გოგა ბითაძემ ადრიატიკა ეფექტურად გახსნა: 24 ქულა, 12 მოხსნა... [VIDEO]

ადრიატიკის ლიგაზე პირველი ტურის მატჩში გოგა ბითაძემ იფრინა და "მეგა ბიმაქსს" ბოსნიაში "იგოკეასთან" მოაგებინა - 80:79.

ბოსნიელებმა ახალგაზრდა ქართველი ცენტრის შეჩერება ვერ მოახერხეს. მან 31 წუთში 24 ქულა, 12 მოხსნა, 2 პასი და 1 დაფარება გაიფორმა. მარგი ქმედების კოეფიციენტი 29 ჰქონდა.

ბითაძემ 11-დან 8 ორქულიანი, 5-დან 2 საჯარიმო და, რაც ყველაზე საყურადღებოა - 3-დან 2 სამიანი ჩააგდო. ერთადერთი, ვინც ბითაძეს ქულებით გაასწრო, იგოკეელი ზუბჩიჩი (29) იყო. თუმცა გარჯა გოგას უფრო დაუფასდა, რადგან მისმა გუნდმა გაიმარჯვა.

ბოლო წუთებზე თითქოს ყველაფერი მშვიდად უნდა ყოფილიყო, "მეგა ბიმაქსი" 9 ქულის სხვაობითაც იგებდა, მაგრამ ბოსნიელებმა "განწირული" სამქულიანებით თამაშის გადარჩენა სცადეს. სერბებმა კი მას შემდეგ ამოისუნთქეს, რაც გოგამ ორიდან ერთი საჯარიმო ჩააგდო, ტაბლოზე თავისი გუნდის სასარგებლოდ 80:76 დაწერა, საფინალო სირენამდე კი 9 წამი რჩებოდა. 

ასეთ დროს სამქულიანი სხვაობა მეტოქეს ოვერტაიმში მატჩის გადაყვანის შანსს აძლევს, ბითაძის ერთმა საჯარიმომ კი ოთხქულიანი ჰანდიკაპი დააფიქსირა. ბოსნიელებმა 5 წამში მართლაც ჩააგდეს სამიანი, მაგრამ გამარჯვებისთვის ეს საკმარისი არ აღმოჩნდა.

ადრიატიკის ლიგის საიტზე მატჩის მიმოხილვაში შეხვედრის საუკეთესოდ, ცხადია, გოგა ბითაძეა დასახელებული. იქვე წერია: "19 წლის ქართველმა პირველივე ტურში დაგვანახა, რომ ეს მისი სეზონი უნდა იყოს."

ასე და ამგვარად, თორნიკე შენგელიას მსგავსად გოგა ბითაძემაც თამამი განაცხადი გააკეთა პირველი ტურის საუკეთესოობაზე. 

1268
მკითხველის კომენტარები / 0 /
მსგავსი ამბები
რუბრიკის სხვა სიახლეები
;