გოგა ბითაძე შარლოტიდან: საოცარია ჯორდანის გუნდში თამაში...

NBA-ს დრაფტისწინა ვარჯიშისთვის 19 წლის ქართველი ცენტრი გოგა ბითაძე შარლოტში ჩავიდა და "ჰორნეთსში" ივარჯიშა.

ამ მოვლენას ვრცელი პუბლიკაცია მიუძღვნა გამოცემა "შარლოტ ობსერვერმა". გთავაზობთ რიკ ბონელის ნაშრომის ქართულ თარგმანს.

"ცენტრები, რომლებიც მხოლოდ ფარქვეშ დგანან მოდაში აღარ არიან. მათ ცვლიან ქართველი გოგა ბითაძისნაირი ცენტრები. 

NBA-ს ოფიციალური საიტი გოგა ბითაძეის პლუსებსა და მინუსებზე [VIDEO]

ბითაძე 19 წლისაა, გასულ სეზონში მონტენეგროს "ბუდუჩნოსტში" ევროლიგაზე თამაშობდა. 211 სმ სიმაღლის ახალგაზრდა 13.9 ქულას, 6.4 მოხსნასა და 2.3 დაფარებას აგროვებდა. სამქულიანებს 40-პროცენტიანი სიზუსტით სტყორცნიდა.

შარლოტელთა გუნდში ვარჯიშისას ბითაძემ დაგვანახა, რომ პერიმეტრიდან სროლები მისი პლუსია, თავს კომფორტულად გრძნობს.

საინტერესოა, რას ფიქრობს ქართველის შესახებ "შარლოტ ჰორნეტსის" გენერალური მენეჯერი მიჩ კუპჩაკი... მან ინტერვიუში კონკრეტული გვარები არ დაასახელა, თუმცა ცხადი იყო, რომ გოგა ბითაძეს გულისხმობდა:

- NBA-ში თამაშის სტილი ცოტა შეიცვალა. ადაპტაცია ყველა ცენტრმა ვერ გაიარა, თუმცა არის რამდენიმე წინახაზელი, რომელიც კარგად ერგება NBA-ს დღევანდელ სტილს.

სწორედ ასეთი ტიპის ცენტრია ბითაძე. ძნელი სათქმელია, მიაღწევს თუ არა დრაფტისას ბითაძე "შარლოტამდე" (მეთორმეტე ნომრად არჩევის უფლება აქვს), მაგრამ ერთი რამ ცხადია - "ჰორნეტსის" ხელმძღვანელობისთვის ქართველი კარგი ვარიანტია.

ბითაძისთვის ეს იყო ბოლო საჩვენებელი ვარჯიში 20 ივნისის დრაფტამდე. მანამდე მან მოიარა "სან ანტონიო", "ატლანტა", "ბოსტონი" და "დეტროიტი".

სხვათა შორის, "სან ანტონიოს" მთავარი მწვრთნელი გრეგ პოპოვიჩი წარმატებით მუშაობს ევროპელ კალათბურთელებთან. უყვარს მოძრავი ცენტრები. "შარლოტ ჰორნეტსის" თავკაცი ჯეიმს ბორეგო სწორედ პოპოვიჩის ასისტენტი იყო და ისიც ძალიან აფასებს ცენტრებს სამქულიანი ტყორცნით.

- მწვრთნელები პატარაობიდანვე მაჩვევდნენ პერმეტრზე თამაშს. მხოლოდ სამქულიანებს არ ვისროდი, ისეთ სამუშაოს ვასრულებდი, რაც უკანახაზელებს ევალებათ, - ამბობს ბითაძე.

ბითაძეს სერბეთის ლიგის საუკეთესოს ჯილდო NBA-ს ვარსკვლავმა იოკიჩმა გადასცა

კითხვაზე, რამდენად ახლოსაა მის თამაშის მანერასთან NBA-ს სტილი, ქართველი პასუხობს:

- ძალიან ახლოსაა. კალათბურთი მუდმივად ვითარდება, ცენტრს უნდა შეეძლოს მოედანზე სწრაფად გადაადგილებაც და ბურთის ჩაგდებაც. მე ეს შემიძლია. ასე რომ, NBA-ს სტილს კარგად ვერგები.

ბითაძემ კლუბის შესახებ საკუთარი აზრიც დააფიქსირა:

- "შარლოტ ჰორნეთსის" მფლობელი მაიკლ ჯორდანია. აქ თამაში საოცარი პატივია. ვიცნობ მწვრთნელის, ჯეიმს ბორეგოს სათამაში შეხედულებებს. დიდ პატივს ვცემ."

ყოველდღიური სპორტული გაზეთი "ლელო"
5941
მკითხველის კომენტარები / 0 /
მსგავსი ამბები
რუბრიკის სხვა სიახლეები
;