გოგა ბითაძე: რატომ მოვხსენი NBA-ს დრაფტიდან კანდიდატურა?.. [VIDEO]

ავსტრიაში, მასპინძლებთან მატჩის წინა დღეს ჩვენი ნაკრები ვარჯიშზე გასამგზავრებლად სასტუმრო "ქორთიარდ მერიოტის" ფოიეში შეიკრიბა. 18 წლის გოგა ბითაძემ ზემოდან გადმოიხედა (211 სმ სიმაღლისაა), ფიზმომზადების მწვრთნელი ირაკლი შიოშვილი მოძებნა და ჰკითხა: ვარჯიშის შემდეგ ტრენაჟორებთან მისვლის საშუალება თუ მომეცემაო...

მწვრთნელის პასუხი აქ უკვე მეორეხარისხოვანია. გოგას შეკითხვამ "ბარსელონას" მწვრთნელის სვეტისლავ პეშიჩის ანალიზი გამახსენა: "ბევრნაირი ნიჭის მქონე კალათბურთელს შევხვედრივარ, ზოგს ტყორცნის საოცარი ტალანტი აქვს, ზოგი დაცვაშია გამორჩეული, ზოგი როგორც შეტევაშია ნიჭიერი, ასევე დაცვაში... მაგრამ ეს იმას არ ნიშნავს, რომ ასეთი კალათბურთელი ჩემს გუნდში მოხვდება, უპირატესობას ისეთ მოთამაშეს ვანიჭებ, რომელსაც შრომის ნიჭი აქვს. თუ ამასთან ერთად, სროლის ნიჭიც აქვს და კარგადაც აზროვნებს, მისი მომავალი NBA-შია."

მას მერე, რაც გოგა ბითაძე საკალათბურთო სარბიელზე გამოვიდა, ყველაზე თავშეკავებული სპეციალისტებიც თამამად მსჯელობენ გოგას NBA-ურ პერსპექტივაზე. თუმცა, აჩქარება არას არგებს. არც ჩვენ ავჩქარდეთ, ჯერ გოგა კარგად გავიცნოთ და შემდეგ ვილაპარაკოთ ნაციონალურ საკალათბურთო ასოციაციაზე.

შრომის ნიჭი
შრომის ნიჭი ერთია და მისი მიყოლა მეორე. გგონიათ, რადგან გოგა ევროპაში ვარჯიშობს, იქ გამოიმუშავა პროფესიონალი სპორტსმენისთვის საჭირო თვისებები? "მეგა ბიმაქსში" იგი გუნდის ერთ-ერთი ყველაზე სტაბილური კალათბურთელია და გამოცდილი პარტნიორებისგან ბევრსაც სწავლობს, მაგრამ ყველაფერი საქართველოდან დაიწყო.

ვიდრე უცხოეთში გაემგზავრებოდა, ბითაძემ იცოდა, რა უნდოდა და რა ხერხით შეიძლებოდა მიზნის მიღწევა.

- მამაჩემიც პროფესიონალი კალათბურთელი იყო, თუმცა კარიერა ტრავმის გამო ნაადრევად დაასრულა. კალათბურთის თამაში 6 წლის ასაკში დავიწყე. თავიდან სკოლის გუნდში ვთამაშობდი, შემდეგ - კარგ კლუბში გადავედი და იქ განვაგრძე მუშაობა.

ეს კარგი გუნდი "ჰიუნდაია", სადაც ნიკო ჩერქეზიშვილის ხელში მოხვდა, მწვრთნელის, რომელსაც შეგირდები დიდ პატივს სცემენ. არ გამიგია, მის გუნდში რეჟიმი ვინმეს დაერღვიოს... ბატონი ნიკო მხოლოდ დისციპლინის მოყვარული როდია, მან მშვენივრად იცის, რა არის საჭირო ევროპული დონის მოთამაშის გასაზრდელად. ის ხომ თორნიკე შენგელიას აღმზრდელი მწვრთნელიცაა...

სამქულიანები
- თანამედროვე კალათბურთში ტანმაღალი მოთამაშეებიც პერიმეტრიდან უტევენ. მათ ისევე უნდა შეეძლოთ შორიდან ტყორცნა, როგორც ფარქვეშიდან. საამისოდ მეც მზად ვარ. გუნდი გაცილებით ძლიერია, როცა ხუთივე კალათბურთელს ეხერხება ფარქვეშაც და პერიმეტრზეც შედეგიანი თამაში. მომწონს ასეთი სტილის კალათბურთი. საქართველოში ჩემი მწვრთნელებიც პერიმეტრიდან მათამაშებდნენ, მავარჯიშებდნენ სამქულიან ტყორცნებში. ასე რომ, ეს კომპონენტი ჩემთვის უცხო ნამდვილად არ არის. თუმცა კიდევ მეტს ვმუშაობ და მინდა, უფრო გავუმჯობესდე. სათამაშო კომპონენტების გარდა არის კიდევ არაერთი ნიუანსი: ყოველთვის ვცდილობ, თანაგუნდელები გავამხნევო, მივუთითო, როგორ დავდგეთ სწორად დაცვაში, როგორ მოვიქცეთ შეტევაში. ვცდილობ, გუნდს დავეხმარო რამდენადაც შემიძლია.

როგორც გოგა ბითაძის სიტყვებიდან ირკვევა, იგი პატარაობაში პერიმეტრზე თამაშობდა. სწორედ ამიტომაა, სამქულიანებს თამამად რომ სტყორცნის და აგდებს კიდეც. სეზონის დასაწყისში, ადრიატიკის ლიგაზე უფრო მეტს ისროდა შორიდან, სეზონის შუაში იყო შემთხვევები, როცა თავისუფალ პოზიციაში მყოფს სამქულიანი არ უსვრია. ეს ცუდად მენიშნა - ვიფიქრე, "მეგა ბიმაქსის" მწვრთნელი ხომ არ უშლის სამიანის ტყორცნას-მეთქი. გოგამ მიპასუხა:

- "მეგას" მწვრთნელს არასოდეს უთქვამს, სამიანი არ ესროლოო. პირიქით, მომიწოდებს, როცა თავისუფალი ვარ, თამამად ვიყო, არ დავაყოვნო. ადრიატიკის ლიგაზე იყო რამდენიმე მატჩი, პერიმეტრიდან ვერ ჩავაგდე და იმ შეხვედრებში სამიანების ტყორცნას მოვერიდე.

2018-19 წლების სეზონის სადებიუტო მატჩში ბოსნიურ "იგოკეასთან" გოგამ 3 სამქულიანი სტყორცნა და 2 ჩააგდო.



16-წლამდელები თბილისში
გოგა ბითაძე ქართველი გულშემატკივრის წინაშე ნაკრების მაისურით პირველად რომ წარდგა, მაშინაც მწვრთნელის სრული ნდობა ჰქონდა. ეს არც იყო გასაკვირი. ჯერ ერთი იმიტომ, რომ საქართველოს 16-წლამდელთა ნაკრებს ნიკო ჩერქეზიშვილი ხელმძღვანელობდა. მეორეც - გოგაზე თამაშის აწყობა თამაშის მოგების გარანტია იყო.

2015 წელს თბილისში გამართული ევროპის ახალგაზრდული ფესტივალი ხომ გახსოვთ? საქართველოს ნაკრებმა პირველ ტურში თურქეთს იოლად აჯობა, შემდეგ იყო ბოსნიასთან და ლატვიასთან მატჩები.

ეს ის უიშვიათესი შემთხვევა გახლდათ, როდესაც სპორტის სასახლე 16-წლამდელი ბავშვების თამაშზე თითქმის პირამდე გაივსო. წინა დღისით თურქების ძლევამ გულშემატკივარს მომავლის იმედი გაუღვივა და სპორტის სასახლისკენ დაძრა. ბევრი იმიტომაც მივიდა, რომ ამომავალი ვარსკვლავი ენახა.

ჯამლეტ ხუხაშვილი, რომელსაც ის რეპორტაჟები მიჰყავდა დღეს ღიმილით იხსენებს:

- ოლიმპიური ფესტივალის მსვლელობისას ხშირად მეუბნებოდნენ: მხოლოდ გოგა ბითაძეზე რატომ ლაპარაკობო? რატომაც არა? ძალიან კარგად თამაშობდა, თან პერსპექტივა დავინახე და არ მეთქვა? დარწმუნებული ვარ, მალე NBA-ში წავა.

დონჩიჩი, მუსა, ბითაძე
NBA-ს თემას კიდევ დავუბრუნდებით, აქ კი მოგახსენებთ, რომ ბითაძის საქართველო მუსას ბოსნიმ დაამარცხა. მუსაც ძალიან ნიჭიერი კალათბურთელია. სხვათა შორის, 1999 წელს დაბადებული ევროპის ყველაზე პერსპექტიული კალათბურთელების სამეული ასე გამოიყურება: დონჩიჩი, მუსა, ბითაძე...
ისევე როგორც დონჩიჩი და მუსა, გოგაც ამერიკელი სკაუტების თვალთახედვის არეშია. აი, რა დაწერა მასზე გამოცემა "დრაფტექსპრესმა" NBA-ს კემპის შემდეგ:

"პირველივე შეხვედრისთანავე მიხვდებით, რატომ ითვლება გოგა ბითაძე მსოფლიოს მასშტაბით საყურადღებო ტალანტად. იგი 211 სმ სიმაღლისაა და 113 კილოგრამს იწონის. შთამბეჭდავი სანახავია ხელებგაშლილი. მან კემპზე გაიარა ტესტი მაღალი დონის კალათბურთელებთან. უფროსებს ფიზიკურად და გამოცდილებით ჩამორჩებოდა, რიგ ეპიზოდებში ბრაზდებოდა კიდეც, მაგრამ მას საკმარისი დრო აქვს ფიზიკური კონდიციების გასაუმჯობესებლად, დაცვაში კიდევ უფრო მოსამატებლად და შეტევაში ისედაც მრავალფეროვანი იარაღის კიდევ უფრო დასახვეწად".

ეს "დრაფტექსპრესმა" ერთი წლის წინათ დაწერა, დღეს გოგამ ფიზიკური კონდიციებიც გაიუმჯობესა და უმაღლეს დონეზე თამაშის პრაქტიკაც შეიძინა.

სტეფანიას თვალით
როდესაც ამა თუ იმ კალათბურთელის NBA-ურ პერსპექტივაზე ვლაპარაკობთ, საინტერესო უნდა იყოს ვლადიმერ სტეფანიას მოსაზრება. ის ხომ პირველი იყო ქართველებიდან, ნაციონალურ საკალაბურთო ასოციაციაში რომ მოხვდა... დიდი პრობლემების გადალახვაც მოუხდა. ვოვამ გოგა პირველად სერბეთ-გერმანიასთან მატჩებისას ნახა:

- ბითაძე მომეწონა. თუმცა ძალიან ახალგაზრდაა, ნედლია. ეტყობა, რომ უკვე პროფესიონალია. როგორც კალათბურთელები ვამბობთ, კარგი ხელი აქვს, სროლაც შეუძლია და ჩაგდებაც. თუმცა გამოცდილება სჭირდება, კალათბურთის ფუნდამენტურად შესწავლას დრო უნდა. იშვიათად ამოდიოდა ბლოკებზე... თუმცა არ ვიცი, ეს მწვრთნელის დავალება იყო თუ თავად არ უყვარს. ფაქტი ერთია - ბითაძეს დიდი პოტენციალი აქვს და თუ სტაბილურობას მიაღწია, NBA-შიც ძალიან სასარგებლო კალათბურთელი იქნება. ვიცი, რომ სამქულიანის ტყორცნაც შეუძლია, მაგრამ ამერიკელი მწვრთნელები მისგან, როგორც მეფარისგან, უმთავრესად სამწამიან ზონაში დამაჯერებელ თამაშს მოითხოვენ. იგი პარტნიორებს უნდა დაეხმაროს, პასი მიიღოს და გასცეს, თამაში გახსნას. გერმანიასა და სერბეთში საქართველოს ნაკრებმა თამაში ვერ გახსნა, ფარქვეშიდან ბურთის ჩაგდება გვიჭირდა, ამიტომაც ვიყავით სამქულიანების იმედად.

თუნდაც სტეფანიასა და თორნიკე შენგელიას მაგალითზე შეიძლება ითქვას: NBA-ში მოხვედრისას, დიდი მნიშვნელობა აქვს რომელი გუნდი აგიყვანს...

- ამაზეა დამოკიდებული კალათბურთელის კარიერა. მე არ გამიმართლა - ამიყვანა "სიეტლ სუპერსონიქსმა", რომელშიც ასეთი დახარისხება იყო: 7 მთავარი კაცი და დანარჩენები. გარი პეიტონში და კიდევ ექვს ვარსკვლავში სიეტლელები დიდ ფულს იხდიდნენ და დიდ ყურადღებასაც აქცევდნენ, დანარჩენებს მოგვცემდნენ ბურთს და ხუთი-ხუთზე ითამაშეთო. ვარჯიში, ფაქტობრივად, არც გვქონდა. როდესაც ახალგაზრდა ხარ, აუცილებელია ამა თუ იმ კომპონენტზე ბევრი მუშაობა, თამაშის გაუმჯობესება. ამის საშუალება კი "სიეტლში" არ გვქონდა. ინდივიდუალურ ვარჯიშებს ვინ ჩიოდა, ტრავმა რომ მიგეღო, გეუბნებოდნენ - გაუძელიო. სიმართლე გითხრათ, სწორედ "სონიქსში" მიღებულმა ტრავმამ იმოქმედა ჩემს კარიერაზე უარყოფითად. ნაადრევად მომიწია კალათბურთის მოედნიდან გასვლამ.

რატომ მოხსნა კანდიდატურა?
ახლა, გოგას მოვუსმინოთ, რომელიც NBA-ზე სიამოვნებით ლაპარაკობს:

- ბევრია მოთამაშე, რომელთა თამაშის ხილვა სიამოვნებას მანიჭებს. დავასახელებდი ნიკოლა იოკიჩს, რომელიც ჩვენი კლუბიდან წავიდა ამერიკაში. მომწონს ყურება, როგორ მსუბუქად, თავისუფლად თამაშობს. ასევე ძალიან საინტერესოა საქართველოს ნაკრების კაპიტნის ზაზა ფაჩულიას თამაშის ხილვა. ის ნამდვილი მეომარია, მოედანზე ყველაფერს დებს. კალათბურთი მხოლოდ ქულები არ არის, მას ბევრი სასარგებლო საქმის შესრულება შეუძლია.

სხვათა შორის, თინეიჯერმა ფაჩულიამ სანაკრებო კარიერა ლუქსემბურგთან მატჩით დაიწყო, ბითაძე კი, ნაკრებში მოხვედრის პირველივე წელს ევრობასკეტი 2017-ზე მოხვდა... სწორედ იმ ევრობასკეტზე, ზაზამ სანაკრებო კარიერის დასრულების შესახებ რომ გამოაცხადა.

კიდევ ერთი პარალელი: 2002 წელს ფაჩულია ამერიკაში იყო ჩასული, წინასადრაფტოდ NBA-ს კლუბებში ივარჯიშა, მაგრამ იმ წელს დრაფტზე არ დამდგარა, ერთი წლის დაგვიანებით, 2003-ში აირჩია "ორლანდო მეჯიქმა".

   ზაზა ფაჩულია: ამერიკელები შეცდნენ, დრაფტზე 42-ე ნომრად რომ ამირჩიეს!

ბითაძემაც დააყენა კანდიდატურა 2018 წლის დრაფტზე, მაგრამ ბოლო მომენტში მოხსნა. ცხადია, ასეთი გადაწყვეტილება ერთპიროვნულად არ მიუღია - მას ევროპაში ერთ-ერთი ყველაზე გავლენიანი აგენტი ჰყავს მიშკო რაზნატოვიჩი.

- დრაფტიდან კანდიდატურა იმიტომ მოვხსენით, რომ ნაციონალურ საკალათბურთო ასოციაციაში უფრო მომზადებული შევსულიყავი, - მითხრა გოგამ, - ვგულისხმობ ფიზიკურ მომზადებას. კონდიციების მიხედვით არ ვიყავი სათანადოდ მზად. იმედი მაქვს, რომ ამ სეზონში ბევრი მუშაობით კიდევ უფრო მოვუმატებ, როგორც ფიზიკურად, ასევე სხვა კომპონენტებში და მომავალ დრაფტს უფრო მომზადებული შევხვდები.

დრაფტის წინ ამერიკული კლუბები გარანტიებს ვერ იძლევიან, მაგრამ აგენტებმა კარგად იციან, ვის რომელ წრეში არჩევა ელის. პირველ წრეში არჩევა ნიშნავს გარანტირებუყლ კონტრაქტს (ხშირ შემთხვევაში) და კარგ ხელფასს. მეორე წრეში არჩეულებს კი საზაფხულო ლიგებზე უწევთ კლუბების ხელმძღვანელებთან თავისი შესაძლებლობების დამტკიცება და კონტრაქტის მოპოვება.



მეგა-სტარტი
ცენტრის მიერ ჩატარებული კარგი სეზონი კი, დრაფტზე პირველ წრეში არჩევის გარანტიაა. ევროპელ წინახაზელებს ხომ ამერიკაში დიდი ფასი აქვთ.
2018-19 წლების სეზონი ქართველმა ცენტრმა ეფექტურად დაიწყო: "იგოკეასთან" 24 ქულა და 12 მოხსნა მოაგროვა, "მეგა ბიმაქსმა" კი 80:79 გაიმარჯვა. პირველივე ოფიციალური მატჩის შემდეგ რჩება შთაბეჭდილება, რომ გუნდი ერთგვარად ბითაძეზეა აწყობილი.

   რა დაუფარა ბოსნიელს ბითაძემ! საიდან გაჩნდა ფართან? [VIDEO]

- ვერ ვიტყვი, რომ "მეგა ბიმაქსი" ერთ კალათბურთელზეა აწყობილი. ვთამაშობ, მაქსიმუმს ვაკეთებ, რომ გამარჯვებებში დავეხმარო და წარმატებული სეზონი გამოგვივიდეს. ჩემპიონატის დაწყების წინ გუნდის შემადგენლობა გაძლიერდა და მგონია, რომ უკეთესი შედეგები უნდა გვქონდეს როგორც ადრიატიკის ლიგაზე, ასევე სერბეთის ჩემპიონატში.

ბითაძისთვის მსოფლიოს ჩემპიონატის მეორე საკვალიფიკაციოს სტარტიც შთამბეჭდავი გამოდგა: ისრაელში 13 ქულა, 9 მოხსნა და 4 დაფარება ჰქონდა, ხოლო საბერძნეთთან - 17 ქულა და 5 მოხსნა.

თელ-ავივში მოგების მიზეზებზე ლაპარაკისას საქართველოს ნაკრების მთავარმა მწვრთნელმა ილის ზუროსმა ბითაძის გვარიც ახსენა:

- დაცვაში, მეტოქის პიკ-ენდ-როლების დროს რომ გიჭირს, მნიშვნელოვანია მოძრავი ცენტრი, რომელსაც დაფარება კარგად ეხერხება. გოგა პირველ ტაიმში დაფარებებში გამორჩეული იყო და ამიტომაც დავტოვეთ მეოთხე პერიოდის ბოლომდე მოედანზე. თუმცაღა, კარგად იცით, როგორ ვაფასებ და რას ნიშნავს გუნდისთვის გიორგი შერმადინი. ჩვენი მთავარი ამოცანა სწორედ პიკ-ენდ-როლების შეჩერება იყო, რაც მეოთხე პერიოდში მეტ-ნაკლებად კარგად მოვახერხეთ.

მართლაც, ერთი-ორი დაფარების შემდეგ, გოგასთან ფარქვეშ მდგომი ებრაელები ტყორცნას ვეღარ ბედავდნენ. ბითაძე ხომ თავისი გრძელი ხელებით მასპინძლებს შანსს არ უტოვებდა.



სხვაობა 18 და 19 წლის ბითაძეს შორის
გახსოვთ ბითაძის თამაში მსოფლიოს ჩემპიონატის პირველ საკვალიფიკაციო ეტაპზე? ექვსიდან სამ მატჩში ხუთი ფოლის გამო ნაადრევად დატოვა მოედანი. ეს დასაძრახი სულაც არ არის - 18 წლის ახალგაზრდას მეტისმეტად დიდი პასუხისმგებლობა რომ დააწვება, ძნელია ისეთივე მშვიდად შეხვდეს, როგორც 30 წლის გამოცდილი კალათბურთელი. ბითაძემ ხომ ჯარიმები უმეტეს შემთხვევაში ზედმეტი მონდომების გამო მიიღო: მახსოვს, გერმანიასთან მატჩში მეხუთე ფოლი როგორ მიიღო - მისი თანაგუნდელი საჯარიმოს სტყორცნიდა, აუცდა, ბითაძე კი გერმანელს თავზე გადააფრინდა და ისე მოხსნა. მსაჯებმა ფოლი დააფიქსირეს.

გოგასთვის რთული იყო სერბეთის ნაკრების გამოცდილი ცენტრის მიროსლავ რადულიცას წინააღმდეგ თამაში. ყველაფერს თავი რომ დავანებოთ, სერბი ქართველებს სამწამიანი ზონიდან კორპუსს გამოყენებით დევნიდა. მიროსლავი ხომ ნაციონალურ საკალათბურთო ასოციაციაშიც თამაშობდა, "მილუოკიში" ზაზა ფაჩულიას შემცვლელიც იყო.

სერბეთთან სტუმრად 2017 წლის ნოემბერში ვითამაშეთ. გავიდა ერთი წელი და საქართველოს ნაკრებში სულ სხვა ბითაძე ვიხილეთ: ამჯერად უკვე თავად ქართველი დევნიდა სამწამიანი ზონიდან მოწინააღმდეგეებს. ისრაელთან მატჩის შემდეგ რა კომენტარი გააკეთა ილიას ზუროსმა, უკვე წაიკითხეთ. იგივე განმეორდა საბერძნეთთან. ელინებს არ აღმოაჩნდათ წინახაზელი, შენგელიას, ბითაძეს და შერმადინს ტოლ-სწორად რომ დაუდგებოდა, ამიტომ პირველი წუთების შემდეგ ტაქტიკა შეცვალეს და თამაშის მოგება სამქულიანებით სცადეს...

NBA-ს 2019 წლის სეზონი ზუსტად ერთი წლის შემდეგ დაიწყება. თუ ბითაძემ 2018-დან 2019-მდე ისე მოუმატა, როგორც 2017-დან 2018-მდე...

ყოველდღიური სპორტული გაზეთი "ლელო"
2900
მკითხველის კომენტარები / 0 /
მსგავსი ამბები
რუბრიკის სხვა სიახლეები
;