გიორგი ჭიაბრიშვილი: ახლა ჩვენი კონკურენტი თავად საბურთალოა

ეროვნულ საფეხბურთო ლიგის ფინიშამდე ბევრი არაფერი დარჩა. ოთხიდან სამი წრე დასრულდა და ლიდერი კვლავ "საბურთალოა".

რა შანსი აქვს ამ გუნდს, რომ პირველად გახდეს ქვეყნის ჩემპიონი? რატომ შეუმცირდა კონკურენტებთან უპირატესობა და როგორ აფასებს ჩემპიონატის ფორმატს? ამ და სხვა თემებზე "ლელო" ეროვნული ლიგის ლიდერის მთავარ მწვრთნელს, გიორგი ჭიაბრიშვილს ელაპარაკა...

ეს დროებითი ამბავი მგონია

- ჩემპიონატის 75 პროცენტი განვლილია, "საბურთალო" ლიდერია, მაგრამ მთავარი დარჩენილი 25 პროცენტია.

- გუნდი შედეგით ფასდება და წელს საუკეთესო შედეგი დავაფიქსირეთ. მიმდინარე სეზონში ბევრი კარგი პერიოდიც გვქონდა და ცუდიც, მაგრამ ეს უფრო ნაკლებად. ფაქტია, რომ დასაწყისიდანვე ეროვნულ ლიგაში ვლიდერობდით - იმედია, დარჩენილ ნაწილსაც ასევე გავაგრძელებთ და ბოლომდე საუკეთესო შედეგით მივალთ.

- ჩავარდნა ნებისმიერ გუნდს მოსდის. "საბურთალომ" კი მესამე წრეში საუკეთესო შედეგები ვერ აჩვენა – თქვენი აზრით, რა გახდა ამის მიზეზი?

- ყველაფერი კანონზომიერია, ერთ დონეზე მთელ სეზონს ვერავინ ჩაატარებს. მესამე წრეში საუკეთესო შედეგი რომ ვერ ვაჩვენეთ, ეს არ მაშინებს. სეზონის ბოლოს გადაღლა ყველა გუნდს ახასიათებს.

ჩვენ ჩვეულებრივი ადამიანები ვართ და არა - რობოტები. პლუს ტრავმების გამო რამდენიმე მოთამაშე დაგვაკლდა. ერთსა და იმავე მოთამაშეებზე დიდი დატვირთვები მოდიოდა და ამანაც იმოქმედა. ეს მაინც დროებითი ამბავი მგონია. მთავარია, კარგად გვესმოდეს – ჩავარდნა ტრაგედია არაა და პანიკაში არ უნდა ჩავვარდეთ. მე კი სეზონის ბოლოს იმედიანად ველი.

- მეოთხე წრეში ჩავარდნა როგორ უნდა გამორიცხოთ?

- არ გამოვრიცხავ, რომ ცუდი თამაში მეოთხე წრეშიც გვქონდეს, მაგრამ სეზონის წარმატებით დასრულების იმედი გაქვს. ჰანდიკაპი გვაქვს, მერე სანაკრებო პაუზაა და მჯერა, დარჩენილ ნაწილსაც ისეთივე შემართებით ჩავატარებთ, სეზონი როგორც დავიწყეთ. ამასობაში, ტრავმირებულთა ნაწილი დაგვიბრუნდება და ბიჭები ძალების აღდგენას მოასწრებენ.

ჩვენ ისეთი გუნდი გვყავს...

- განსაკუთრებით მტკივნეული "დინამოსთან" და "ტორპედოსთან" წაგებული და "სამტრედიასთან" ფრედ დასრულებული თამაშები იყო...

- ამ სამიდან მხოლოდ "ტორპედოსთან" მატჩზე ვიტყვი, რომ მეტოქემ გვაჯობა და მოგება დაიმსახურა. მიმაჩნია, რომ "დინამოსთან", მინიმუმ, არ უნდა წაგვეგო, "სამტრედიასთან" კი მოსაგები თამაში გვქონდა.

- ალბათ, მსაჯობის შეცდომებს გულისხმობთ...

- ყველა შეხვედრის მოგება წარმოუდგენელია. საერთოდაც, მომხდარზე ლაპარაკი აღარ მსურს. ბიჭებს სულ ვეუბნები, შესაძლოა, ამა თუ იმ გადაწყვეტილებამ შედეგზე გავლენა მოახდინა, მაგრამ ჩვენ გვყავს გუნდი, რომელსაც ამ სირთულეების გადალახვა და მიზნის მიღწევა შეუძლია.

- საინტერესო ფინიშის მოლოდინია. "დინამომ" თქვენთან ჩამორჩენა შეამცირა, "ტორპედომ" კი კარგი ტემპი აკრიფა...

- იმედია, გასული წლის ფინალს, რომელიც ნამდვილ ტრილერს ჰგავდა, ამჯერად თავიდან ავიცილებთ და ჩემპიონის ბედი ბევრად მშვიდად გადაწყდება. მიმაჩნია, რომ "საბურთალოს" კონკურენტი არა რომელიმე გუნდი, არამედ, თავად "საბურთალოა". თავად თუ არ შევუშლით ხელს და დარჩენილ 9 მატჩსაც კარგად ჩავატარებთ, სხვა ვერაფერს გვიზამს. შარშან, ჩემპიონატის დასრულებამდე 5 ტურით ადრე, "დინამო" "ტორპედოს" 9 ქულით ასწრებდა და ჩემპიონობა ვერ მოიპოვა. ამიტომ აუცილებელია მობილიზება და თავად როგორ ვითამაშებთ.

პოლარისის სიკეთე

- საინტერესო ამბავი მოხდა: ვლადიმირ ვაისმა "საბურთალოს" მეკარე ლაზარე კუპატაძე ეროვნული ნაკრების შეკრებაზე ზედიზედ მეორედ გამოიძახა.

- ეს არა მხოლოდ კუპატაძისთვისაა დიდი სტიმული, არამედ, ფეხბურთელებისთვისაც - შრომა არავის ეკარგება და ნაკრებში მოხვედრა ეროვნული ლიგიდანაც შეიძლება. მჯერა, ლაზარეს თავის გამოჩენის შანსი თუ მიეცემა, არ შერცხვება და ყველა სასიამოვნოდ გაოცებული დარჩება. მას დიდი პოტენციალი აქვს.

- თქვენი აზრით, "გაზაფხული-შემოდგომის" სისტემა და 10-გუნდიანი ჩემპიონატი ამართლებს?

- იდეალური ჩემპიონატი არ არის, მაგრამ პროგრესი აშკარაა. ეს ეევროთასებზე ჩვენი გუნდების წლევანდელი გამოსვლითაც მტკიცდება. "ტორპედოს" შემადგენლობის დაკომპლექტების საშუალება უფრო ადრე რომ ჰქონოდა, პლეი ოფის გადალახვასაც მოახერხებდა... 10-გუნდიანმა ჩემპიონატმა უფრო დაძაბული და არაპროგნოზირებადი პირველობა მოგვიტანა. ამ პროგრესს მხოლოდ ბრმა ვერ დაინახავს. ბევრად უკეთესია გაშუქება, "პიარი", დაძაბულობა...

- საინტერესოა, რა სარგებლობა მოგიტანათ "პოლარისის" სისტემის დანერგვამ?

- ძალიან დიდი სამსახური გაგვიწია. ჯერ მარტო იმიტომ, რომ დავინახეთ - ჩვენი მოთამაშეები არავისზე ნაკლებს არ დარბიან. უბრალოდ, საქართველოში ისეთი "აღდგენები" არ არის, როგორიც ევროპის წამყვან ლიგებში. ეს საკითხი ყველა გუნდში რომ მოგვარდეს, მეტი პროგრესი გვექნება.

ყოველდღიური სპორტული გაზეთი "ლელო"
984
მკითხველის კომენტარები / 0 /
მსგავსი ამბები
რუბრიკის სხვა სიახლეები
;