გიორგი ჭიაბრიშვილი და "საბურთალო" "სარაევოსთვის" ემზადებიან...

დღეს “საბურთალო” მორიგ ამხანაგურ შეხვედრას გამართავს. საქართველოს ჩემპიონის მეტოქე ბოსნიის ჩემპიონატის პირველადგილოსანი “სარაევო” იქნება, რომელმაც “ვიტ ჯორჯიასთან” 9 თებერვლის მატჩი ჯგუფური ჩხუბის გამო 83-ე წუთზე დაასრულა...

ბელეკში მატჩი ჩვენი დროით 18:00 საათზე დაიწყება. ჩვენი ხვალინდელი მეტოქე ქვეყნის პირველობას 19 ტურის შემდეგ, 43 ქულით ლიდერობს. ახლა ბოსნიის ჩემპიონატში პაუზაა და იგი 23 თებერვალს განახლდება. “სარაევო” 1946 წელს დაარსდა. მოწინააღმდეგე ისტორიული კლუბია, რომელსაც ზურგს საერთაშორისო გამოცდილება უმაგრებს. “სარაევო” სისტემატურად თამაშობს ევროტურნირებზე. ამ დროისთვის კლუბში სხვადასხვა ქვეყნის 8 ლეგიონერი ირიცხება.

“სარაევომ” “ვიტ ჯორჯიამდე” სერბეთის “ნაპრედაკს” 2:1 აჯობა, ხოლო მოსტარის (ბოსნია) “ველეჟთან” 1:3 დამარცხდა. კლუბის ყველაზე სტაჟიანი ფეხბურთელი 33 წლის მურსუდინ აჰმეტოვიჩია, ახალგაზრდა ფეხბურთელებად კი 19 წლის ითვლება.

თბილისური გუნდის მთავარმა მწვრთნელმა გიორგი ჭიაბრიშვილმა “ესკილსტუნასთან” ფრედ დასრულებულ მატჩზე კომენტარი გააკეთა:

“წინა თამაში შვედებთან ძალიან რთული გამოვიდა, იქიდან გამომდინარე, რომ ამ თამაშს მაქსიმალურად დიდი დატვირთვებით შევხვდით. ძირითადად, ორჯერადი ვარჯიშები გვქონდა, რაც ფიზიკური კონდიციების ამაღლებაზე იყო გათვლილი. გუნდი გადაღალა, მაგრამ დადებითიც შეიძლება ითქვას. გვქონდა მომენტები, ეპიზოდებში - კარგი თამაში, მაგრამ მთლიანობაში ბიჭებს დაღლა მაინც ეტყობოდათ”, - ამბობს ჭიაბრიშვილი.

საქართველოს ჩემპიონის დამრიგებელმა ილაპარაკა მეორე შეკრების მიმდინარეობაზეც და ბოსნიურ “სარაევოსთან” გასამართ მატჩზეც:

“იცით, რომ ბალკანელებთან “ვიტ ჯორჯიას” მატჩი 83-ე წუთზე ჯგუფური ჩხუბის გამო ჩაიშალა. უშუალოდ ვნახე მათი თამაშები და კარგი გუნდი ჩანს. ეს ჩვენთვის მხოლოდ ტესტ-მატჩია და არა - მნიშვნელოვანი დაპირისპირება. მთავარია, დიდი დატვირთვების ფონზე პატარა-პატარა შეცდომები გამოვასწოროთ”.

ჭიაბრიშვილის თქმით, მეორე შეკრება გეგმის მიხედვით მიდის: “ყველაზე მნიშვნელოვანია, რომ ტრავმირებულები არ გვყავს. გუნდი დიდი დატვირთვების ქვეშ 15 თებერვლამდე იქნება. ამის შემდეგ გროზნოს “ახმატთან” გვაქვს სპარინგი. მერე დატვირთვებს ნელ-ნელა შევამცირებთ და სეზონის პირველი ოფიციალური შეხვედრისთვის მოვემზადებით”.

ყოველდღიური სპორტული გაზეთი "ლელო"
475
მკითხველის კომენტარები / 0 /
მსგავსი ამბები
რუბრიკის სხვა სიახლეები