რაც მერგება, მაქსიმუმი გავაკეთო.

- ნოემბერში ნაკრებს მსოფლიოს საკვალიფიკაციოზე ვერ დაეხმარე. რა იქნება თებერვალში?

- როდესაც ფიბა-მ მსოფლიოს ჩემპიონატის საკვალიფიკაციო მატჩები რამდენიმე თვეზე გადაანაწილა, ძალიან მესიამოვნა. ასეთ სიტუაციაში ხომ კალათბურთელებს სამშობლოში ჩამოსვლის, ახლობლების ნახვისა და თბილისში თამაშის შესაძლებლობა გვექნებოდა.

თან, ზაფხულში კალათბურთელებს დასვენების საშუალება მოგვეცემოდა. საქართველოს ნაკრებში 2005 წლიდან ვარ და მას მერე სეზონს ივლისის დასაწყისიდან ვიწყებ. ახალი სისტემის მიხედვით კი ივლისის პირველი რიცხვებიდან კლუბის შეკრებამდე თავისუფალი ვიქნები.

- თუმცა ახალ სისტემას ბევრი ხარვეზი აღმოაჩნდა...

- თავიდან ნამდვილად არ მეგონა, რომ ნაკრებში კლუბის გამო ვერ ვითამაშებდი. ფიბა და ევროლიგა ერთმანეთთან ვერ თანხმდებიან და ევროლიგის კლუბებიც იყენებენ თავის უფლებას, არ გამოუშვან კალათბურთელები ნაკრებში.

ძალიან მინდოდა ნაკრებს სერბეთსა და გერმანიაში დავხმარებოდი, მაგრამ სწორედ სანაკრებო პაუზისას ჩვენი გუნდის მწვრთნელმა ვარჯიშები დანიშნა. თუ ზემოდან არ შეთანხმდნენ, კალათბურთელებს არაფრის შეცვლა არ შეგვიძლია.

ვერ ავდგებით და დაუკითხავად ვერ წამოვალთ. ევროლიგის გუნდებში ვთამაშობთ, კონტრაქტები და პასუხისმგებლობები გვაკავშირებს.

- 23 თებერვალს ავსტრიაში ვითამაშებთ. უნდა გვქონდეს გიორგი შერმადინის იმედი?

- ნამდვილად არ ვიცი, სიტუაცია როგორ შეიცვლება. საქართველოს კალათბურთის ფედერაციამ "უნიკახაში" ოფიციალური წერილი უკვე გამოგზავნა ჩემი გაშვების თხოვნით.

თუმცა, რა გადაწყდება, ჯერ არ ვიცი. ფინელი საშა სალინის ნაკრებში გაშვება ჩვენს კლუბს ფინეთის სპორტის მინისტრმა პირადად სთხოვა, მაგრამ ისევე როგორც მე, სალინიც ელის. "უნიკახაში" სამი კალათბურთელი ვართ, რომლებსაც ნაკრებში გველიან - მე, სალინი და პოლონელი ვაჩინსკი.

რაც შეეხება სერბებს, მილოსავლევიჩს და ნედოვიჩს, ისინი მწვრთნელმა საშა ჯორჯევიჩმა თებერვლის მატჩებისთვის არ გამოიძახა.

- საქართველოს ნაკრებში ნოემბრის მატჩებში ახალგაზრდა გოგა ბითაძემ ითამაშა...

- ძალიან კარგი ბიჭია. რაც მთავარია, ჭკვიანია, თავდადებული და შრომისმოყვარე. ადრიატიკის ლიგას ბევრი ადევნებს თვალს და ჩემი სერბი თანაგუნდელებიც მეკითხებიან - ვინ არის, ასე კარგად რომ თამაშობსო. მეც ვპასუხობ - ძალიან მაგარია-მეთქი.

არ ვიცი, მისი აგენტები რას ფიქრობენ, მაგრამ გოგას შეუძლია NBA-ს დრაფტზე ტოპ-10-ში მოხვდეს. ოღონდ, არ უნდა იჩქაროს, ყველაფერი კარგად გააანალიზოს.

ბითაძეს ზაზა ფაჩულიას სახით კარგი მაგალითი აქვს. ზაზამ ხომ თავისი შრომით იმდენს მიაღწია, რომ მსოფლიოს საუკეთესო გუნდშია. თანაც სასტარტოში.

- ნაკრებელთაგან ყველაზე ხშირად თორნიკე შენგელიას ნახულობ. გასულ კვირაშიც ითამაშეს თქვენმა გუნდებმა ევროლიგაზე...

- ჩვენი შეხვედრა თუ მალაგაში შედგა, თამაშის შემდეგ აუცილებლად ვეპატიჟები, თუ ვიტორიაში ვხვდებით, თორნიკე ისე არ მიშვებს, რომ რესტორანში არ დავსხდეთ და არ ვისაუბროთ.

ძალიან კარგი ურთიერთობა გვაქვს. შენგელია ევროპაში ერთ-ერთი საუკეთესო ფორვარდია. მისნაირი თავდამსხმელი იშვიათობაა: ფიზიკურად ძალიან ღონიერია, დაცვაშიც მაღალ დონეზე თამაშობს, ხოლო თავდასხმაში წარმოუდგენელია ერთი-ერთზე შეაჩერო.

ამიტომაა, თორნიკეს წინააღმდეგ მეტოქეები ერთმანეთს ყოველთვის რომ ეხმარებიან. რაც მთავარია, იგი წარმატებული გუნდის ლიდერი და კაპიტანია. ბოლო მატჩში "ბასკონიამ" "ბარსელონა" გაანადგურა, ფაქტობრივად, პირველ ტაიმში მოუგო.

ბასკებს ევროლიგის ტოპ-8 გუნდში მოხვედრის კარგი შანსი აქვთ. ჩვენ თამაში აღარ უნდა წავაგოთ თუ მიზნის მიღწევა გვინდა.

- ესპანეთის ჩემპიონატში ქულების მიხედვით თანაბრად ხართ.

- ესპანეთის პირველობაზე ორივე გუნდი კარგად მიდის, მაგრამ ჩვენი მთავარი ამოცანა შიდა ჩემპიონატში საბოლოო შედეგების მიხედვით "ვალენსიას" გასწრებაა.

წინააღმდეგ შემთხვევაში ევროლიგაზე ვერ მოვხვდებით. "ბარსელონას", "რეალსა" და "ბასკონიას" ევროლიგასთან კონტრაქტები აკავშირებთ და მომავალ სეზონში ამ შეჯიბრებაში ისედაც ითამაშებენ.

მათ გარდა კიდევ ერთი საგზური თამაშდება, რომლის მოპოვებაშიც ჩვენი უშუალო კონკურენტი "ვალენსიაა". ეს გუნდი მოქმედი ჩემპიონია და წლეულსაც კარგად გამოდის.

- ბოლოს ქალაქზე გკითხავ. ანდორას შემდეგ როგორია მალაგაში ცხოვრება?

- მალაგა ლამაზი ქალაქია, მრავალფეროვანია. ძირითადად მზიანი ამინდებია, თუმცა ქარი იცის. ამას წინათ, ბექა ბურჯანაძემ დადო ანდორას ფოტო, თოვლი იყო.

იქ მართლაც ძალიან ცივა, თან პატარა ქალაქია. სხვათა შორის, "ანდორას" გენერალურ მენეჯერს "რეალთან" გამარჯვება მივულოცე და მითხრა - გვენატრებიო. ძალიან სურდათ ამ სეზონშიც მათ გუნდში მეთამაშა... თუმცა ჩემ გარეშეც ძალიან კარგად თამაშობენ, ბექა რომ დაბრუნდება კიდევ უფრო გააძლიერებს.

ყოველდღიური სპორტული გაზეთი "ლელო"
3664
მკითხველის კომენტარები / 0 /
მსგავსი ამბები
რუბრიკის სხვა სიახლეები
;