გიორგი ჭიაბრიშვილი: საუკეთესო ფეხბურთელები დავიმატეთ

გიორგი ჭიაბრიშვილმა თურქეთში მოსამზადებელი ეტაპის პირველი ნაწილი შეაფასა. საქართველოს ჩემპიონის მთავარმა მწვრთნელმა სერბულ „ნაპრედაკთან“ მოგებული (3:0) მატჩის შემდეგ „საბურთალოს“ ოფიციალურ ვებგვერდთან ილაპარაკა:

„სერბებთან შეხვედრის ტაიმები განსხვავებული შემადგენლობებით ვითამაშეთ და განსხვავებული ხასიათის ტაიმებიც გამოგვივიდა. ფეხბურთელებით კმაყოფილი ვარ. რაც მთავარია, კმაყოფილი ვარ მოთამაშეების მოძრაობით - ეს ამ ეტაპზე ჩემთვის ბევრს ნიშნავდა. ამასთან, გუნდმა ორივე ტაიმში ძალიან კარგი,

კომბინაციური ფეხბურთი აჩვენა. მართალია, მეტოქის გატეხა პირველ ტაიმში შევძელით, მაგრამ მეორე ნახევარშიც ბევრი მომენტი გვქონდა. მახარებს ის ფაქტი, რომ უკვე ამ ეტაპზე გუნდი არ ღალატობს საკუთარ სტილს - კომბინაციურ ფეხბურთს თამაშობს“, - ამბობს გიორგი ჭიაბრიშვილი.

„საბურთალოს“ დამრიგებელმა ჩერნოგორიელ ახალწვეულზეც ილაპარაკა: „როლოვიჩმა ვარჯიშებზე კარგი შთაბეჭდილება დატოვა, თუმცა ამ თამაშებში თავი დიდად ვერ გამოიჩინა და ჯერ გადაწყვეტილი არ არის, დარჩება თუ გავუშვებთ. ერთი მხრივ, მისი მოქმედებები მომწონს, მაგრამ ჯერ მასზე ბოლომდე ვერ ჩამოვყალიბდით. საკონტროლო თამაშები კიდევ გვაქვს და დავაკვირდებით“.

ჭიაბრიშვილმა კომენტარი სხვა ახალწვეულ ლეგიონერებზეც გააკეთა: „ძალიან ხშირია კითხვა ლეგიონერებზე. ჰგონიათ, რომ რადგან უცხოელია, აუცილებლად ისეთი მოთამაშეა, რომელიც პრობლემებს გადაგვიჭრის. გუნდში კვალიფიციური ლეგიონერებიც გვყავს და ასევე კვალიფიციური ქართველებიც. უცხოელებს მარტო იმიტომ არ ჩამოვიყვანთ, რომ ეს აუცილებელია.

ჩვენ გვყავს გუნდი. ეს „საბურთალოს“ ყველაზე მთავარი იარაღი იყო - გუნდურობა და გუნდური მოქმედება. ამ შემთხვევაში, კარგი გუნდი გვყავს - მიმაჩნია, რომ წინა სეზონთან შედარებითაც კი უკეთესი გუნდი გვეყოლება. თუ შევხედავთ, რომ ჩვენს ფეხბურთელებზე ბევრად ძლიერი ლეგიონერი ან ქართველი გამოჩნდა, გაძლიერებაზე უარს არასოდეს ვიტყვით... საერთოდ, ძალიან იშვიათია, რომ ფეხბურთელში შევცდეთ. წელსაც ძალიან კარგი ტრანსფერები გავაკეთეთ. მიმაჩნია, რომ ერთ-ერთი... უფრო სწორად, საუკეთესო ფეხბურთელები დავიმატეთ. ვიცნობდით და მათი აყვანის სურვილი გვქონდა. მათ უკვე გაგვაძლიერეს და ზუსტად ვიცი - ისევე, როგორც წინა წელს, ახლაც ყველა ტრანსფერი გაამართლებს“.

„საბურთალო“ მეორე შეკრებასაც სიდეში გაივლის, არადა, თავიდან სხვა გეგმები იყო. ჭიაბრიშვილმა კომენტარი ამაზეც გააკეთა:

„ეს პირადად ჩემი გადაწყვეტილება იყო. ჩავედი ლარაში - ანთალიასთან ახლოს, სადაც მეორე შეკრება უნდა გაგვევლო. იქ, უბრალოდ, ძალიან ცუდი კლიმატური პირობები იყო, ძალიან ბევრი სტადიონი დატბორილი დაგვხვდა და შტორმებისა და უამინდობების გამო, მოედნები ძალიან გაფუჭებული იყო. სიდეში კი, სადაც ახლა ვემზადებით, ძალიან კარგ მინდვრებზე ვვარჯიშობთ. ამიტომაც ვრჩებით სიდეში“.

„საბურთალო“ პირველ თურქულ შეკრებას დღეს დაასრულებს - ჭიაბრიშვილის გაწვრთნილები მაკედონიის უმაღლესი ლიგის მესამეადგილოსან „რაბოტნიჩკის“ დაუპირისპირდებიან.

ყოველდღიური სპორტული გაზეთი "ლელო"
2011
მკითხველის კომენტარები / 0 /
მსგავსი ამბები
რუბრიკის სხვა სიახლეები
;