გიორგი ჭიაბრიშვილი: ჩემპიონობაზე ფიქრი ჯერ ნაადრევია

"საბურთალომ" ზედიზედ ორ ტურში ეროვნული ლიგის მთავარი ფავორიტები, ვიცე-ჩემპიონი თბილისის "დინამო" და მოქმედი ჩემპიონი ქუთაისის "ტორპედო" დაამარცხა.

გუნდის მთავარი მწვრთნელი გიორგი ჭიაბრიშვილი ამ მოგებებითა და ეროვნულ ლიგაში ერთპიროვნული ლიდერობით გახარებულია. მაგრამ ჯერ ნაადრევად მიაჩნია იმაზე ლაპარაკი, რომ "საბურთალო" ჩემპიონობისთვის ბრძოლაში მთავარი ფავორიტია.

"ჩვენ მოქმედ ჩემპიონს მოვუგეთ და ცხადია, ეს მახარებს. ფეხბურთელებმა მოინდომეს, ბოლომდე დაიხარჯნენ და სათამაშო დისციპლინა დაიცვეს. რაც მთავარია, მომენტები გამოვიყენეთ.

ეს იყო მოგების მიზეზი და მიმაჩნია, რომ ამის გამო 3 ქულა დავიმსახურეთ. ახლა რომ ბოლო ტურები იყოს, კიდევ შეიძლებოდა იმის თქმა, რეალურად რისი იმედი უნდა გვქონდეს.

ჯერ კი 7 ტურია გასული და ჩემპიონობაზე ფიქრი ნაადრევია. მთავარია, წელს სამეულში მოვხვდეთ. ჩემპიონობაზე ფიქრს ბევრი რამ უნდა - დიდი გამოცდილება, ტრადიცია... ამ მარათონულ ჩემპიონატში პოზიციის მოპოვება რთულია, ლიდერობის დაკარგვა კი - ძალიან ადვილი", - ამბობს ჭიაბრიშვილი.

ყოველდღიური სპორტული გაზეთი "ლელო"
957
მკითხველის კომენტარები / 0 /
მსგავსი ამბები
რუბრიკის სხვა სიახლეები
;