გიორგი ცხოვრებაძე: პენალტისტი მე ვიყავი და დავარტყი , სამწუხაროდ, შემდგომ ეტაპზე გასვლის რეალური შესაძლებლობა დავკარგეთ

შეგახსენებთ, რომ საქართველოს ხელბურთელ ვაჟთა ნაკრებმა ევრო 2022-ის პირველ საკვალიფიკაციო ტურნირზე მალტაში მეორე ადგილი დაიკავა - მესამე ტურში კვიპროსთან ერთი ბურთის სხვაობით დამარცხდა, არადა, შეხვედრის ფრედ დამთავრების შემთხვევაში პლეი ოფში ჩვენები გავიდოდნენ. ამის შანსი კი მოგვეცა - ბოლო წამზე კვიპროსელთა კარში პენალტი დაინიშნა.

ის საქართველოს ნაკრებისა და საფრანგეთის „მონპელიეს“ 17 წლის მარჯვენა შუამარბმა გიორგი ცხოვრებაძემ დაარტყა. მეკარემ ბურთი მოიგერია და თავის გუნდს გამარჯვება მოუტანა. არადა, გიორგიმ სამ მატჩში 28 გოლი გაიტანა და მალტის შესარჩევი ტურნირის ბომბარდირი გახდა.

ცხოვრებაძე მალტიდან თბილისში დაბრუნდა. მონპელიეში გამგზავრებამდე მას ინტერვიუ ჩამოვართვით. ცხადია, უპირველესად ის გვაინტერესებდა, შეიძლებოდა თუ არა, 17 წლის ხელბურთელისთვის ასეთ გადამწყვეტ მომენტში ამხელა პასუხისმგებლობა დაეკისრებინათ.

- პენალტის დარტყმა ჩემთვის არავის დაუვალებია, - გვითხრა მან. - ამ ტურნირზე შვიდმეტრიანის ნიშნულთან ყოველთვის მე ვიდექი და კვიპროსელებთან მატჩშიც ექვსიდან ექვსი მქონდა გატანილი. ამიტომ, პენალტი რომ დაინიშნა, ბურთი მე ავიღე, რაც, მგონი, ბუნებრივი იყო. არავის უთქვამს, არ დაარტყაო.

- სანამ ნიშნულთან მიხვიდოდი, რამდენჯერმე პირჯვარი გადაიწერე. ნერვიულობდი?

- ვინ არ ინერვიულებდა? კვიპროსელი მოთამაშეები რაღაცას მეუბნებოდნენ. ირაკლი კბილაშვილი და ირაკლი ჩიქოვანი მოვიდნენ, გამამხნევეს. მეტოქის მეკარე ნუნგოვიჩს ექვსივე შვიდმეტრიანი მისგან მარცხენა მხარეს გავუტანე, მეშვიდეზეც იმავე მხარეს დავუქნიე ხელი და მარცხნივ რომ გადაიხარა, საწინააღმდეგო მხარეს დაბლა დავურტყი. ჩვენდა საუბედუროდ, მარჯვენა ფეხის

გაწევა მოასწრო და ბურთი მოიგერია. რა თქმა უნდა, ყველა მამხნევებდა თამაშის შემდეგ, თვით კვიპროსელებიც კი, თუმცა ის ეპიზოდი სულ თვალწინ მიდგას. ნელ-ნელა გამოვდივარ მდგომარეობიდან.

- ბურთი რომ დაგებზრიალებინა და მეკარისთვის შემოგეტარებინა?

- სპინი ძალიან სარისკო დარტყმაა. იმ კრიტიკულ მომენტში ამის გაკეთება არ შეიძლებოდა.

- არადა, გულდასაწყვეტი იყო იმ მატჩის წაგება.

- ძალიან მძიმე ორთაბრძოლა აღმოჩნდა. პირველი ორი გოლის შემდეგ პერსონალურად ამიყვანეს და ძალიან მჭიდროდ მეთამაშებოდნენ, სხვა ხელბურთელებსაც. სამწუხაროდ, შემდგომ ეტაპზე გასვლის რეალური შესაძლებლობა დავკარგეთ. ივნისში მეორე საპლეიოფო შანსი გვექნება და ის აუცილებლად უნდა გამოვიყენოთ.

- საფრანგეთში საკლუბო სეზონი თებერვალში განახლდება. ძირითად გუნდში გიხილავთ?

- დანამდვილებით იმის თქმა შემიძლია, რომ მომდევნო სეზონიდან მანდ ვიქნები. თუმცა, გამორიცხული არ არის, მწვრთნელებმა ძირითადში ახლაც მიმიწვიონ. თებერვლიდან იქნება ჩემპიონთა ლიგა, საფრანგეთის ჩემპიონატიცა და თასის გათამაშებაც. აქამდე „მონპელიეს“ მხოლოდ მეორე გუნდში ვიყავი ნაციონალურ დივიზიონში. სეზონის ბოლომდე კი, შესაძლოა, ორივეგან ვითამაშო.

ყოველდღიური სპორტული გაზეთი "ლელო"
1088
მკითხველის კომენტარები / 1 /
სოსო
0
ყველა ერთხმად აღნიშნავდა,რომ საქართველო სახელებითაც და თამაშითაც,კვიპროსზე ძლიერი იყო,მაგრამ ჩვენ აზერებთანაც გაგვიჭირდა და კვიპროსთან სულაც წავაგეთ.ეს გამოუყენებელი პენალტი,არაფერ შუაშია,მას ოდესმე,ყველა გააფუჭებს.მაგ პენალტამდე რომ მივიდა საქმე,ეგაა გასარკვევი,რატომ.ბავშვიც მიხვდებოდა,რომ გუნდის ლიდერებს,მჭიდროდ აიყვანდნენ და გუნდი ამისათვის,მზად უნდა ყოფილიყო.არ აღმოჩნდა მზად და სწორედ ეგ არის პრობლემა.რამდენი გოლი გავიტანეთ ხაზიდან?გუნდს ტაქტიკური მრავალფეროვნება არ ეყო.არადა ამდენ გამოცდილ მოთამაშეს,ალბათ შეეძლო ამის განხორციელება,თუკი ამაზე ნამუშევრები იქნებოდნენ.მომავალში,ზოგიერთი ვეტერანი,ალბათ უკვე აღარ გვეყოლება და ოცნება აუსრულებელნი წავლენ სპორტიდან,თუმცა პერსპექტივებიც რომ გვაქვს,ესეც ჩანს.
მსგავსი ამბები
რუბრიკის სხვა სიახლეები
;