გიორგი ცეცაძეს ახალი თაობის სჯერა - მოსაგებად შეტევაში გუნდურობა და დამაჯერებლობა დაგვაკლდა

გიორგი ცეცაძემ უელსთან გამართული შეხვედრები შეფასა. საქართველოს ახალგაზრდულმა ნაკრებმა ბრიტანელებთან ორი ამხანაგური მატჩი ჩაატარა და ორივე ფრედ დაასრულა - პირველი 2:2, ხოლო მეორე 1:1.

ამ შეხვედრებში იმ ფეხბურთის ჩანასახი გამოჩნდა, რაც გიორგი ცეცაძის გუნდის შესრულებით სანაკრებო და საკლუბო დონეზე გვინახავს - შემტევი, აგრესიული და მოტივირებული გუნდი, რომელიც ბოლომდე ბრძოლას და თანამედროვე ფეხბურთის ჩვენებას ცდილობს მაინც.

ახალგაზრდულის მთავარმა მწვრთნელმა ეს მატჩები განსხვავებული შემადგენლობებით ჩაატარა, ყველა ფეხბურთელი ათამაშა და წარმოდგენაც შეიქმნა, ვის შეუძლია დაეყრდნოს და სანაკრებო მოთხოვნებს ვინ ვერ აკმაყოფილებს.

- მიუხედავად იმისა, რომ უელსთან ამხანაგური შეხვედრები ჩავატარეთ, ინციდენტებიც იყო და ორივე მხრიდან ასეთი მატჩებისთვის უჩვეულოს დიდი ემოციები ამოაფრქვიეს.

- რა თქმა უნდა, ასე იყო, რადგან მოგება ორივეს გვინდოდა. მიმაჩნია, რომ ჩვენ ეს შეგვეძლო - განსაკუთღებით ბოლო მატჩში უელსის დამარცხების უფრო მეტი შანსი გვქონდა, ვიდრე პირველ მატჩში. საქმე ისაა, რომ გუნდთან გატარებულ ყოველ დღეს ფეხბურთელებს და მთლიანად, ნაკრებს წინსვლას და უკეთესობას ვატყობდი. უხეშად რომ ვთქვათ, ბიჭები ჩემს ჭკუაზე მოდიან და სათამაშო სტილს კარგად ითვისებენ.

ორი ფრე ის შედეგი არ იყო, რაც ჩვენ გვსურდა. მართალია, ამხანაგური შეხვედრები გავმართეთ, მაგრამ მატჩი ოფიციალური იქნება თუ საკონტროლო, ნებისმიერში გამარჯვება გვსურს. მოგება კი სპონტანური ფეხბურთით არ მოდის, ჩვენ კი დაუგეგმავად არ ვმუშაობთ. ვცდილობთ, თანამედროვე ფეხბურთი ვითამაშოთ, რაც ზეპირად და მხოლოდ იმპროვიზაციით წარმოუდგენელია. ფეხბურთელებმა უნდა იცოდნენ, ბურთით თუ უბურთოდ როგორ ითამაშონ და იმოძრაონ.

- ფეხბურთელებზე რას იტყვით?

- მათ მადლობა ეკუთვნით: ბოლო წუთზე გოლს რომ გაუშვებ და წონასწორობას მაინც აღადგენ, ესაა ძალიან კარგი.

- თამაშის ხარისხით კმაყოფილი დარჩით?

- შეცდომები იყო და ცხადია, იმას ვერ ვიტყვი, რომ საუკეთესო ხარისხის ფეხბურთი ვაჩვენეთ. თუმცა, პროგრესი იოლად არ მოდის. ამიტომ შრომას და ხარვეზების გამოსწორებას ვცდილობთ. თანაც, ძალიან კარგი მეტოქე გვყავდა. თავადაც ნახეთ, უელსს რა დონის ფეხბურთელები ჰყავდა და როგორი ფეხბურთი აჩვენეს.

მაგრამ ჩვენ ბიჭებს სასიკეთოდ უნდა ითქვას, რომ თავი არ შეურცხვენიათ. მოკლედ რომ ვთქვათ, დანიის ახალგაზრდულთან რომ ჩავატარეთ, მსგავსი ამბავი მოხდა - გულშემატკივრები ვერ გავახარეთ, მაგრამ არც შერცხვენილვართ. მიზანი კი ესაა - ჩვენიხალხი მოგებებით გავახაროთ. ღვთის წყალობით, ალბათ, დღეს თუ არა, ხვალ ასეც იქნება.

- უელსთან გუნდმა ორი განსხვავებული ტაიმი აჩვენა. არასტაბილურობა პირველ შეხვედრასიც გამოიკვეთა.

- რა თქმა უნდა, ასე იყო და არც გამკვირვებია. არასტაბილური თამაში იქიდან გამომდინარეობდა, რომ დიდი ხანი არაა, რაც ერთად ვმუშაობთ. თანაც, ახლა განახლებული შემადგენლობა მოვიწვიეთ. უელსის მწვრთნელმა თავად აღნიშნა, რომ მეორე შეხვედრაში ერთის გარდა ყველა დანარჩენი ფეხბურთელი შევცვალეთ.

- უელსის დონის ნაკრებთან შეხვედრამდე ეს სარისკო გადაწყვეტილება იყო.

- სულ ვამბობდი, რომ საქართველოში ფეხბურთელები არიან. ოფიციალურ შეხვედრებში რა ფეხბურთიც წინა შემადგენლობამ აჩვენა, უელსთან მოწვეულ მოთამაშეებს იმაზე ნაკლები შთაბეჭდილება არ დაუტოვებიათ. სამწუხაროდ, ეს ჭაბუკების ასაკი არაა, შეკრებები ხშირად რომ ჩავატაროთ. არასტაბილურობა ამის ბრალია, რადგან გუნდთან მუშაობა ახლახანს დავიწყეთ - ვიცი, რასაც ვლაპარაკობ.

შეხვედრის შედეგებით კმაყოფილი ვერ ვიქნები, თუმცა სავარჯიშო პროცესებებზე იგივეს ვერ ვიტყვი. ბიჭების დამოკიდებულებმა და მონდომებამ ძალიან გამახარა. ეს იმას ნიშნავს, რომ ვარჯიშზე ნაჩვენებ ხარისხი მალე თამაშებზე აისახება და შედეგიც იქნება.

- თქვენი აზრით, ახალგაზრდულ ნაკრებში განსაკუთრებით რა კომპონენტია გასაუმჯობესებელი?

- მთლიანობაში, გუნდით კმაყოფილი ვარ, რადგან ძლიერ მეტოქესთან კარგად ვითამაშეთ და ნაყოფიერი შეკრება ჩავატარეთ. დეტალებს რომ ჩავუღრმავდეთ, ბევრი მინუსები გამოჩნდა. ყველაზე მნიშვნელოვანი ეს იყო - თავიდან 70-80 წუთის განმავლობაში ბურთის ართმევაში უკეთესები ვიყავით, ვიდრე შეტევაში. დამამთავრებელ ფაზასა და კომბინირებული თამაშში კი მოსამატებელი გვაქვს. ვ

ცდილობთ, რომ ჩვენი შეტევები სპონტანური არ იყოს - დღეს ფეხბურთელები ზეპირად აღარ თამაშობენ. ახლა ნოემბერი რომ იყო, დარწმუნებული ვარ, გუნდი უკეთ შეთამაშებული იქნებოდა და შეტევის ფაზაც ბევრად გააზრებული კომბინაციებით წარიმართებოდა. წინ უფრო მეტი გუნდურობა და დამაჯერებლობაც უნდა იყოს. ამ ორ შეხვედრაში მოსაგებად სწორედ ეს ორი კომპონენტი დაგვაკლდა.

851
მკითხველის კომენტარები / 1 /
რაჭველი
0
გიას ბევრი სამუშაო აქვს ჩასატარებელი,მთავარია სწორი თამაში,ფეხბურთელბი არ იხსნებიან და პასებს მეტოქის კარისკენ
ზურგშექცეულები ითხოვენ ამას მოყვება უკან პასი და ბურთის დაკარგვა, ძალიან დიდია არაზუსტი გადაცემები.ვისაც ეს არ ესმის იმის ადგილი ნაკ
რებში არ უნდა იყოს დაუწესეთ შეცდომების ლიმიტი
და ვინც ვერ ჩაჯდება აღარ მოწვიოთ,არ ურტყამენ საშულო მანძილებიდან ბუღრიძე მაგარი ბიჭია ის პირველ ნაკრებშიც გაქაჩავს როცა მწვრთნელმა არ იცის
როგორ ათამაშოს გუნდს სწორი ფეხბურთი,მაშინ ჭანტურას და ბუღრიძის მსგავსი ფეხბურთელები გვევლინებიან მხსნელებად.(საუბედუროდ მე არ მეგულება ჩვენთან ამის ნცოდნე მწრთვნელი) რომ
არ ყოლოდა ახალკაცს ყიფიანი ვერაფერს ვერ იზამდა.
ყველა საშუალო დონის გვჯობდა თამაშის ორგანიზაციით ეს ფაქტია.
მსგავსი ამბები
რუბრიკის სხვა სიახლეები
;