გიორგი წიტაიშვილის ფინალი. ანუ მომენტი, როცა უნდა ვიჩქაროთ...

გიორგი წიტაიშვილი უკრაინის 20-წლამდელთა ნაკრებთან ერთად მსოფლიოს ჩემპიონატის ფინალშია. მსოფლიოს ჩემპიონატი, თუნდაც ის 20-წლამდელთა იყოს, ვერაფრით აღიქმება რიგით ტურნირად. ყველაფერს რომ თავი დავანებოთ, იტალიის ნაკრებში რამდენიმე ისეთი ფეხბურთელია, რომელსაც უკვე აქვს სერია A-ში ასპარეზობის გამოცდილება...

საქართველოს ნაკრებს ძალიან რომ აკლია კვალიფიციური ფეხბურთელები, ეს თუნდაც დანიასთან შეხვედრამ დაგვანახა. როცა გუნდს ტრავმების გამო ლიდერები გამოაკლდნენ, მათი ხეირიანად შემცვლელი არ მოიძებნა.

მე მინახავს გიორგი წიტაიშვილის არაერთი თამაში და სრული პასუხისმგებლობით შემიძლია დავწერო - ის ნამდვილად არის ფეხბურთელი, რომელსაც შეუძლია არათუ საქართველოს ნაკრების ძირითად შემადგენლობაში მოხვედრა, არამედ, მისი ლიდერობაც კი, თანაც, საკმაოდ ხანგრძლივი პერსპექტივით.

ამ სტრიქონების ავტორი ერთხელ ესაუბრა გიორგი წიტაიშვილს. მაშინ მას უარი არ უთქვამს საქართველოს ეროვნულ ნაკრებში თამაშზე. ცოტა ორაზროვანი პასუხი კი გამოუვიდა, რომელიც დაახლოებით ასეთი შინაარსისა იყო - ჯერ გამომიძახონ საქართველოს ნაკრებში და მერე გადავწყვეტო...

ჰოდა, ვლადიმირ ვაისმა, თუნდაც საქართველოს ფეხბურთის ფედერაციის რჩევით, უსათუოდ უნდა გამოიძახოს წიტაიშვილი ქვეყნის უპირველეს გუნდში. იმედია, მასთან დაკავშირებით არ შეიქმნება ისეთივე სირთულეები, როგორიც შეიქმნა ზაურ მახარაძესა და ბექა ვაჩიბერაძესთან დაკავშირებით.

ბოლოს და ბოლოს, გვეცოდინება მაინც, გვქონდეს თუ არა წიტაიშვილის იმედი. გაურკვევლობაში ყოფნას ისევ ის ჯობია, ზუსტი პასუხი გავიგოთ, რომელ ქვეყანას მიიჩნევს ის თავის სამშობლოდ და რომელი ქვეყნის ღირსების დაცვა ურჩევნია.

აუცილებლად უნდა ვიჩქაროთ, რადგან, ჩემი აზრით, შორს აღარ არის ის დრო, როცა გიორგის აუცილებლად მიიწვევენ უკრაინის ეროვნულ ნაკრებში და მერე ვითარება გაცილებით უფრო რთული იქნება, ვიდრე არის დღეს.

ასე რომ, სანამ შანსი არის, ასე ვთქვათ, დასწრებაზე უნდა ვიმოქმედოთ. ევროპული ფეხბურთის მმართველ ორგანოებში მოუგვარებელი რომ არაფერია, ამას თანამედროვეობა ადასტურებს. ხდება არაერთი ფეხბურთელის ნატურალიზაცია და რაღა ჩვენ ვერ მოვახერხებთ?

დღეს ქართული ფეხბურთი ისეთ დღეშია, მას აუცილებლად სჭირდება "ახალი სისხლი". მით უმეტეს, ლაპარაკია გამორჩეულ ფეხბურთელზე, რომელიც თავის თაობაში ერთ-ერთი საუკეთესოა ევროპაში.

ჩვენ შევთავაზოთ და მერე ყველაფერი გიორგის გადასაწყვეტი იქნება - იქით წავიდეს, საითაც გული გაუწევს. დღეს თავის არჩევანში ყველა თავისუფალია, ყველა თვითონ წყვეტს თავის ბედს...

948
მკითხველის კომენტარები / 0 /
მსგავსი ამბები
რუბრიკის სხვა სიახლეები
;