გიორგი ხარაიშვილი: რა დროც უნდა გავიდეს და სადაც უნდა ვიყო, "საბურთალო" ჩემში წარუშლელ მოგონებებს დატოვებს

გიორგი ხარაიშვილი თებერვალში შვედეთში წავიდა. ის "გიოტებორგში" ცდილობს თავის დამკვიდრებას და კარიერის აწყობას. 21 წლის ნახევარმცველმა საინტერესო თემებზე ილაპარაკა:

"სამშობლოსგან ძალიან შორს ვარ და შვედეთთან შეგუება გამიჭირდა. თუმცა ოჯახსა და ახლობლებთან ყოველდღიური კონტაქტი მაქვს. ამინდები იმაზე ცუდია, ვიდრე ველოდი.

თუ თერმომეტრი -3 გრადუსს უჩვენებს, მიხარია, რადგან ხშირად -13 გრადუსია. ასეთ ამინდებში ვარჯიშს და თამაშს კი მიუჩვეველი ვარ. ასე რომ, ამინდის გამო პრობლემები მქონდა, მაგრამ ნელ-ნელა თბება და მეც ვეჩვევი იქაურობას.

ამინდისგან განსხვავებით, შვედები ძალიან თბილი ხალხია და ნოსტალგიის მიუხედავად, როგორც კლუბი, ასევე "გიოტებორგის" პერსონალი გვერდში მიდგანან. ყველანაირად ცდილობენ, ცხოვრების ახალ ეტაპს იოლად შევეგუო", - ამბობს გიორგი ხარაიშვილი.

მან "გიოტებორგის" სათამაშო სტილზეც ილაპარაკა: "თამაშის სტილს ჩვენი მწვრთნელი, ისევე, როგორც ყველა სხვა სპეციალისტი, მეტოქიდან გამომდინარე არჩევს. თუმცა, პოია აგსბაგის ხელწერა მაინც კონტრშეტევაზე თამაშია.

"საბურთალოსა" და "გიოტებორგს" განსხვავებული სათამაშო ტაქტიკა აქვს. ასეთი განლაგებით არასდროს მითამაშია, თუმცა, ვცდილობ, ახალი კლუბის სტილს შევეჩვიო.

ოფიციალური და ამხანაგური მატჩები ვითამაშე და ახალ კლუბშიც "სტანდარტულებს" მე ვასრულებ. მწვრთნელი მეუბნება, რომ უფრო მეტი ავიღო ჩემს თავზე, კარში ხშირად დავარტყა.

შვედეთის პირველობა 1 აპრილს იწყება. მწვრთნელი ცდილობს, თავი კომფორტულად ვიგრძნო და ყველანაირად ხელი შემიწყოს. სასიამოვნოა, როცა უცხო კლუბში ხარ და მწვრთნელისგან ასეთ მხარდაჭერას გრძნობ".

ხარაიშვილი აღტაცებულია "გიოტებორგის" ქომაგებით: "გუნდს საოცარი გულშემატკივრები ჰყავს, ამხანაგურ თუ ოფიციალურ მატჩებზე სტადიონი სავსეა.

ქომაგები მთელი თამაშის განმავლობაში ბოლომდე გვამხნევებენ და გვერდში გვიდგანან, არა აქვს მნიშვნელობა, რა ანგარიშია. თამაშების შემდეგ პირად შეტყობინებებში მოლოცვები და მადლობები არ წყდება. ძალიან თბილად და იმედიანად მიმიღეს. ვგრძნობ, ჩემი სჯერათ, მეც მათი გვერდში დგომის მეტი არაფერი მჭირდება.

სხვათა შორის, შვედეთში ქომაგებს ქართულ ფეხბურთზე ზოგადად სმენიათ. კონკრეტულად "საბურთალოს" მიმართ გარკვეულ სიახლეებს ახლა ეცნობიან. მეც ვცდილობ, ჩემი ყოფილი კლუბი მაქსიმალურად გავაცნო".

ხარაიშვილმა "საბურთალოსადმი" მადლიერება გამოხატა: "შვედეთში ძალიან თბილად მიმიღეს და რომ არა ეს ფაქტორი, "საბურთალოსთან" განშორება კიდევ უფრო გამიჭირდებოდა. ეს გუნდი ჩემი ოჯახია. ადგილი, სადაც პიროვნულად გავიზარდე და ფეხბურთელად ჩამოვყალიბდი. 12 წლის ვიყავი, "საბურთალოში" რომ ჩავირიცხე.

ჩემი პირველი მწვრთნელი გიორგი მიქაძე იყო. მიუხედავად ჩემი პატარა ასაკისა, თავიდანვე ცხადი იყო, რომ "საბურთალო" მხოლოდ გუნდი კი არა, ერთი დიდი ოჯახი იყო.

ასაკის მატებასთან ერთად, ეს განცდა უფრო და უფრო მიძლიერდება. რა დროც უნდა გავიდეს და სადაც უნდა ვიყო, "საბურთალო" ჩემში წარუშლელ მოგონებებსა და გრძნობებს დატოვებს და ყოველთვის მომენატრება. წელს გუნდს კარგი სტარტი ჰქონდა. "საბურთალო" ყოველთვის გუნდურ ფეხბურთს თამაშობდა და ყოველი ფეხბურთელი ბოლომდე იხარჯებოდა.

ასეა ახლაც. ეს ყველაფერი ჩვენში გიორგი ჭიაბრიშვილის დანერგილია. საქართველოს ახალ ჩემპიონატში "საბურთალოს" იდეალური სტარტი აქვს და მჯერა, სეზონის ბოლომდე ასე გააგრძელებს. მგონია, რომ კლუბი სამეულში ადგილს აუცილებლად დაიმკვიდრებს - "საბურთალო" ამას იმსახურებს.

გუნდს ყოველთვის ჰქონდა პოტენციალი, რომ მაღალი მიზნებისთვის ებრძოლა. ამის შესაძლებლობა განსაკუთრებით შარშანდელ ჩემპიონატში გამოჩნდა. თუმცა ხელი ფეხბურთელების ხშირმა ტრავმებმა შეგვიშალა. მაგრამ ჭიაბრიშვილი გამოსავალს ყოველთვის მალე პოულობს - მიუხედავად ტრავმებისა, გუნდი მალევე აათამაშა და გუნდმა მეორე წრე მაღალ დონეზე ჩაატარა. ევროპაზე მოსახვედრად სულ ცოტა დაგვაკლდა. მჯერა, ჭიაბრიშვილის ხელმძღვანელობით "საბურთალოს" ყველაფრის გაკეთება შეუძლია".

ყოველდღიური სპორტული გაზეთი "ლელო"
853
მკითხველის კომენტარები / 0 /
მსგავსი ამბები
რუბრიკის სხვა სიახლეები
;