გიორგი წიტაიშვილი: ეს არ არის მწვერვალი, ეს არის იმის სტიმული, რომ უფრო მეტი ვიშრომო და მეტად დამაფასონ

გიორგი წიტაიშვილი პირველი ქართველია, რომელიც მსოფლიოს ჩემპიონი გახდა. პოლონეთში დასრულებულ მსოფლიოს 20-წლამდელთა ჩემპიონატის ფინალში უკრაინის ნაკრებმა სამხრეთ კორეა 3:1 დაამარცხა და ფეხბურთში მსოფლიოს ჩემპიონი პირველად გახდა.

მესამე გოლი კიევის “დინამოს” წარმოშობით ქართველმა თავდამსხმელმა (რომელმაც მატჩი შეუცვლელად ჩაატარა) 90-ე წუთზე ულამაზესი დარტყმით გაიტანა.

გიორგი წიტაიშვილი ისრაელში დაბადებული და კვიპროსში ნაცხოვრები ქართველია, რადგან მამამისი, კობა წიტაიშვილი, თავისი დროის ერთ-ერთი გამორჩეული მოთამაშე და საქართველოს ყველა ასაკობრივი და ეროვნული ნაკრების წევრი იყო - ზუგდიდის “ოდიშის” და თბილისის “დინამოს” ექს-თავდამსხმელი იმ პერიოდში თავად თამაშობდა და ქვეყნიდან ქვეყანაში გადასვლა უხდებოდა, 2003-2006 წლებში თემურ ქეცბაიასთან ფამაგუსტას “ანორთოსისში” გამოდიოდა,.

გიორგი, ოჯახთან ერთად, უკრაინაში 2012 წელს წავიდა და ამ ქვეყნის მოქალაქე გახდა. კიევის “დინამოს” აკადემიაში ვარჯიშობდა, საიდანაც შარშან მთავარ გუნდში დააწინაურეს და მას დიდი იმედებით უყურებენ. უკრაინის 17, 18 და 19-წლამდელთა ნაკრებების წევრს კიევურ გუნდთან კონტრაქტი 2018 წლის 21 ნოემბერს 5 წლით გაუხანგრძლივეს.

წიტაიშვილი 2018 წელს უკრაინის “ოქროს ტალანტის” გამოკითხვაში (საუკეთესო 19-წლამდელებში) მეოთხე ადგილზე გავიდა. კიევის “დინამოში” სადებიუტო შეხვედრა ევროპის ლიგის ჯგუფური ეტაპის ბოლო შეხვედრაში ჩეხურ “იაბლონეცთან” ჩაატარა., 18 წლის შემტევი ნახევარმცველი მოედანზე მატჩის მე-60 წუთზე გამოჩნდა.

საინტერესოა, რომ წიტაიშვილი 20-წლამდელთა მსოფლიო ჩემპიონატის ფინალის საუკეთესო მოთამაშედ სტატისტიკური პროგრამა InStat-ის მონაცემებზე დაყრდნობით დაასახელეს - წიტაიშვილმა ფინალში ყველაზე მეტი, 296 ქულა დააგროვა. გიორგი წიტაიშვილი პირველი ქართველი ფეხბურთელია, რომელმაც მსოფლიო ჩემპიონატის ფინალში ითამაშა, ვინც გოლი გაიტანა და მატჩის შემდეგ ფინალის საუკეთესო მოთამაშის პრიზი დაიმსახურა.

ჩვენ კიევის “დინამოს” 18 წლის ქართველ ნახევარმცველთან შეხვედრის და ექსკლუზიური ინტერვიუს ჩაწერის საშუალება მოგვეცა. ახლა ჩვენში წიტაიშვილს რომ ახსენებენ, აქტუალური ხდება კითხვა - საქართველო თუ უკრაინა? “ეს ჯერ კიდევ არ გადამიწყვიტავს და პროვოკაციული კითხვაა”, - ასე უპასუხა გიორგიმ უკრაინელ ჟურნალისტს. 

მაგრამ ამ პასუხის ქვეტექსტი კარგად იკითხება - “ჯერ არ გადამიწყვიტავს”. უკრაინული გამოცემა football.ua წერდა, რომ 18 წლის ნახევარმცველმა რამდენიმე თვის წინ ღიად გამოთქვა საქართველოს ნაკრებში თამაშის სურვილი.

ჩვენ წინასწარ შევთანხმდით, რომ ნაკრებსა და მოქალაქეობაზე არ ვილაპარაკებდით - ეს 18 წლის ბიჭი კარიერას ახლა იწყებს და მის გარშემო უკვე ზედმეტად ნერვული ფონია. ელემენტარულად, ქართველი ბიჭი მსოფლიოს ჩემპიონი გახდა, მივულოცეთ და ამბები გამოვკითხეთ.

- კიევში დაბრუნებულმა თქვით, ჯერ ვერ გავიაზრე, მსოფლიოს ჩემპიონი რომ გავხდიო. ახლაც ეიფორიაში ხართ? 

- მსოფლიოს ჩემპიონობა იმხელა სიხარულია, ემოციებიდან გამოსვლა ძნელია და დღემდე არ განელებულა. უმძიმესი ტურნირი იყო, 7 შეხვედრა ჩავატარეთ, სამი ჯგუფში და დანარჩენი პლეი ოფში. ამ თამაშებმა იმხელა ძალა წაგვართვა, ფიზიკურიც და მორალურიც, რომ ბოლოს ზეიმის ძალაც აღარ დამრჩა. თუმცა, მსოფლიოს ჩემპიონობა იმხელა სიხარულია, ამის გადმოცემა შეუძლებელია და ყველანაირი დაღლილობა დამავიწყა.

- გადამწყვეტი გოლის ეპიზოდში კორეელ მცველს ისეთი სლალომით ჩაუქროლეთ, მგონი, ქართული ცეკვის ილეთები თქვენთვის უცხო არ უნდა იყოს...

- (იცინის) უცხო ნამდვილად არ არის. მამაჩემი კვიპროსში, “ანორთოსისში” რომ თამაშობდა, გიორგი ქინქლაძის თანაგუნდელი იყო. პატარა ვიყავი, მაგრამ კარგად მახსოვს, კობას რომ ურჩია, ბავშვი ქართულ ცეკვაზე შეიყვანე და ელასტიკური გახდებაო. უკრაინაში ამის შემდეგ გადავედით, სადაც ჩვენს ნათესავს ქართული ცეკვის ჯგუფი ჰქონდა გახსნილი. ქინქლაძის რჩევა რომ გამახსენდა, შევედი და არც მინანია...

სხვათა შორის, გიტარაზე დაკვრა და ქართული სიმღერებიც ძალიან მიყვარს, მაგრამ რად გინდა (იცინის), ხმა არ მაქვს. ცეკვა კი ფეხბურთში და თუნდაც ფინალში გატანილი გოლის ეპიზოდში ნამდვილად დამეხმარა. 

- კონკრეტულად რაში?

- ქართულ ცეკვაში ისეთი მოძრაობებია, რაც ფეხის სისწრაფეს და მოქნილობას განაპირობებს. კორეელს კი ბურთის მოძრაობის მიმართულება სწრაფად შევუცვალე.

- გავრცელდა ინფორმაცია, თითქოს თქვენით თურქული “ბეშიქთაში” დაინტერესდა...

- ეს ინფორმაციები თურქულმა გაზეთებმა გაავრცელეს, თუმცა პირადად ჩემთან არავინ მოსულა. თუ ინტერესი იქნება, კიევის “დინამოს” მიმართავენ, კლუბში კი არაფერი უთქვამთ.

- 18 წლის ხართ და “ტრანსფერმარკტმა” თქვენი ტრანსფერი უკვე მილიონ ევროდ შეაფასა...

- ჩემი ასაკის ფეხბურთელებს 18 და 20 მილიონ ევროდ აფასებენ და მეეჭვება, რომ კიევის “დინამომ” რომელიმე გუნდს ჩემი ტრანსფერი მილიონ ევროდ დაუთმოს. ეს შეფასება კი არ მახარებს, სტიმულია, რომ ვიშრომო და უფრო დამაფასონ. 20-წლამდელებში მსოფლიოს ჩემპიონობა კარგია, მაგრამ არა - მწვერვალი. 

- რას ნიშნავს თქვენთვის, რომ მსოფლიოს ჩემპიონობა ქართველებში პირველმა იზეიმეთ?

- მინდა, რომ ეს ჩემი მეგობრებისთვის იყოს მაგალითი, რომ მონდომება, შრომა და გულიანი ვარჯიში შედეგს მოიტანს. ქართველებს ბევრი ნიჭიერი ახალგაზრდა გვყავს და მჯერა, ისინი დიდ წარმატებებს მიაღწევენ. 

ყოველდღიური სპორტული გაზეთი "ლელო"
712
მკითხველის კომენტარები / 0 /
მსგავსი ამბები
რუბრიკის სხვა სიახლეები
;