გიორგი ჭიაბრიშვილი: მერჩივნა ჯერ თბილისში გვეთამაშა

შვეიცარიის ქალაქ ნიონში ჩატარებულმა წილისყრამ ჩემპიონთა ლიგის 2019/20 წლების სეზონის პირველ საკვალიფიკაციო ეტაპზე საქართველოს მოქმედ ჩემპიონს, შარშანდელივით, მოლდოვის ოქროსმედალოსანი დაუწყვილა...

“საბურთალოს” წლეულს ევროთასებზე დებიუტი ექნება და ეგრევე - ჩემპიონთა ლიგის საკვალიფიკაციო ეტაპზე. გიორგი ჭიაბრიშვილის გუნდმა 2018 წელს ეროვნულ ლიგაში ყველას გადაასწრო და სულ 5 წლის ჩამოყალიბებული კლუბი პირველად გახდა საქართველოს ჩემპიონი.

“საბურთალო” ხვდება ტირასპოლის “შერიფს”, რომლის ლეგენდაც და გენერალური დირექტორის გუნდის ყოფილი კაპიტანი ვაჟა თარხნიშვილია, ხოლო დუბლების მთავარი მწვრთნელი - შოთა მახარაძე.

შეგახსენებთ, რომ ჩემპიონთა ლიგის პირველ საკვალიფიკაციო ეტაპზე შარშან “შერიფი” “ტორპედოს” შეხვდა და ქუთაისში წაგების (1:2) შემდეგ შინ დამაჯერებლად მოიგო (3:0). 

“საბურთალო” ჩემპიონთა ლიგის პირველი საკვალიფიკაციო ეტაპის წილისყრისას განუთესავებში მოხვდა და მეორე ჯგუფში იყო. “შერიფის” გარდა, ჩვენი ჩემპიონის სავარაუდო მეტოქეები იყვნენ გლაზგოს “სელტიკი” (შოტლანდია), ბრატისლავის “სლოვანი” (სლოვაკეთი), აღდამის “ყარაბაღი” (აზერბაიჯანი) და “დუდელანჟი” (ლუქსემბურგი). 

მათ შორის ყველაზე ძლიერი და სახელოვანი, რა თქმა უნდა, “სელტიკია” და ყველაზე არასასურველი მეტოქეც გახლდათ, მაგრამ “საბურთალოს” მთავარ მწვრთნელ გიორგი ჭიაბრიშვილს ყველაზე მეტად სწორედ მასთან შეხვედრა სურდა: 

“სუსტი გუნდი ჩემპიონთა ლიგის პირველ საკვალიფიკაციო ეტაპზეც კი არ თამაშობს. ხუთი სავარაუდო მეტოქიდან შესაძლო იყო სხვა გუნდებიც შეგვხვედროდა... სიმართლე გითხრათ, სურვილი მქონდა, ჩვენი მეტოქე გლაზგოს “სელტიკი” ყოფილიყო, მაგრამ მოწინააღმდეგედ მოლდოვური “შერიფი” გვერგო, რომლის თამაშიც ბოლოს ქუთაისის “ტორპედოს” წინააღმდეგ ვნახე. ამ ეტაპზე ვიცი ისიც, რომ “შერიფში” საქართველოს ეროვნული ლიგის გასული სეზონის საუკეთესო ფეხბურთელი ლეანდრო რიბეირო ირიცხება, რომელსაც მუდმივი სათამაშო პრაქტიკა არ აქვს”, - ამბობს ჭიაბრიშვილი.

გუნდები პირველ მატჩს 10 ივლისს, ტირასპოლში გამართავენ, ხოლო საპასუხო შეხვედრას 17 ივლისს “მიხეილ მესხი” უმასპინძლებს. “საბურთალოს” მთავარმა მწვრთნელმა ამაზეც ილაპარაკა: 

“რაც შეეხება საშინაო თუ საგარეო შეხვედრას, მერჩივნა, პირველად საკუთარ კედლებში გვეთამაშა, თუმცა ახლა ამაზე საუბარი არ ღირს. ვეცდებით, ორი თამაშის ჯამში შემდეგ ეტაპზე გავიდეთ და ქართველი გულშემატკივარი გავახაროთ”.

ყოველდღიური სპორტული გაზეთი "ლელო"
568
მკითხველის კომენტარები / 0 /
მსგავსი ამბები
რუბრიკის სხვა სიახლეები
;