[ინტერვიუ] გიორგი ჩაკვეტაძე: ყველაფერს გავაკეთებ, რომ ბელარუსთან მატჩისთვის 100 პროცენტით მზად ვიყო!

გიორგი ჩაკვეტაძე მინდორს დაუბრუნდა. ეს ბოლო დროის მოვლენებს შორის ერთ-ერთი ყველაზე გამორჩეული და მნიშვნელოვანია. ქართველი გულშემატკივარი "გენტის" შემტევს უდიდეს იმედებს უკავშირებს. მარტში საქართველოს ეროვნულ ნაკრებს უმნიშვნელოვანესი შეხვედრა ელის ბელარუსთან და ჩაკვეტაძის დაბრუნება პირდაპირ მისწრებაა ჩვენი ქვეყნის უპირველესი გუნდისთვის...

გუშინ "ლელო" ბელგიაში დაუკავშირდა გიორგი ჩაკვეტაძეს და რამდენიმე კითხვა დაუსვა:

- რას იტყვით იმ პერიოდზე, როცა იძულებით ისვენებდით? ალბათ, ძალიან მოგენატრათ ფეხბურთი...

-  ნამდვილად რთული პერიოდი იყო. არასოდეს მქონია ეს ტრავმა და არ ვიცოდი, რა უნდა გამეკეთებინა, სულ ვეკითხებოდი ექიმებს, ფეხბურთელებს - რა და როგორ იყო... თან დღეში 5-6 საათი სპეციალური ვარჯიშები არ არის იოლი. მით უმეტეს, როცა ხედავ, რომ შენი თანაგუნდელები ჩვეულებრივად ვარჯიშობენ, შენ კი ამ დროს ჩაკეტილი სატრენაჟორო დარბაზში... რთული პერიოდი იყო, მაგრამ ბედნიერი ვარ იმით, რომ დავბრუნდი და ისევ შემიძლია, ჩემი საყვარელი საქმე ვაკეთო.

- რა გრძნობა დაგეუფლათ, როცა მინდორზე გახვედით?

- ემოციურად ძალიან ბედნიერი ვიყავი. ამდენი დრო გავიდა, თითქმის ერთი წელი!.. მინდორზე ფეხი რომ დავადგი, თითქოს ახლიდან დავიბადე... მადლობა ყველას, ვინც ამდენი ხნის განმავლობაში ჩემს გვერდით იდგა და მამხნევებდა.

- ცხადია, დიდი მოლოდინი გაქვთ ბელარუსთან მატჩისა. რას იტყვით ამ შეხვედრის შესახებ?

- ნამდვილად დიდი მოლოდინი მაქვს და არა მხოლოდ მე, არამედ, მთელ საქართველოს. წინ უმნიშვნელოვანესი თამაში გველის და ყველა მაქსიმალურად უნდა მოვემზადოთ, ყველა ფეხბურთელი ოპტიმალურ ფორმაში უნდა შეხვდეს ამ თამაშს! მეც ყველაფერს გავაკეთებ იმისთვის, რომ ბელარუსთან მატჩისთვის 100 პროცენტით ვიყო მზად.

2749
მკითხველის კომენტარები / 0 /
მსგავსი ამბები
რუბრიკის სხვა სიახლეები
;