გიორგი ჭიაბრიშვილი: იმედია, მომდევნო  ეტაპზე გავალთ... საქართველოს ჩემპიონი მოლდოვაში გაემგზავრა  

ჩემპიონთა ლიგის პირველ საკვალიფიკაციო ეტაპზე “საბურთალოს” მეტოქე მოლდოვური “შერიფია”. პირველი შეხვედრა 10 ივლისს, 21 საათზე, ტირასპოლში გაიმართება, ხოლო საპასუხო მატჩს “მიხეილ მესხი” 16 ივლისს, 21:30 საათზე უმასპინძლებს.

“საბურთალომ” მოლდოვაში გამგზავრებამდე დასკვნითი ვარჯიში გამართა. “ლელომ” გუნდის მთავარ მწვრთნელსა და ფეხბურთელებთან კომენტარები ჩაწერა: 

გიორგი ჭიაბრიშვილი, “საბურთალოს” მთავარი მწვრთნელი: - ეს ჩვენი გუნდისთვის ევროსარბიელზე პირველი მატჩი იქნება და, ბუნებრივია, ყველა კუთხით სირთულეა, მათ შორის, ემოციურადაც. მაგრამ მიმაჩნია, რომ ჩვენ ყველანაირად მზად ვართ და იმედი გვაქვს, რომ მომდევნო ეტაპზე გავალთ. ამის დიდი სურვილიც გვაქვს და ძალიან დიდი შემართებითაც ვემზადებით. დანარჩენს თამაში გვიჩვენებს. 

- მეტოქე ძლიერია, მაგრამ “ბარსელონა” ნამდვილად არ არის - თქვენი მოგების შანსს როგორ თამაშში ხედავთ? 

- “შერიფის” სიძლიერე გასულ სეზონშიც ვნახეთ, როცა ქუთაისის “ტორპედოს” შეხვდა. წელსაც ძალიან ბევრი ფეხბურთელი დაიმატეს. რა თქმა უნდა, მოლდოვის ჩემპიონატი მაღალი დონის არ არის, მაგრამ თავად “შერიფი” ძლიერია და ევროპაში სტაბილურად თამაშობს. 

- ტრავმირებულები ხომ არ გყავთ?

- ტრავმირებული მხოლოდ ელვინ ტერაა, რომელიც ამ თამაშს გამოტოვებს და მისი არყოფნა ჩვენთვის დანაკლისი იქნება. ყველა დანარჩენი - თამაშისთვის ემზადება. ჩემი აზრით, ამ შეხვედრას კარგ ფორმაში შევხვდებით და საინტერესო თამაშიც იქნება.

გიორგი გაბედავა: - მიმაჩნია, რომ შანსი ყველასთან გვაქვს. რა თქმა უნდა, “შერიფი” ძლიერი და უფრო გამოცდილი გუნდია, მაგრამ ისეთიც არ არის, რომელთანაც შანსი არ გვექნება. ამას გარდა, მეტოქის თამაში გავარჩიეთ და სისუსტეები მასაც აქვს. დიდი ხანია, რაც ტირასპოლურ გუნდს ჩემპიონატში კონკურენტი არ ჰყავს. ძალიან მობილურები და სწრაფები არიან, შეტევაში დიდი პოტენციალი აქვთ... რაც მთავარია, “საბურთალოშიც” კარგი შემადგენლობა შეიკრიბა და იმის მიუხედავად, რომ მეტოქესავით ევროთასებზე გამოსვლის გამოცდილება არ გაგვაჩნია, შეთამაშებული გუნდი ვართ და საბრძოლო განწყობით მივემგზავრებით.

გაგი მარგველაშვილი: - ჩვენი მეტოქე კარგი გუნდია, ბევრი ლეგიონერი ჰყავს და კარგ ფეხბურთს თამაშობს. ეს შარშანაც გამოჩნდა, როცა “ტორპედოს” შეხვდნენ. ქუთაისელებს პირველი თამაში მოგებული ჰქონდათ და, ჩემი აზრით, ცოტა ყურადღებით რომ ყოფილიყვნენ, ამ ბარიერს გაივლიდნენ. ვერ ვიტყვი, რომ პირველ შეხვედრაში თანაბარი შანსები გვაქვს, რადგან გასვლაზე ვთამაშობთ და მცირე უპირატესობა ტირასპოლელებს ექნებათ. თანაც, ეს გუნდი სახლში თამაშებს თითქმის არ აგებს. მაგრამ ეს “საბურთალოსთვის” ისტორიული თამაშია და ტრავმირებულები თითქმის არ გვყავს, მხოლოდ ელვინ ტერა ვერ დაგვეხმარება. იმედი მაქვს, გუნდი “შერიფთან” საკუთარ შესაძლებლობებს კარგად წარმოაჩენს. მოსაგებად ყველაფერს გავაკეთებთ. 

ცნობილია, რომ გუნდს მეკარე ლაზარე კუპატაძე დაუბრუნდა, რომელიც ლუქსემბურგის “ჟენესიდან” გათავისუფლების ფურცელს დიდხანს ელოდა: - “ძველ გუნდთან დაკავშირებული იურიდიული საკითხები საბოლოოდ მოგვარდა და “საბურთალოში” თამაში შემიძლია. ევროპალიგის განაცხადშიც მოვხვდი”.

დაჩი ცნობილაძე: - “ბოლო ტურში რუსთავთან” შეხვედრის შემდეგ, გუნდი მთლიანად “შერიფთან” შეხვედრაზე გადავერთეთ. პარალელურად, თეორიული მეცადინეობები გვქონდა, ტირასპოლელების თამაშებს ვუყურებდით და მეტოქე მეტ-ნაკლებად შესწავლილი გვყავს. შეიძლება ითქვას, გუნდი თამაშისთვის მზად არის. ეს ევროსარბიელზე “საბურთალოს” პირველი გამოსვლაა და ვეცდებით, კარგად ვითამაშოთ”.

გუნდთან ერთად ვარჯიშობს ლევან ყენია, რომელიც ლუქსემბურგული “დუდელანჟიდან” დაბრუნდა, მაგრამ მისი ტრანსფერის საკითხიც ჯერ არ არის გადაწყვეტილი: - “ჩემს ძველ კლუბთან იურიდიული საკითხები დღემდე არ მოგვარებულა და ლუქსემბურგიდან გათავისუფლების ფურცელს დღემდე ველოდები. ანუ ლიგის პირველ ეტაპზე ვითამაშებ თუ არა, არ ვიცი, ყოველ საათს ველოდები და უნდა გაირკვეს”, - გვითხრა ყენიამ.

“საბურთალო”-”შერიფის” საპასუხო მატჩის პირდაპირ ტელერეპორტაჟს საზოგადოებრივი მაუწყებლის “პირველი არხი” კი შემოგთავაზებთ, მაგრამ ტირასპოლიდან ტრანსლაცია არ იქნება, რადგან მხარეები ვერ შეთანხმდნენ. ამის შესახებ “საბურთალომ” და საზოგადოებრივმა მაუწყებელმა ერთობლივი განცხადება გაავრცელეს.

“10 ივლისს საფეხბურთო კლუბი “საბურთალო” მოლდოვის ქალაქ ტირასპოლში ჩემპიონთა ლიგის საკვალიფიკაციო ეტაპის მატჩს გამართავს “შერიფის” წინააღმდეგ. გამომდინარე იქიდან, რომ დიდია მატჩისადმი ინტერესი, ჩავთვალეთ საჭიროდ, გაგვეკეთებინა განმარტება.

ზოგადად, კლუბებისთვის საერთაშორისო მატჩების ტრანსლირება არის შემოსავლების ერთ-ერთი წყარო, თუმცა გათვალისწინებულ იქნა რა გულშემატკივრების ინტერესი, “საბურთალომ” პირდაპირი რეპორტაჟის ექსკლუზიური უფლება “საზოგადოებრივ მაუწყებელს” უსასყიდლოდ გადასცა, რათა მას მოლდოვურ მხარესთან მოლაპარაკება ეწარმოებინა და გასვლითი მატჩი პირდაპირ ეთერში ეჩვენებინა.

საზოგადოებრივი მაუწყებელი ტირასპოლის ტელევიზიასთან მოლაპარაკებას აწარმოებდა, რომელიც მზად იყო გაეცვალა რეპორტაჟები ქართულ მხარესთან, რათა ქართველ და მოლდაველ გულშემატკივარს მატჩების პირდაპირ ეთერში ნახვის საშუალება მისცემოდათ. თუმცა მოლდოვაში დაგეგმილ მატჩამდე რამდენიმე დღით ადრე, მოლდოვურმა მხარემ სატელევიზიო რეპორტაჟების სიგნალების გაცვლაზე უარი თქვა”.

ყოველდღიური სპორტული გაზეთი "ლელო"
796
მკითხველის კომენტარები / 0 /
მსგავსი ამბები
რუბრიკის სხვა სიახლეები
;