გიოტებორგი და ხარაიშვილი: არის ახალი კონტრაქტი!

"გიოტებორგის" ოფიციალური გვერდის ცნობით, გიორგი ხარაიშვილთან ახალი კონტრაქტი შეთანხმებულია - ინფორმაციას შვედური საფეხბურთო კლუბის პრესსამსახური ავრცელებს.

"კლუბი და გიორგი ხარაიშვილი ახალ კონტრაქტზე შეთანხმდნენ. ქართველმა თავდამსხმელმა ხელი მოაწერა ხელშეკრულებას, რომელიც ძალაში 2022 წლის 31 ივლისამდეა.

2018 წელს გიორგი თბილისის "საბურთალოდან" ჩამოვიდა, დასრულებულ სეზონში დიდ წარმატებებს მიაღწია და ალსვენსკანში "გიოტებორგის" წამყვანი მოთამაშე გახდა. გარიგება ოფციონის წესის გამოყენებით მოხდა. მას ყველა მხარე დაეთანხმა", - წერს "გიოტებორგის" ოფიციალური გვერდი.

ქართველთან კონტრაქტის გახანგრძლივებაზე კომენტარი კლუბის სპორტულმა დირექტორმა იონას ოლსონმა გააკეთა.

"რა თქმა უნდა, ძალიან გახარებული ვარ, რადგან სწორედ ეს გვინდოდა. გიორგი ისეთი კარგი მოთამაშეა, როგორც მისი აყვანისას ველოდით. გარდა ამისა, ქართველი მხოლოდ 22 წლისაა და განვითარების დიდი პოტენციალი აქვს", - ამბობს კმაყოფილი ოლსონი.

ხარაიშვილმა, რომელიც ამჟამად საქართველოშია, 3,5-წლიანი ხელშეკრულება გააფორმა. 2018 წელს მან "გიოტებორგში" 31 მატჩი ჩაატარა და 13 გოლი გაიტანა. შვედური კლუბი სეზონისთვის მზადებას 3 იანვარს დაიწყებს.

"საბურთალომ" გიორგი ხარაიშვილი "გიოტებორგში" წლის დასაწყისში (თებერვალი) გაუშვა. მაგრამ ეს იყო იჯარა, რომლის ვადაც ნოემბერში ამოიწურა. შვედურმა კლუბმა 22 წლის ნახევარმცველის ტრანსფერის გამოსყიდვის ექსკლუზიური უფლება მიიღო. ეს გულისხმობდა 3,5-წლიანი ხელშეკრულების გახანგრძლივებას და "გიოტებორგმა" ამ უფლებით ისარგებლა კიდეც.

ყოველდღიური სპორტული გაზეთი "ლელო"
373
მკითხველის კომენტარები / 0 /
მსგავსი ამბები
რუბრიკის სხვა სიახლეები